Ingabire Ange Jolie yavuye muri Miss Rwanda kubera uburwayi

Yanditswe na Nsengiyumva Emmy
Kuya 17 Gashyantare 2020 saa 10:03
Yasuwe :
0 0

Mu gihe hasigaye iminsi ibarirwa ku ntoki ngo hamenyekane Nyampinga w’u Rwanda 2020 umwe mu bakobwa 20 bahataniraga ikamba yavuye mu irushanwa kubera uburwayi butatangajwe.

Amakuru yo gusezera mu irushanwa kwa Ingabire Ange Jolie yatangajwe n’abategura irushanwa babinyujije kuri Twitter ya Miss Rwanda.

Bagize bati “Ubuyobozi bwa Miss Rwanda bubabajwe no kubamenyesha ko Ingabire Ange Jolie atakibashije gukomeza irushanwa rya Miss Rwanda kubera uburwayi.”

Uburwayi bwafashe uyu mukobwa ntabwo bwakomojweho, icyakora kimwe cyemejwe neza ni uko uyu mukobwa yamaze gusezera mu irushanwa.

Mu kugerageza kumenya uburwayi bwatumye asezera mu irushanwa, IGIHE yaganiriye na Ingabire Ange Jolie, wavuze ko yasezeye kubera uburwayi.

Ati “Nararwaye bampa kujya nkurikiranwa na muganga kuko byari bikomeye, nsaba kuvamo.”

Uyu mukobwa avuga ko uburwayi bwe bwatewe no gukoresha imbaraga nyinshi ariko ntarye cyane kuko nta appétit asanzwe agira.

Ati “Nakoreshaga imbaraga nyinshi sindye cyane kubera ko nta appétit ngira.”

Uyu mukobwa wavuye mu bitaro mu gitondo cyo kuri uyu wa mbere tariki 17 Gashyantare 2020, uburwayi bwe bwatumye asiba ikizamini cyanditse cyahawe abari mu mwiherero mu ijoro ryo kuri iki Cyumweru tariki 16 Gashyantare 2020.

Iki kizamini amanota yacyo azateranywa n’ay’ibindi biteganyijwe mu minsi iri imbere bityo icumi bazagira menshi babashe guhita bakomeza guhatanira ikamba rya Miss Rwanda 2020 mu gihe abazaba bagize make bo bazaba basezerewe mu irushanwa.

Ibi bisobanuye ko abakobwa icumi bazaba bagize amanota menshi mu mikoro bari guhabwa mu mwiherero ari bo bazanyura imbere y’akanama nkemurampaka, aba bakazamenyekana ku munsi nyirizina w’irushanwa.

Ingabire Jolie Ange asezeye mu irushanwa nyuma yuko yari yaryinjiyemo atsindiye guhagararira Intara y’Amajyepfo.

Itike yakuye mu Intara y’Amajyepfo niyo yamwinjije muri Pre-Selection, aha naho yahanyuranye umucyo bituma yinjira muri 20 bagombaga kwerekeza mu mwiherero.

Uyu mukobwa asezeye muri Miss Rwanda nyuma y’icyumweru yari amaze mu mwiherero. Kuri ubu abakobwa basigaye bahatanira ikamba bakaba ari 19.

Ingabire Jolie Ange yasezeye muri Miss Rwanda 2020 kubera uburwayi
Ingabire Jolie Ange yari ahagarariye Intara y'Amajyepfo muri Miss Rwanda 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .