Ishavu rya Big Sean nyuma y’urupfu rwa Naya Rivera bigeze gukundana

Yanditswe na Uwiduhaye Theos
Kuya 19 Nyakanga 2020 saa 10:34
Yasuwe :
0 0

Umuraperi Big Sean yagaragaje agahinda yatewe n’urupfu rwa Naya Marie Rivera bigeze gukundana, wamenyekana cyane muri filime muri Leta Zunze Ubumwe za Amerika.

Uyu mugore yasanzwe mu kiyaga cya Piru muri California yarapfuye, nyuma y’igihe kigera ku cyumweru ashakishwa.

Big Sean yifashishije urukuta rwe rwa Instagram n’amafoto ya Naya Rivera, asabira uyu wahoze ari umukunzi we kuruhukira mu mahoro, ndetse amushimira kuba yarahesheje umugisha abantu yifashishije impano ye.

Arangije ati "Uri intwari! Si uko washyize ubuzima bwawe mu kaga ukarokora umuhungu wawe, ahubwo kubera inzitizi wakuyeho ku bantu benshi kugira ngo bumve ko bifitiye icyizere muri bo kandi bahagarare bwuma batewe ishema nabo ubwabo mu gihe batashoboraga kubigeraho bonyine."

Yavuze ko yishimira ko igihe babanye hari byinshi yamwungukiyeho, byamufashije kuba umunyabwenge no kuba umuntu mwiza kurusha uko yahoze.

Ati "Nishimira kandi nkakunda ibintu byose byabaye hagati yacu byo kumfasha kuba umunyabwenge no kuba umuntu mwiza kurusha uko nari ndi. Ndacyafite agahinda, n’ubu sindiyumvisha ko ibyabaye ari ukuri. Ndi kugusengera wowe n’umuryango wawe kandi nzi ko ubareba kandi ubarinda. Ruhukira mu mahoro Naya.”

Tariki 7 Nyakanga nibwo uyu mugore wari ufite imyaka 33 yaburiwe irengero nyuma yo kujyana n’umwana we w’umuhungu koga, uyu mwana akaza gusangwa wenyine hafi y’ubwato bari barimo.

Ku wa 13 Nyakanga Ubuyobozi bwo muri Venture aho iki kiyaga yarohamyemo giherereye bwatangaje ko bwabonye umurambo wa Naya Rivera. Icyo gihe TMZ yatangaje ko Polisi yavuze ko uyu mugore atiyahuye nk’uko byaketswe, ahubwo ari impanuka yabayeho ikamuhitana.

Mu kiganiro n’itangazamakuru, Polisi ya Venture yavuze ko umukinnyi wa filime Naya Rivera yakoresheje ingufu ze zoze ngo arokore umwana we w’imyaka ine, Josey Hollis Dorsey, ariko we kwirokora bikamunanira.

Mu 2013 Naya Rivera yakundanye na Big Sean baza gutandukana mu 2014. Nyuma yaje gukundana n’umukinnyi wa filime Ryan Dorsey banasezerana kubana, ariko mu 2018 baratandukana. Yapfuye bafitanye umwana w’umuhungu ari na we wari uri kumwe n’uyu mugore ubwo yaburirwaga irengero.

Naya Rivera n'umuhungu we bari bajyanye koga, aza kurohama agerageza kumurokora
Naya Rivera yakundanye umwaka umwe na Big Sean nyuma baza gutandukana

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .