00:00:00 IGIHE NETWORK KN KINYARWANDA EN ENGLISH FR FRANCAIS

Impungenge zikomeje kwiyongera mu buyobozi bw’irushanwa rya Mr Rwanda ritarakomorerwa

Yanditswe na Nsengiyumva Emmy
Kuya 10 June 2022 saa 09:38
Yasuwe :

Irushanwa rya Mr Rwanda riri mu mayira abiri nyuma y’iminsi risubitswe ariko icyizere cyo gusubukurwa kikaba gikomeje kuyoyoka cyane ko hari igihe inzego zarisubitse zishobora kurisubukura ritakibashije gukomeza kubera ibindi bibazo byaba byamaze kurivukamo.

Amakuru IGIHE ifite ni uko ubuyobozi bwa Mr Rwanda buhangayikishijwe bikomeye no kuba iri rushanwa rishobora guhagarara bitewe n’uko abaterankunga baryo barambirwa igihe rimaze risubitswe.

Izi mpungenge zikomeje kuzamuka mu gihe mbere y’uko hamenyekana 18 bagombaga kujya mu mwiherero, nabwo havuzwe kuba abaterankunga bari batangiye ibiganiro n’abaritegura bashaka gukuramo ayabo kuko nabwo icyo gihe ryari ryaragiye ritinda.

Icyakora bitewe n’uko gutinda ku iri rushanwa kwaterwaga n’icyorezo cya Covid-19, abaterankunga baryo baje gucururuka rirakomeza.

Nyuma yo kuzenguruka Intara zitandukanye hashakishwa abasore bazazihagararira mu irushanwa rya Mr Rwanda 2022, ku wa 1 Gicurasi 2022 nibwo hamenyekanye abasore 18 bagombaga kujya mu mwiherero.

Mu gihe abategura irushanwa bari bamaze gukusanya ibisabwa ngo umwiherero utangire ku wa 8 Gicurasi 2022 cyane ko irushanwa ryagombaga kurangira ku wa 14 Gicurasi 2022, bamenyeshejwe n’Inteko y’Umuco ko bakwiye kuba barisubitse.

Iki gihe bamenyeshejwe ko hari ibyo bagomba kubanza kwigaho ndetse irushanwa rigahabwa umurongo urushijeho kubonera.

Mu gihe ubuyobozi bwa Imanzi Agency itegura iri rushanwa bwarihagarikaga bwari bwijejwe ko bugiye gukorana n’Inteko y’Umuco rigahita risubukurwa bidatinze.

Icyakora nk’uko Byiringiro Moses uyobora iyi sosiyete itegura Mr Rwanda yabibwiye IGIHE ngo nubwo bakoranye inama nyinshi n’ubuyobozi bw’Inteko y’Umuco ndetse byinshi bigashyirwa ku murongo, ntabwo baramenya igihe bazasubukurira ibikorwa.

Ati “Twakoranye inama nyinshi ndetse byinshi mu byo bashakaga twarabikoze baranadufasha, icyakora ikijyanye no kumenya igihe tuzasubukurira cyo ntacyo tubiziho kuko batubwiye ko tugomba gutegereza.”

Byiringiro yongeyeho ko batewe impungenge no kuba irushanwa rikomeje gutinda kuko bashobora no guhabwa uburenganzira bwo kurisubukura bitagishobotse ko rikomeza bitewe n’impamvu nyinshi.

Ati “Biragoye kubivugaho nk’ubu umufatanyabikorwa watugana yifuza kumenya ikijya imbere nta gisubizo dufite cyo kumuha, turategereje ni cyo gusa cyo kuvuga dufite. Ariko ku rundi ruhande we kuba yadufasha gutegereza hejuru y’amafaranga ye byaba bigoye.”

Byiringiro avuga ko bafite impungenge z’uko hari umuterankunga wakwikura mu gikorwa cyane ko byagira ingaruka ku migendekere y’irushanwa.

Ati “Kugira ngo irushanwa rigende neza twifashishije abafatanyabikorwa badufashije gushoramo amafaranga, ariko ikigaragara bashobora kutwisubira kuko nta cyizere bari kubona. Icyo gihe bishobora kugira ingaruka ku irushanwa byanze bikunze.”

Ku rundi ruhande hari amakuru yizewe ahamya ko igihe iri rushanwa ryaba rihagaritswe ubuyobozi bwa Imanzi Agency iritegura bwaba buhombye byibuza atari munsi ya miliyoni 20 Frw bamaze kurishoramo.

Uretse aya ariko kandi haba hahombye ama miliyoni atari make y’Abanyarwanda batoye abasore mu matora yabafashije gukomeza mu byiciro bitandukanye byo gushakisha abasore 18 bagombaga kujya mu mwiherero.

Umwe mu bakozi b’Inteko y’Umuco uherutse kuganira na IGIHE yavuze ko hari ibyo bari kunoza ndetse ahamya ko igihe cyose byaba byarangiye bahita baha uburenganzira Imanzi Agency igakomeza igikorwa cyayo.

Uyu yanavuze ko bari bari gukoresha imbaraga nyinshi kugira ngo iri rushanwa barifashe gukomeza vuba kuko ibyo basabwaga bitasabaga akazi kenshi.

Icyakora ku rundi ruhande, uyu mukozi ntabwo yigeze ahamya igihe bateganya kuba bakomorera iri rishunwa.

Ubuyobozi bwa Mr Rwanda buhangayikishijwe n'uko iri rushanwa rishobora gukomorerwa ritakibashije gukomeza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .