00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo za R. Kelly zirimo kugurwa ku bwinshi

Yanditswe na Uwiduhaye Theos
Kuya 16 Ukwakira 2021 saa 12:49
Yasuwe :
0 0

Indirimbo z’umuririmbyi Robert Sylvester Kelly[R.Kelly] nyuma yo guhamwa n’ibyaha byo gusambanya abagore n’abahungu barimo abatarageza ku myaka y’ubukure, ziri kugurwa ku bwinshi.

Ikinyamakuru Rolling Stone cyatangaje ko kugura indirimbo za Kelly byatumbagiye mu minsi ishize ubwo yahamwaga n’ibyaha byo gusambanya abagore n’abahungu ku gahato ku wa 27 Nzeri 2021.

Nyuma y’icyumweru cyakurikiye icyo yahamwemo ibyaha byo gufata ku ngufu, gucuranga indirimbo z’uyu muhanzi byavuye kuri miliyoni 11, 2 bigera kuri miliyoni 13, 4.

Mu gihe kugura album ze byazamutse bikagera kuri 517%. Indirimbo ze ziri mu buryo bw’amajwi zumvishwe ku mbuga zitandukanye ku ijanisha rya 22% ndetse no gucuranga amashusho y’indirimbo ze byiyongeraho 23% ugereranyije n’icyumweru cyabanjirije icyo yahamijwemo ibyaha.

Rolling Stone yatangaje ko akenshi iyo abahanzi bateje imbagarara aribwo ibihangano byabo bicurangwa cyane.

Iki kinyamakuru kibivuga kigendeye ku kuntu ibihangano by’umuririmbyi wa Country Music witwa Morgan Wallen, byacuranzwe cyane mu ntangiro z’uyu mwaka biturutse ku kuntu yavuzwe mu nkuru z’irondaruhu. Uyu muhanzi ibihangano bye kugurwa kwabyo kwazamutse ku ijanisha rya 1.22o%.

Urubuga rwa Youtube nirwo rwonyine rwahisemo gusiba shene za za R.Kelly zanyuzwagaho indirimbo ze. Reuters yatangaje ko uru rubuga rwatangaje ko rwakuyeho indirimbo z’uyu muhanzi waciye ibintu nyuma yo guhamwa n’ibyaha byo guhohotera abiganjemo abagore.

Youtube yakuyeho shene ebyiri z’uyu muhanzi zirimo RKellyTV na RKellyVevo ndetse akaba atazongera kwemererwa gutangiza izindi nshya. Amashusho y’uyu muhanzi yashyizweho n’abandi azakomeza kugaragara.

Guhera mu 2017 R Kelly ari mu byamamare byibasiwe biturutse ku bukangurambaga bwatangijwe n’abagore babiri bwiswe #MuteRkelly, aho bashakaga ko indirimbo z’uyu muhanzi zikurwa ku mbuga zirimo Spotify, AppleMusic, AmazonMusic n’izindi ariko kugeza uyu munsi kuri izi mbuga indirimbo ze ziracyariho.

Mu mpera za Nzeri, R. Kelly wamamaye mu njyana ya RnB yahamijwe n’urukiko rwo muri Brooklyn mu Mujyi wa New York, ibyaha birimo ibifite aho bihuriye n’imibonano mpuzabitsina yakoreye abagore barimo abatarageza ku myaka y’ubukure ndetse n’abahungu.

Uyu muhanzi yashinjwaga ibyaha bya forode, gukoresha abana imibonano mpuzabitsina, gushimuta, kwambukiranya leta zitandukanye ajyanye abagore mu bikorwa byo kubasambanya n’ibindi.

Aba bantu banyuze imbere y’abacamanza bamushinja. Muri abo bamushinjaga barimo abagore icyenda ndetse n’abasore babiri. Nubwo R.Kelly yari afite abamushinjura bigaragara ko ntacyo byatanze. Biteganyijwe ko hazatangazwa imyanzuro y’urukiko muri Gicurasi 2022; ashobora gufungwa imyaka myinshi cyangwa agakatirwa burundu.

Indirimbo za R. Kelly zirimo kugurwa n'abantu benshi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .