00:00:00 IGIHE NETWORK KN KINYARWANDA EN ENGLISH FR FRANCAIS

Imvano y’indirimbo ’Agaca kabiciye’ bivugwa ko Rugamba yahimbiye Perezida Habyarimana

Yanditswe na Cyprien Niyomwungeri
Kuya 7 June 2022 saa 07:14
Yasuwe :

’Agaca kabiciye’ ni indirimbo y’umuhanzi w’umuhanga, Rugamba Cyprien benshi bakunda guhuza n’amateka y’u Rwanda. Hari abavuga ko agaca kisenuye ku butaka yaririmbye ari Perezida Juvénal Habyarimana, warashwe ku wa 6 Mata 1994, we n’abo bari kumwe mu ndege bagapfa.

Rugamba hari abamwita umuhanzi w’umuhanuzi, ibi bakabihuza no kuba mu ndirimbo Agaca kabiciye yaraburiraga Habyarimana amubuza gukomeza kwica abantu no kubagirira nabi kandi agakebura abarenganya abandi n’abafite inda nini.

Mu gushaka kumenya imvano y’iyi ndirimbo, twaganiriye na Padiri Rutinduka Laurent usobanukiwe cyane amateka ya Rugamba ndetse tunifashisha igitabo yamwanditseho cyitwa ’Rugamba Sipiriyani, Umuhanzi w’umuhanga’ cyasohotse mu 2004.

Padiri Rutinduka yavuze ko akora ubushakashatsi kuri iyi ndirimbo yabwiwe ko yahimbwe ubwo mu gihugu hari ubwicanyi bwibasira Abatutsi. Hari abavuga ko yahimbwe mu 1991 ubwo hicwaga Abagogwe n’abavuga ko yahimbwe mu 1992 ubwo hicwaga Abatutsi mu Bugesera. Gusa iyi ndirimbo yasohotse mu 1993.

Padiri Rutinduka ati "Imbarutso yayo ni ukwamagana ubwicanyi no kuburira abantu ko uwica bitamugwa amahoro. Rugamba yabonaga bizarangira nabi. Ntiwakwica abantu kuriya ngo birangirire aho".

Kuba hari ababihuza n’ubuhanuzi bw’urupfu rwa Habyarimana, Padiri Rutinduka avuga ko bifite ishingiro kuko Agaca Rugamba yavugaga yari ’MRND’ yari ikuriwe na Habyarimana umwambi wa tariki 6/04/1994 uba uramwahuranyije yisenura i Kanombe.

Agaca ni ubwoko bw’igisiga bukunda inyama ariko cyane cyane bukaryoherwa n’iy’inkoko. Inkoko karayicakira kakayishinga inzara, kakayishwanyaguza, kakayigurukana kakayirira mu giti, ku mugina, mu nzira n’ahandi.

Mbere yo kuyifata kabanza gutamba mu kirere, kakigengesera, kakabyina mu gicu kareba hasi ko hari igitamba. Kabikora kitonze kuko kazi ko ari akagizi ka nabi kandi ko nako bagahiga. N’iyo kabonye imbeba cyangwa umuserebanya hasi ntikabirebera izuba.

Rugamba mu ndirimbo ’Agaca kabiciye’ akagaragaza gashyize imbere inda yako. Karabyina atari ukwishima ahubwo ni bwo buryo bwako bwo guhiga. Ubwenge rero buba buke iyo icyo ugamije ari ukurya no kwigusha neza utazi ko hari amategeko abigenga.

Mu gitabo cya Padiri Rutinduka, avuga ko iyi ndirimbo ihimbwa yari igenewe buri muntu wese kuko ari nko gukebura no kubuza abantu gukora ikibi. Yibutsa kandi ko ugize nabi bimugaruka.

Iki gitabo kigira kiti "Buri muntu wese Rugamba yamuriye akara ati ’huguka, ba maso, menya Imana, reba umuco icyo utubwira, kunda mugenzi wawe uhore umurengera kuko uramushinzwe".

Rugamba kandi yamaganaga kurya iby’abandi, kwandavura, kwica abo ushinzwe kurinda, kwica abo uje usanga, kubeshya abantu ngo urabayobora, kwibagirwa abo musangiye igihugu ndetse ukabaroha ishyanga ngo bazagweyo, ruswa n’ibindi bibi.

Mu ndirimbo Agaca kabiciye, inkoko zizeye ko zirinzwe na shebuja na rusake kandi na bo inda yabakubye, bahari badahari umwe ari ku marwa undi ari mu bishinzwe no mu bisinde.

Ku byabaye ku mushwi, Rugamba yashatse kwigisha ko abatagira kivurira ’ari abacu tubarengere bose kandi twamagane icyabagwirira cyose’.

Padiri Rutinduka avuga ko inyigisho iri muri iyi ndirimbo ari uko agaca kafashe wa mushwi karawuzira, nyir’urugo yarakarashe kisenyura ku butaka kazize inda nini. Nyir’inkoko na we yabuze itungo kubera gusuzugura no kutita ku bintu, arangajwe no kuzuza inda ye. Iyi nda nini Rugamba yavugaga ni yo yasenye igihugu kubera uburangare, umururumba n’ubugome.

Umva indirimbo ’Agaca kabiciye’

Rugamba yari umuhanzi w'umuhanga, aha ari kumwe n'umugore we Daphrose Rugamba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .