Inzozi z’umuhanzikazi Teta Babo uririmba mu Kidage n’Ikinyarwanda

Yanditswe na Uwiduhaye Theos
Kuya 13 Mutarama 2020 saa 09:46
Yasuwe :
0 0

Barbara Teta [Babo], umwe mu bahanzikazi bakizamuka uririmba yibanda ku rurimi rw’Ikidage afite inzozi zagutse zimwerekeza kuzibona umunsi umwe yicaranye ku meza amwe na Perezida Kagame.

Babo w’imyaka 18 yamenyekanye mu ndirimbo zirimo izo yahuriyemo na Urban Boyz nka ‘‘Ich Liebe Dich’, bisobanuye ‘Ndagukunda’ mu Kinyarwanda na ‘Turn Up’, ‘Problem’, ‘Number One’ aherutse gushyira hanze n’izindi.

Uyu muhanzikazi yavuze ko uwo afata nk’icyitegererezo mu muziki we ari Davido na King James wo mu Rwanda akundira ko ibihangano byabo biba bifutse.

Ati “Umuhanzi mfata nk’icyitegerezo muri Afurika ni Davido, uwo mu Rwanda ni King James bitewe n’uburyo ibihangano byabo binyura.”

Yemeza ko gukora umuziki byamujemo akiri umwana agakunda kuririmba mu cyumba ari wenyine yamara gukura akagenda abyiyumvamo birushijeho kugeza ubwo yafashe umwanzuro yo kubigira umwuga n’ubwo abikomatanya n’ishuri.

Mu ntumbero afite uyu muhanzikazi uririmba mu Kidage n’Ikinyarwanda, ashaka kumenyekanisha umuziki w’u Rwanda ku rwego mpuzamahanga.

Ati “Intumbero mfite mu muziki ni ukumenyekanisha ibihangano byacu by’Abanyarwanda no guteza imbere igihugu cyanyibarutse. Mu myaka itanu nifuza kuzibona mu bahanzi bateye imbere mu rwego ruri hejuru ndetse nteza imbere n’igihugu cyanjye nk’Umunyarwandakazi.”

Abajijwe impamvu na n’ubu mu Rwanda abakobwa bakora umuziki ari bake yemeza ko hari ibibazo byinshi bahura nabyo bigatuma hari abacika intege.

Ati “Impamvu abakobwa bakora umuziki mu Rwanda bakiri bake ikibabangamiye ni uko usanga batinya kubera ibibazo bahura nabyo muri uru ruganda kwihangana bikabananira. Muri rusange abahanzi bahura n’ibigeragezo aho usanga aba-producer basaba amafaranga mbere ugasanga umwaka urarangiye umuhanzi atarabona indirimbo ye, ugasanga amwiciye gahunda.”

Kimwe mu bintu bikomeye uyu mukobwa uba hanze y’u Rwanda mu Budage yifuza ni uguhura na Perezida Kagame kuko ari inzozi afite kuva akiri muto cyane.

Ati “Duhuye na Perezida Kagame byanshimisha cyane kuko nizo nzozi mfite kuva nkiri muto ikindi. Namubwira ko ari umubyeyi mwiza w’icyitegererezo ku rubyiruko rw’ejo hazaza kandi natwe bo mu mahanga numva ko tuzamwumvira nk’umubyeyi utwereka aheza hejo hazaza ku gihugu cyatubyaye.”

Babo amaze imyaka ine yinjiye mu muziki, ni umu- métisse uvuka ku Munyarwandakazi na se akaba Umudage.

-  Reba indirimbo Teta Babo aheruka gushyira hanze yise ‘Number One’

Babo avuga ko ashaka guteza umuziki imbere ukarenga urwego uriho uyu munsi
Babo ni umwe mu bahanzi baririmbye muri Rwanda Day yabereye i Bonn umwaka ushize
Umuhanzikazi Babo afite imyaka 18 y'amavuko

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .