Indirimbo nshya ya Riderman, yatumye Miss Jolly Mutesi asaba kwinjira mu Ibisumizi

Yanditswe na Nsengiyumva Emmy
Kuya 23 Mutarama 2021 saa 06:35
Yasuwe :
0 0

Indirimbo nshya ya Riderman ‘Icupa ry’imiti’, yatumye Miss Jolly Mutesi afata icyemezo cyo gusaba kwinjira mu itsinda ry’abafana b’uyu muraperi, ‘Ibisumizi’, anahishura ko asanzwe ari umufana ukomeye w’umuziki we.

Nyuma yo kumva iyi ndirimbo, Miss Jolly Mutesi abinyujije ku rukuta rwe rwa Instagram yasabye umugore wa Riderman kumuvuganira bakamushyira mu itsinda ry’abafana b’uyu muraperi.

Ati “Ndi umufana ukomeye, niba hari n’amarangi muzayampe nisige, Nadia Farid Ishmael (umugore wa Riderman) muzanshyire mu itsinda ry’Ibisumizi.”

Ubusabe bwa Miss Jolly Mutesi bwakiriwe neza n’umugore wa Riderman, ahita asaba ababishinzwe kumwongera mu itsinda ry’abafana b’uyu muraperi.

Mu kiganiro na IGIHE, Miss Jolly Mutesi yavuze ko asanzwe ari umukunzi w’umuziki wa Riderman.

Uyu mukobwa wakunze kumvikana nk’umufana wa Bull Dogg yaje guhishura ko nubwo nawe akunda umuziki we, Riderman ari umwami wa Hip Hop mu Rwanda.

Umwe mu bayobozi b‘itsinda ry’abafana ba Riderman twaganiriye, yatubwiye ko bagiye gushaka uko baganira na Miss Jolly Mutesi bakamwongera mu Ibisumizi ndetse akazanahabwa n’ikarita y’umunyamuryango.

Indirimbo ‘Icupa ry’imiti’ yatumye Miss Jolly Mutesi yemera ndetse agahishura amarangamutima ye ku muziki wa Riderman, ikubiyemo ubutumwa bw’umusirikare wagiye ku itabaro atunguwe ntabashe kumenyesha umukunzi we, bityo akamusigira ubutumwa mu icupa ry’imiti yatabye munsi y’igiti.

Riderman yavuze ko nubwo iyi ndirimbo irimo amagambo y’inkuru mpimbano, yigisha urubyiruko gukunda igihugu no gukomeza kurutoza umuco wo kwitangira igihugu mu gihe byaba bibaye ngombwa.

Iyi ndirimbo nshya ya Riderman ni imwe mu zigize album nshya yise ‘Kimirantare’ amaze igihe kinini akoraho.

Miss Mutesi Jolly yahishuye ko ari umukunzi ukomeye w'umuziki wa Riderman
Indirimbo 'Icupa ry'imiti' ya Riderman yatumye Miss Jolly Mutesi asaba kwinjira mu Ibisumizi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .