Ishimwe rya Junior MultiSystem nyuma y’impanuka yamuviriyemo gucibwa ukuboko

Yanditswe na Uwiduhaye Theos
Kuya 3 Gicurasi 2019 saa 09:44
Yasuwe :
0 0

Karamuka Jean Luc wamamaye mu gutunganya indirimbo z’abahanzi bakomeye mu Rwanda nka Junior Multisystem, yatangaje ko kurokoka kwe impanuka aherutse gukora byari ibitangaza by’Imana.

Uyu musore umaze ukwezi kurenga akoze impanuka yamuviriyemo gucibwa ukuboko, yanditse amagambo ye ya mbere kuri Instagram nyuma yo kuva mu bitaro avuga ko ubwo ari kumwe na Yesu ntacyo azaba.

Ati “Ndikumwe na Yesu ntacyo nzaba. Ushimwe nyagasani ko wankuye ahakomeye sinzi uko ubigenza gusa icyo nzicyo n’uko iyo utegetse bitungana.”

Benshi batanze ibitekerezo ku nyandiko Junior yashyize kuri uru rubuga bashimye Imana, bamukomeza bamubwira ko kuba atarapfuye ari uko Imana imufiteho umugambi mwiza.

Umuhanzikazi Oda Paccy wamubaye hafi we yamubwiye ati “Ngwino dukore ‘hit’, Imana ikora ibikomeye. Turagukunda cyane.”

Ku wa Gatandatu tariki 30 Werurwe saa yine z’ijoro nibwo imodoka yo mu bwoko bwa RAV4 yagonze Junior. Uyu umusore yakomeretse mu buryo bukomeye ndetse ukuboko kw’ibumoso kurangirika, nyuma y’iminsi mike abaganga banzura ko bagomba kuguca.

Tariki 19 Mata 2019 nibwo yasezerewe mu bitaro bikuru bya Kaminuza bya Kigali, CHUK, aho yari amaze ibyumweru bitatu arwariye.

Producer Junior ni umwe mu bamaze igihe mu mwuga wo gutunganya indirimbo mu Rwanda kuko yakoranye muri Unlimited Records na Lick Lick usigaye uba muri Leta Zunze Ubumwe za Amerika. Yakoze mu zindi studio nka Touch Records, Round Music, yakoze impanuka amaze igihe gito muri Empire Records ya Oda Paccy.

Ahantu hose yanyuze yagiye akora indirimbo zakunzwe cyane. Nta muhanzi n’umwe uri mu bagezweho mu Rwanda atakoreye indirimbo.

Impanuka yatumye Junior acibwa ukuboko yashavuje abahanzi benshi kubera ko uretse ko yabakoreraga ibihangano binoze, abenshi ni inshuti ze mu buzima busanzwe.

Junior Multisystem yakoze impanuka ituma acibwa ukuboko kw'ibumoso
Akiva hano mu isabukuru ya mushiki we nibwo yahise akora impanuka gusa ashima Imana ko agihumeka uw'abazima

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza