00:00:00 IGIHE NETWORK KN KINYARWANDA EN ENGLISH FR FRANCAIS

Indirimbo nshya za Weekend ya kabiri ya Kamena 2022

Yanditswe na Uwiduhaye Theos
Kuya 11 June 2022 saa 01:33
Yasuwe :

Mu mpera za buri Cyumweru IGIHE yiyemeje gukora urutonde rw’indirimbo zitandukanye nshya z’abahanzi yaba abakizamuka ndetse n’abamaze kubaka izina.

Ni gahunda igamije guteza umuziki nyarwanda imbere. Ni urutonde rukorwa nta kindi gikurikijwe ahubwo ari ukureba gusa indirimbo yasohotse. Ubu twakusanyije indirimbo ziheruka twabashije kubona.

Ngushime nte Dawe

Ni indirimbo ya Modeste Nshimyumukiza yahuriyemo na Theophila Umutoni, Denys Nyituriki na Pacifique Umuhuza.

Igaruka ku bibazo abantu bahura nabyo buri munsi bageze aho bashobewe ariko Imana igatabarana ingoga n’ubwo baba ari abanyabyaha ariko ntihwema kubagirira neza no kubakunda no kubabarira .

Modeste Nshimyumukiza yavuze ko ari inkuru y’ibyamubayeho.

Ati “Nayitekereje nyuma yo gusubiza amaso inyuma nkareba aho navuye naho ngeze mu gihe nibukagaga Mama umbyara umaze imyaka 19 yitabye Imana akaba yaritabye Imana tariki 09 Kamena 2003. Bwari ubuzima bukomeye nk’ubwo izindi mfubyi zose zinyuramo gusa nsubije amaso inyuma nsanga Imana yarahabaye.”

Bikiramariya, Agaseke keza

Ni indirimbo ya Clementine Umutesi usanzwe ari umwarimukazi mu Ishuri rya Ecole Notre Dame des Anges i Remera.

Yabwiye IGIHE ko iyi ndirimbo yayihimbye ashaka gufasha abantu bakunda Bikiramariya wibarutse Yezu.

Ati “Nashakaga gufasha benshi bamukunda, kandi ajye anansabira kuba umuhanzi ufasha abandi kwishima ndetse no gusingiza lmana. Bikiramariya ni Akabando gasindagiza abakicumba, ni Agaseke keza

Yavuze ko yifuza gukora indirimbo nyinshi zifite ubutumwa bufasha abantu b’ingeri zose.

Ubucurabwenge

Ni indirimbo y’umuhanzi Sam Muvunyi umenyerewe mu ndirimbo zo guhimbaza Imana aho yatangiye no gukora mu nganzo mu njyana Gakondo.
Aganira na IGIHE yatubwiye ko umuco ari umurage abanyarwanda bose basangiye kandi ko abahanzi aribo bakwiye gufata iya mbere mu kwimakaza umuco n’indangagaciro zawo.

Jambo

Ni indirimbo nshya ya Korali Elayono ikorera umurimo w’ivugabutumwa rinyuze mu ndirimbo zihimbaza Imana yo muri ADEPR Remera, imaze igihe iri gukora cyane mu kubwiriza ubutumwa bwiza bw’inkuru ya Yesu Kirisitu.

Iyi ndirimbo irimo ubutumwa bwo kugaragaza ko abiringiye Imana yabahaye ubushobozi bwo kwitwa abana bayo, kuko yahozeho kera kandi izahoraho n’ubwo yaje mu isi ab’isi ntibayemere.

Komera

Ni indirimbo ya Dusabe Gentille Mutabazi [Miss Dusa], usanzwe ari mushiki wa Gentil Misigaro. Irimo ubutumwa bwo guhumuriza abantu bari mu bibazo ababwira ko bakwiriye kwiringira Imana kandi bagakomera kuko Imana ari byose.

Miss Dusa ni umwana wa gatanu mu muryango w’abana batandatu (abahungu bane n’abakobwa babiri). Gentil Misigaro ni we mfura mu muryango wabo, hanyuma we akaba umuhererezi mu bakobwa.

Avuga ko we na Gentil Misigaro bateye kimwe mu mico no mu myitwarire, ati “Duteye kimwe mu myumvire n’imyifatire wasanga ari nayo mpamvu twitiranwa”.

Yavuze ko ubwo yari afite imyaka icyenda y’amavuko ari bwo yatangiye kuririmba, gusa atangira kwandika indirimbo ku myaka 16 y’amavuko.

Nitaimba
Ni indirimbo ya Healing Worship Team igaruka ku gushimira Imana ku bw’ubuntu igirira abantu. Ikindi aba bahanzi bavuga ko bazaririmbira Imana mu gihe bazaba bagihumeka batitaye ku miraba n’amakuba barimo.

Ubukwe

Ni indirimbo ikozwe mu buryo bwo gufata amashusho Live. Ni iya La Source Choir y’i Rubavu.

Umutoza w’iyi korali Bahati Gedeon, yavuze ko ikubiyemo ubutumwa bwo kwibutsa abantu ko ubuhanuzi bwose bwerekeye kugaruka kwa Yesu bumaze gusohora, ubukwe bw’umwana w’intama bwegereje

Ati "Ni indirimbo twakoze twibutsa abantu ko bagomba kwitegura gusanganira umukwe, bitunganya bamesa ibishura byabo ndetse tubabwira ko ari umugisha ukomeye kuzataha ubwo bukwe kandi hahiriwe abatorewe ubwo bukwe bw’umwana w’intama."

Akomeza agira ati "Duhumuriza abantu tubabwira ko umukwe azaduhanagura amarira yose twaririye muri iyi isi kandi ko tuzanezeranwa nawe ibihe bidashira."

Ndakwizeye
Ni indirimbo y’umuramyi Patrick Byishimo, igaruka ku kugaragariza abantu ko bakwiriye kwizera Imana bakayishingikiriza kurusha ibindi byose batekereza.
Patrick Byishimo atuye muri Canada, yakoze izindi ndirimbo zirimo ‘Najua’ yatangije urugendo rwe rw’umuziki, ‘Yesu aranzi’ yakoranye na Gentil Misigaro, ‘Unyuhagire’, ‘Shirubwoba’, ‘Ubuntu bwawe’ n’izindi.

Ni indirimbo yitezeho ko izagera kure kandi izakiza imitima ya benshi ihindukire imenye Imana.

Uyu musore w’imyaka 24 avuga ko afite inzozi z’uko imitima ya benshi izamenya Imana biciye mu mpano Imana yamuhaye. Uyu muhanzi avuka mu muryango w’abana umunani, abahungu bane n’abakobwa bane, batuye muri Canada.

Yatangiye gukorera Imana kuva mu 2014 ari mu Mujyi wa Nairobi muri Kenya ari nabwo yasohoye indirimbo ye ya mbere yise “Najua Alimaliza”.

Byishimo Patrick uzi gucuranga piano na gitari, yaririmbye muri korali zitandukanye afasha benshi batandukanye mu miririmbire ari nako yandika indirimbo ze mu bitabo.

Afite intego yo gufasha abakiri bato kumurika impano zabo mu muziki, kuvuga ubutumwa bwiza bw’Imana, gufasha abababaye n’ibindi.

Indege

Ni indirimbo y’umuhanzi Uwitonze Eric ukoresha mu muziki amazina ya King Ohallah. Igamije gususurutsa abantu. King Ohallah amaze imyaka irindwi mu muziki.

Uyu muraperi w’imyaka 25 yize “Electronics and telecommunication” kuri Apade Kicukiro.

Buri kimwe
Ni indirimbo ya Yassin Indistizo na Kenny K-Shot. Irimo ubutumwa bwo kwizeza umukunzi wawe ko uzamuba hafi kuko wamwihebeye bitewe n’uko ateye n’imyitwarire ye.

Yassin Indistizo wahimbye iyi ndirimbo asanzwe abarizwa muri Trapish Gang ya Ish Kevin.

Uyu musore yatangiye umuziki mu 2015 ariko mu 2018 aba aribwo atangira kuwukora by’umwuga asoje amashuri yisumbuye. Yakuriye mu Mujyi wa Kigali i Nyamirambo.

Yize amashuri abanza muri Camp Kigali ayisumbuye ayakomereza muri King David Academy.

No
Ni indirimbo ya Osama Massoud Khaled ukoresha mu muziki izina rya Okkama.

Iyi ndirimbo igaruka ku musore ubwira umukobwa kutagira abandi bahungu aha umwanya ahubwo akaba ariwe yitaho.

Okkama wayikoze afite imyaka 21. Yize amasomo y’umuziki, mu ishuri rya muzika rya Nyundo.

Ni imfura mu muryango w’abana batanu, Se ni umwarabu ukomoka muri Oman nubwo hari imirimo akorera mu Rwanda, naho Nyina akaba umunyarwandakazi.

Kigali Ngari

Ni indirimbo nshya ya Juno Kizigenza na Kid Gaju.

Indirimbo igaruka ku musore wasohokanye n’umukunzi we, akanywa agasinda akibagirwa ko bari kumwe agatangira kujya mu bandi bakobwa. Kid Gaju yaherukaga indirimbo mu 2019 ubwo yashyiraga hanze iyo yise “Nzirikana”.

Lonely

Ni indirimbo yahuriyemo Isimbi Dee na Bushali. Aba bahanzi baba baririmba ukuntu ubuzima hari igihe busharirira umuntu kandi abandi babona ameze neza inyuma.
Isimbi Dee washyize hanze iyi ndirimbo ni umwe mu bahanzikazi bakiri kuzamuka. Iyi ndirimbo ye nshya iri kuri album yitegura gushyira hanze.

Yaherukaga gushyira hanze iyo yise “Umbabarire”.
Isimbi Dee afite imyaka 23. Yatangiye umuziki mu 2013, avuga ko intego nyamukuru ye mu muziki ari ugukora akerekana imbaraga z’umukobwa mu ruhando rwa muzika.

Miliyoni

Ni indirimbo y’urukundo y’abahanzi Ruti Joel na INKI usanzwe ari umuhungu w’umuhanzi Muyango wamenyekanye cyane mu muziki nyarwanda hambere.

Igaruka ku musore wishimiye umukobwa akamwizeza ko kubera urwo amukunda, ubushongore bwe ndetse n’agaciro amuha azamukwa inka miliyoni.

Mu kiganiro yagiranye na IGIHE mu minsi yashize, INKI yavuze ko yakuze yiyumvamo umuziki ndetse ibyo kwiga ntabe aribyo bintu ashyira imbere cyane, agahitamo gukora akazi gatandukanye mu Bubiligi ari nako ashaka uko yatangira umuziki.

Aririmba Pop ivanze na RnB ibintu avuga ko byamujemo kubera ko yakuze akunda abahanzi barimo Craig David, Corneille ndetse na Justin Timberlake.

Akanyenga

Ni indirimbo nshya y’umuhanzi Afrique. Igaruka ku musore uba uri kureshya umukobwa. Ije ikurikira izirimo ‘Rompe’, ‘Agatunda’ yatumbagije izina rye n’izindi.

Afrique wahimbye iyi ndirimbo ubusanzwe ni umusore w’imyaka 20. Amazina ye asanzwe ni Kayigire Josue, yavukiye i Gikondo mu Mujyi wa Kigali. Avuka mu bana batatu kuri se na nyina ariko kuri se hari undi mwana umwe bavukana.

Aye

Ni indirimbo nshya ya Juno Kizigenza yahuriyemo na DJ Rusam na Higa basanzwe mu itsinda bavangiramo imiziki. Higa Sharon w’imyaka 23 na Nadege Rusamaza wa 25, bamaze igihe gito binjiye mu mwuga wo kuvanga imiziki.

Aba bakobwa batangiye ari ababyinnyi, ni yo ndirimbo ya mbere bumvikanyemo bayihuriyemo n’umuhanzi uwo ariwe wese.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .