Indirimbo ya Kayirebwa yageze mu cyiciro cya nyuma mu irushanwa mpuzamahanga ry’abanditsi b’abahanga

Yanditswe na Nsengiyumva Emmy
Kuya 17 Werurwe 2021 saa 09:02
Yasuwe :
0 0

Umunyabigwi mu muziki w’u Rwanda, Cécile Kayirebwa ari mu byishimo bikomeye, nyuma y’uko indirimbo ye ‘None Twaza’ ishyizwe mu cyiciro cya nyuma mu irushanwa mpuzamahanga ry’indirimbo zanditse neza ‘International Songwriting Competition’ ritegurirwa muri Leta Zunze Ubumwe za Amerika.

Iri rushanwa uritsinze yegukana ibihembo bitandukanye birimo ibihumbi 25 by’amadorali ya Amerika, gukorerwa Album y’indirimbo, kufashwa kumenyekanisha birushijeho indirimbo n’ibindi.

Akimara kubona ko indirimbo ye iri mu zatoranyijwe muri iri rushanwa ryari rihatanyemo izirenga ibihumbi 26 z’abahanzi bo ku Isi yose, Cécile Kayirebwa yagaragaje ibyishimo bye abinyujije ku mbuga nkoranyambaga.

Ati ”None twaza yabikoze, ubu iri mu zihatanira igihembo cya #ISC2020, ni iby’agaciro kuba ari imwe mu ndirimbo zabashije gukomeza kuko yari ihanganye n’izindi nyinshi. Ubu ahasigaye ni ah’abagize Akanama Nkemurampaka.”

Uyu mubyeyi ariko kandi yanakomeje yibutsa abakunzi b’umuziki we ko banakomeza kumutora banyuze HANO kugira ngo azegukane igihembo cy’indirimbo yatowe n’abakunzi b’umuziki.

Nta tariki runaka izatangarizwaho abanyuma bazahatanira ibihembo yatangajwe ndetse n’umunsi wa nyuma uzamenyekaniraho abatsinze muri iri rushanwa ntabwo uratangazwa.

Ubwo batangazaga ababashije kugera mu cyiciro kibanziriza icya nyuma muri iri rushanwa, ubuyubozi bwa ‘International Songwriting Competition’ bwaboneyeho gutangaza ko bwatangiye kwakira abifuza guhatana mu ry’umwaka wa 2021.

Bamwe mu bakemurampaka b’iri rushanwa barimo abasanzwe ari abahanzi bubashywe muri Afurika nka Youssou N’Dour (Senegal) na Femi Kuti (Nigeria).

Indirimbo ya Kayirebwa yageze mu cyiciro cya nyuma mu irushanwa mpuzamahanga ry’abanditsi b’abahanga
Ibyishimo ni byinshi kuri Kayirebwa, kubera indirimbo ye yatambutse mu irushanwa mpuzamahanga ry’abanditsi b’abahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .