Dj Princess Flor yahishuye uburyo yigishijwe kuvanga imiziki n’umuntu bahuriye mu kabyiniro

Yanditswe na Uwiduhaye Theos
Kuya 13 Mutarama 2021 saa 09:52
Yasuwe :
0 0

Nyirimbabazi Hilde Flora umaze kwamamara i Burayi nka Dj Princess Flor, yirahira Umunya-Guinée Conakry witwa Dj Bobo bahuriye mu kabyiniro uyu mukobwa yakoragamo akazi ko gutanga ibinyobwa; akaza kumubera umugisha kuko ariwe watangiye kumwigisha kuvanga imiziki bikaba bimaze kumugira icyamamare.

Uyu mukobwa yavuze ko yahuye na Dj Bobo mu 2007 ubwo yari umwe mu batanga ibinyobwa mu kabyiniro mu Bubiligi (serveuse), baramenyana biza kumuviramo umugisha wo kumufasha kwinjira mu kuvanga imiziki.

Ati “Ukuntu nahuye na DJ Bobo rero mu 2007 twahuriye mu kabyiniro kitwa Black Light yakoragamo nka Dj ariko njye nakoragamo akazi ko gutanga ibinyobwa. Twaje gutangira kuganira kubera ko nabonaga akora aka kazi nkabikunda ntangira kugenda mubaza byinshi niko guhitamo kujya anyigisha gake gake. Nza kubimenya. Imyaka twamaranye tuziranye kuyibara byangora ariko navuga ko yambaye hafi nk’imyaka ibiri, kugeza na n’ubu ariko aracyampa inama.”

Yavuze ko Dj Bobo amwigisha kuvanga imiziki yari amaze imyaka irenga itanu abikora, ati “ Anyingisha yari amaze nk’imyaka itanu abikora. Ubu ni umu-Dj ukomeye mu bagize umuryango w’ab’iwabo muri Guinée ndetse yashinze iserukiramuco rikomeye riba buri mwaka ryitwa PANAF.”

Nyuma yo guhabwa ubumenyi na Dj Bobo, Dj Princess Flor yatangiye kuvanga imiziki neza mu 2010, atangira abikora nk’akazi ko mu biruhuko ubwo yabaga avuye ku ishuri nyuma biza kumuviramo akazi ka buri munsi kanamutunze kugeza ubu.

Uyu mukobwa wabuze ababyeyi akiri muto avuga ko musaza we akurikira ariwe wagiye amufasha akamushyirira indirimbo ku ma CD.

Ineza yituwe indi!

Dj Princess Flor nyuma yo gutangira kumenyekana, yaje kuba umwe mu ba-Dj bakomeye i Burayi, ndetse acuranga mu tubyiniro dukomeye mu bihugu bitandukanye byaho.

Hari kamwe mu tubyiniro dukomeye ko mu Bubiligi aho aba kitwa Club Mondial, yabaye umwe mu ba-Dj bagacurangagamo mu gihe mugenzi we Dj Bobo yari afite inzozi zo kuzagacurangamo ariko atarabigeraho. Aza kugacurangamo abifashijwemo na Dj Princess Flor.

Dj Princess Flor avuga ko kuba yaramubereye ikiraro muri ako kabyiniro ari ikintu gikomeye byamushimishije.

Ati “Kuba naramubereye ikiraro kimugeza muri Club Mondial urebye ntacyo byanyigishije kuko sinigeze numva na rimwe musumbye, ahubwo navuga ko byanteye kwishima kumva ko mbashije kumukorera icyo kintu, wenda abandi nibo babivanamo isomo bibaye ngombwa.”

Yavuze ko nawe hari abantu batandukanye ari gufasha kumenya umwuga wo kuvanga imiziki, ndetse akaba ateganya kubikomeza kuko nawe yabonye icyiza cyo kugira neza.

Dj Princess Flor amaze imyaka 16 mu Bubiligi. Amaze gucuranga mu bitaramo bikomeye mu bihugu byinshi mu Burayi ndetse no muri Afurika.

Dj Princess Flor wabaye imfubyi akiri muto yakuze arererwa mu muryango, mu 2003 aza kujya i Burayi. Ubuzima bwaramushariranye atangira gukora mu tubari na resitora.

Mu 2007-2009 nibwo yagiye gukora mu kabyiniro kamwe yanigiyemo gucuranga imiziki, afashijwe na Dj Bobo. Yatangiye kumenya gucuranga neza mu 2010 naho atangira kubikora kinyamwuga mu 2011.

Uyu mukobwa yacuranze ahantu hatandukanye harimo nko mu iserukiramuco ryo mu Bubiligi ryitwa bomboclat, Guinness festival Cameroun Douala, Nyamacoma Festival Dar es Salaam, Avant première de Eddy Kenzo Guinée Conakry, igitaramo cyahuriyemo Davido na Ali Kiba, ibitaramo bya Meddy byazengurutse mu Bwongereza, Festival Waka Waka Denmark, muri Rwanda Day, igitaramo cya Tekno mu Budage, Festival Antigel Suisse n’ibindi bitandukanye.

Aherutse guhabwa akazi ko gucuranga umuziki kuri KIF Radio, iyi ikaba imwe muri radiyo zigezweho cyane mu Bubiligi.

Dj Princess Flor ni umwe mu bavanga imiziki bamaze kubaka izina rikomeye
Dj Bobo ni we wigishije Dj Princess Flor kuvanga imiziki bahuriye mu kabyiniro
Dj Bobo yabaye intandaro yo kwinjira mu mwuga wo kuvanga imiziki kwa Dj Princess Flor

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .