Inkomoko y’ikanzu Mutesi Jolly yambaye muri Miss Rwanda yiganye Rihanna ikavugisha benshi

Yanditswe na Uwiduhaye Theos
Kuya 8 Werurwe 2021 saa 03:23
Yasuwe :
0 0

Kuri Miss Rwanda wa 2016, Mutesi Jolly amaso ya benshi ahora arekereje agamije kumujora no kumugaragaza mu buryo butandukanye ku buryo akenshi ikintu cyose akoze cyangwa avuze gituma aba iciro ry’imigani ku mbuga nkoranyambaga.

Ni ibintu byatangiye ubwo uyu mukobwa yamaraga kwambikwa rya Miss Rwanda mu 2016, ariko we iyo yivuga yemeza ko yamaze kwiyakira ndetse nta kintu na kimwe kikimuhungabanya cyane cyane ko iyo bije ku bijyanye no kumwisabira.

Nko hambere aha muri Nzeri umwaka ushize, aheruka kwandika amagambo kuri Twitter akangurira abakobwa b’abangavu kwihagararaho no kudashukwa ngo baterwe inda zitateganyijwe, ateza urunturuntu bamwe baramwibasira bikomeye.

Icyo gihe uburakari bwakuruwe n’amagambo yanditse agira ati “Mureke gutwita nk’uko umuntu yandura ibicurane. Mwige kuganirira mu ruganiriro, mureke kujya kuganirira ku buriri’.

Ibyo byavuyeho abantu baba batuje ho gatoya maze muri Mutarama uyu mwaka nabwo yongera gukurura impaka ubwo yavugaga ko hajya habaho ibirori byo gusezera ku busore, maze asembura ibitekerezo bya benshi.

Ubu yibasiwe biturutse ku ikanzu yajyanye mu itoranywa ry’abakobwa 20 babonye itike yo kujya mu mwiherero wa Miss Rwanda mu 2021

Iyi kanzu ndende ikozwe mu buryo umugongo wose n’inda hashyizweho akenda kajya gusa n’umubiri w’umuntu ku buryo benshi bagize ngo nta kindi kintu cyarengagaho kuri iyo kanzu ku buryo inda yose n’umugongo biri hanze kandi atari ko biri.

Iyi kanzu Mutesi Jolly yari yambaye ifite imisusire nk’iy’iyo Stella McCartney yakoreye umuhanzikazi Robyn Rihanna Fenty [Rihanna] akayambara mu birori bya MET Gala 2014.

Tanga Design wadoze iyi kanzu mu kiganiro yagiranye na IGIHE, yavuze ko nta byinshi yayivugaho gusa icyo yavuga ari uko ari Mutesi Jolly wamuhaye igitekerezo cyo kuyidoda uko imeze ntacyo ahinduyeho.

Ati “Ubundi njye mbere yo kudoda ndabanza nkashushanya, kuri iriya kanzu si ko bimeze kuko Mutesi Jolly niwe waje anyereka ikanzu ashaka ndayimudodera. Ntabwo igishushanyo cyayo cyamvuye mu mutwe.”

Mu butumwa butandukanye bwagiye bushyirwa ku mbuga nkoranyambaga cyane kuri Twitter benshi banenze Mutesi Jolly kubera iyi kanzu abandi bavuga ko yari aberewe.

Nka @BlackLivzyagize ati “Ibintu byo kwigana ibyamamare ku Isi biri ku rwego ruhambaye urabona bizavamo? Gusa ntabwo ari ukukwendereza!”

Ubu butumwa bwakurikiwe n’ubundi bwinshi bw’abantu batandukanye nka, @ericmaverick250 wahise yandika amagambo aboneka muri Matayo 10:26 ati “Ntimukabatinye rero, kuko nta kintu gihishe kitazagaragara, nta n’igihishiriwe kitazamenyekana.”

@igor_1st we yavuze ko bigoranye kugira uwo umuntu anenga bitewe n’iyi kanzu yakozwe ikomowe ku ya Rihanna ndetse n’uko Mutesi Jolly yagiye yifotoza neza ayambaye nk’uko Rihanna yabikoraga muri MET Gala 2014.

Undi we yavuze ati “Abantu bazavuga ko batari kukwendereza cyane babikore mu buryo butangaje.”

@donrwanda we yavuze ko abantu badakwiriye kwiha Jolly kuko na Rihanna atari we wavumbuye ikanzu idozwe muri buriya buryo.

@jmvianney9 we yaninuye Jolly avuga ko ‘Iyo mukorogo yawe irarenze koko! Urebe uyigabanye cyangwa uyihagarike kuko nta cyiza kirimo kuko mu gihe kiri imbere uzahura n’ingaruka zayo.”

Ibi abihuje na @Marcellin07 wavuze ko Rihanna we imubereye kandi we isura ye ikaba isa no ku nda, mu gihe Jolly we atari ko bimeze.

@confibucyana we yashimiye Tanga wakoze iyi kanzu avuga ko ari gukora ibintu byiza bucece.

Iyi kanzu ya Mutesi Jolly yavugishije benshi
Iyi kanzu ni uku yagaragaraga Mutesi Jolly ateye umugongo gafotozi
Ikozwe mu buryo umuntu utitegereje neza yagira ngo Mutesi Jolly yari yanitse inda
Rihanna yari yambaye gutya muri Met Gala mu 2014
Mutesi Jolly yambaye ikanzu ifite imisusire nk'iya Rihanna muri Met Gala mu 2014
Iyi kanzu ya Rihanna ni yo Mutesi yakomoyeho igitekerezo cyo kwambara gutya muri Miss Rwanda uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .