00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo nshya zakwinjiza muri Weekend ya mbere ya Gicurasi 2022

Yanditswe na Uwiduhaye Theos
Kuya 6 May 2022 saa 04:37
Yasuwe :

Abakurikira IGIHE by’umwihariko igice cy’imyidagaduro bamaze kumenyera ko mu mpera za buri cyumweru dukora urutonde rw’indirimbo nshya z’abahanzi zirimo iz’abakizamuka n’abamaze kubaka izina, ikigamijwe kikaba ari uguteza imbere umuziki nyarwanda.

Mu gihe turi mu mpera z’icyumweru cya mbere cya Gicurasi 2022, twakoze urutonde rw’indirimbo zishobora kugufasha kuryoherwa na yo na cyane ko indirimbo zimwe na zimwe zishobora kuba zitazwi ariko ari nziza.

Shawe ya Marina

Marina yasohoye indirimbo yuzuyemo amarangamutima y’umukobwa wanyuzwe n’ibyishimo yahawe n’umusore bakundana, amushimira ibihe byiza bagiranye ndetse amusaba ko byaba ibintu bihoraho aho kuba rimwe gusa.

Ibi biri mu ndirimbo nshya Marina yasohoye yitwa ‘Shawe’, avuga ko yayikoze mu rwego rwo kugaragaza ko n’umukobwa ashobora gushimira umusore waba wamuhaye ibyishimo, ibyo we avuga ko byihariwe n’abasore.

Ati “Ntabwo ari ibintu tumenyereye ko umukobwa ashobora kunyurwa n’ibyishimo umuhungu yamuhaye ngo aze kwibuka kubimushimira, ni kenshi twumva abasore babiririmba, bituma nibaza ngo kuki njye ntakora indirimbo nk’iyi.”

Marina yavuze ko atari we ubwe wivugaga muri iyi ndirimbo. Ati “Ntabwo ari njye wivugaga, nagiye muri studio numva nshaka kwandika indirimbo nziza haza iki gitekerezo tucyemeranyaho n’ikipe twakoranaga birangira tugikoze.”

Iyi ni imwe mu ndirimbo nyinshi Marina avuga ko yiteguye gusohora mu minsi iri imbere, cyane ko amaze iminsi acecekanye ibikorwa byo guha abakunzi be.

Miliyoni

Ni indirimbo y’urukundo y’abahanzi Ruti Joel na INKI usanzwe ari umuhungu wa Muyango. Igaruka ku musore wishimiye umukobwa akamwizeza ko kubera urwo amukunda, ubushongore bwe ndetse n’agaciro amuha azamukwa inka miliyoni.

Inkindi Loic Muyango [INKI] wahuriye mu ndirimbo na Ruti, ni umuhungu wa Muyango Jean Marie umaze igihe gito yinjiye mu muziki mu buryo bw’umwuga nyuma y’igihe ashaka aho yamenera.

Mu kiganiro yagiranye na IGIHE mu minsi yashize yavuze ko yakuze yiyumvamo umuziki ndetse ibyo kwiga ntabe aribyo bintu ashyira imbere cyane, agahitamo gukora akazi gatandukanye mu Bubiligi ari nako ashaka uko yatangira umuziki.

Aririmba Pop ivanze na RnB ibintu avuga ko byamujemo kubera ko yakuze akunda abahanzi barimo Craig David, Corneille ndetse na Justin Timberlake.

Ikimata

Ni indirimbo ya Seleman Dicoz ukorera umuziki mu Bubiligi. ‘Ikimata’ igaragaza umuntu wihebeye undi burundu ku buryo nta wundi wamugera ku nzoka. Mu kiganiro yagiranye na IGIHE, Seleman Dicoz yavuze ko iyi ndirimbo kuyihimba byaturutse ku mugore we.

Ati “Guhimba iyi ndirimbo nabikuye ku mufasha wanjye kandi nkaba nsaba umuntu wese ufite uwo yihebeye kuyigira iye. Iyi ni indirimbo ya kabiri kuri album ndi gutegura kandi uyu mwaka nkaba mfite gahunda yo gukora cyane no gutaramira abakunzi banjye dore ko hashize igihe tudataramana.”

Seleman Dicoz ubusanzwe yitwa Uwihanganye Selemani arubatse ndetse afite n’abana babiri. Iyi ndirimbo ye nshya ifatwa ry’amashusho ryayo ryayobowe na Julien Bmjizzo mu gihe amajwi yakozwe na Li John muri Stotykast Record.

Seleman Dicoz yatangiye umuziki mu 2007, amenyekana mu ndirimbo nka ‘Kiberinka’, ‘Pommes’, ‘Mille’ yakoranye na Lolilo, ‘Kamwe’ yakoranye na Washington, ‘Nikupende’ n’izindi nyinshi.

Joli

Ni indirimbo nshya y’umuhanzi Kenny Sol irimo ubutumwa bw’urukundo. Igaruka ku musore wanyuzwe n’umukobwa bakundana. Ije ikurikira indi uyu musore yaherukaga gushyira hanze yise “Forget”.

Ineza yayo

Ni indirimbo ya The Bright Five Singers bafatanyije na Nicole Irakoze na Ingabire Ndinda Marie Ange. Yahimbwe na Mugabe Jean Jacques Bertrand uri mu batangije The Bright Five Singers ariko ubu wagiye gukomereza ubutumwa muri Leta zunze ubumwe za Amerika (USA).

Imbaraga

Imbaraga ni indirimbo Izack Mucyo yakoranye n’umucuranzi witwa Musabwa. Indirimbo yaje ubwo aba bahanzi bombi bari muri studio bari kuganira kuri umwe mu nshuti bari bafite y’umuhanzi itagikora umuziki uhimbaza Imana.

Izack Mucyo wakoze iyi ndirimbo ubusanzwe afite izindi ndirimbo zirimo ‘I will wait’ yakoranye na Gisa Cy’Inganzo, ‘Nshizamanga’ na ‘Mwabindimo’ yakoranye na Bishop Gafaranga na Martin Pro.

Long Time

Ni indirimbo ya Dj Classic. Igaruka ku musore uba yizeza umukobwa ko azamuba hafi kandi ko ibyo kujarajara yabiretse ahubwo akeneye umukunzi umwe bazakundana igihe kinini.

Uyu musore ubusanzwe yitwa Ngiruwonsanga Jean, akaba akoresha mu muziki Dj Classic. Ubusanzwe abarizwa mu Mujyi wa Helsinki muri Finland aho amaze imyaka ikabakaba 12. Asanzwe ari umu-Dj. Yatangiye umuziki mu 2011 aza kuwuvamo agaruka mu 2016.

Nzashimira Umwungeri

Ni indirimbo ya Eastern Singers iyi ije i kurikira izabanje nka ‘Yezu ndamira’ na ‘Mubyeyi mwiza’. ‘Nzashimira umwungeri’ ni i ndirimbo ikubiyemo ubutumwa bwo gushimira Imana, yanditswe na Leonard Minani uri mu baririmbyi b’iri tsinda. Amajwi yayo yatunganyijwe na Emmy Pro naho amashusho atunganywa na Aimé Pride babarizwa muri studio yitwa Universal Record.

Nyoola

Ni indirimbo nshya y’umuhanzi Bruce Melodie na Eddy Kenzo.
Iyi ndirimbo Bruce Melodie yayimurikiye abantu be ba hafi mu ijoro ryo ku wa 27 Mata, anahita ayishyira hanze muri iryo joro. Eddy Kenzo wari uhari indirimbo imurikwa yavuze ko we na Bruce Melodie hari ibikorwa byinshi bari guteganya gukorana birimo no guhurira mu bitaramo mu rwego rwo kumenyekanisha indirimbo ze.

Kunda Umurimo

‘Kunda umurimo’ ni indirimbo y’umuririmbyi Twizerimana Floduard ukoresha amazina ya Limu yahuriyemo n’Umuraperi Fireman. Limu yabwiye IGIHE ko iyi ndirimbo yayihimbye ashaka gukebura abumva ko hari imirimo isuzuguritse.

Limu ubusanzwe avuka mu muryango w’abanyempano mu buryo butandukanye, barimo abaririmbyi, abanditsi n’abacuranzi b’umuziki nyarwanda. Muri abo banyempano bavukana na Limu harimo Intore Tuyisenge.

Twerk

Ni indirimbo y’abaraperi Soldier KID na Bruce The 1st. Iyi ndirimbo ivuga ku mukobwa uzi kuzunguza ikibuno bigatinda ari kubyina bigashimisha abasore. Mu buryo bw’amajwi yakozwe na Bailey Prod naho amashusho akorwa na Dir. Wade.

Aba basore bahuriye muri iyi ndirimbo bose ni abahanzi bakizamuka. Soldier KID ubusanzwe yitwa Mugisha Landry akora injyana ziganjemo Drill Music. Uyu yavutse mu 2003 yavukiye ku Muhima mu Mujyi wa Kigali. Ni imfura mu bana babiri.

You

Ni indirimbo nshya y’umuhanzi Ruti Joël. Igaruka ku musore uba abwira umukobwa ko yamwihebeye. Akamubwira ko ari ko yabaye kandi nta kindi yabikoraho, ati “Reka ngukunde, uri byose nshaka.”

Ayden

Ni Extended Play [EP] nshya ya DJ Toxxyk. Iriho indirimbo eshanu zirimo Tattoo yakoranye na Ariel Wayz, Away yakoranye na Peace Jolis, Single yakoranye na Juno Kizigenza, Taxi yakoranye na Memo na BMW yahuriyemo na Maestroboomin na Angell Mutoni.

Ushaka kumva iyi EP wakanda hano: https://azuri.lnk.to/Ayden

Soda

Ni indirimbo nshya Dj Fiddo yahurijemo Afrique na Okkama bari mu bahagaze neza mu muziki nyarwanda. Ni indirimbo igaruka ku mukobwa uteye amabengeza urangaza buri wese kandi by’umwihariko akaba atari umusinzi yinywera soda gusa.

Mu buryo bw’amajwi iyi ndirimbo yakozwe na Niz Beatz mu gihe amashusho yakozwe na Eazy Cuts muri Big Team.

Amabanga

Ni indirimbo nshya ya Bertrand Muheto [B Threy] igaruka ku kuntu abantu benshi babitse amabanga ku buryo ibyo bakora byose baba barenzaho. Hari aho aririmba ati “Imitwe ibitse amabanga, imitima yacu yuzuye agahinda, dufite byinshi byo gutsimba [byo guhisha] nyuma tukarenzaho tugasinda.”

Summer Body

Ni indirimbo y’umuhanzikazi Nessa. Ni indirimbo y’ikirori cyane cyane ko tugiye kwinjira mu bihe by’impeshyi mu minsi iri imbere. Uyu muhanzikazi yumvikana asaba abantu kumwiyungaho bakajya mu kirori.

Nyosho

Ni indirimbo nshya ya Papa Cyangwe na Social Mula. Igaruka ku musore uba usaba umukobwa ko yamuha umwanya ariko akamubwira atagamije urukundo rwo kurushaka ahubwo ari urwo kwishimisha.

Mu buryo bw’amajwi indirimbo yakozwe na Element muri country Recordz mu gihe Mix And Mastering yakozwe na Bob Pro. Amashusho yayo yayobowe na 2SAINT. Make Up yakozwe na Mio Beauty.

Yesu

Ni indirimbo ya Gisubizo Ministries ishami ryo mu Mujyi wa Rubavu. Ni indirimbo yo gushima Imana ku bw’imirimo yakoze. Hari aho baririmba bati “Yesu mwana w’Intama, uri uwo kwiringirwa iteka [...] Shimwa ko wemeye kunyitangira urukundo n’imbabazi wangiriye ntabwo nari mbikwiriye.”

Nāmani

Ni indirimbo igaruka ku nkuru y’umugabo witwa gutyo igaragara muri Bibiliya Yera mu gitabo cya 2 Abami 5:1-27. Yahimbwe na Goshen Choir ADEPR Kibagabaga.

Uko ngusabira

Ni indirimbo y’umuramyi Elie Bahati yahuriyemo na Fabrice Intare Batinya. Bahati asanzwe asengera muri ADEPR Rubavu. Iyi ndirimbo ye nshya igaruka ku gushima Imana mu bihe byiza n’ibibi.

Iyi ndirimbo ye nshya iri kuri album yise ‘Nzakomeza’ yagiye hanze ku wa 1 Werurwe 2022. Iyi album iriho indirimbo 15.

Let’s Go

Ni indirimbo nshya ya Bulldog. Igaruka ku gukangurira urubyiruko n’abandi bantu kwiteza imbere kugira ngo ubuzima bwabo bube bwiza nk’ubw’abandi bamamaye barimo Ye, Jet Li na Luka Modrić.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .