00:00:00 IGIHE NETWORK KN KINYARWANDA EN ENGLISH FR FRANCAIS

Impaka z’urudaca nyuma yo kugaruka i Kigali kwa Turahirwa wa Moshions

Yanditswe na Nsengiyumva Emmy
Kuya 20 Mutarama 2023 saa 01:03
Yasuwe :

Impaka ni zose nyuma yo kugaruka mu Rwanda kwa Turahirwa Moses washinze inzu y’imideli ya Moshions, umaze iminsi asohoye amashusho amugaragaza akora imibonano mpuzabitsina n’abandi bagabo.

Hari abatangiye gusaba ko yagezwa mu butabera ku byaba by’urukozasoni nkuko biri mu mategeko ahana ibyaha mu Rwanda.

Ni impaka zongeye kubyuka nyuma y’uko Turahirwa ageze i Kigali nyuma y’iminsi yari amaze ari mu Butaliyani ari naho aya avuga ko aya mashusho yafatiwe mbere y’uko ashyirwa hanze mu buryo avuga ko bwamutunguye.

Abakoresha imbuga nkoranyambaga bayasamiye hejuru, bamwe bahamya ko Turahirwa akwiye guhita agezwa imbere y’ubutabera mu gihe hari abandi batabikozwa.

Uwiyise Teacher Eddie yagize ati “Moses Turahirwa Moshions agarutse mu Rwanda, ese mubona akwiye gufungwa cyangwa bamureke?”

Ni impaka yari azamuye maze uwiyise Ishimwe Colonel agira ati “Kereka bamufungiye aha wenyine, kuko agiye mu bandi bagororwa yabigisha imico mibi.”

Uwiyise Kavukire we yagize ati “RIB ntifunga igitsinagabo cyiyambitse ubusa, rero tuvire kuri Moses.”

Vivance we yavuze ko “Yakabaye yafatiwe ku kibuga cy’indege.”

Semuhungu Eric we yagize ati “Nta bwenge bubirimo, afungwa se yakoze iki?”

Mu gusubiza Semuhungu, uwiyise The Silent Truth we yagize ati “Yagaragaje ibikorwa by’urukozasoni ku karubanda, mu ruhame nicyo yazira, naho kuba aryamana n’abo bahuje ibitsina byo ni ubushake bwe. Gusa nizere ko na we biriya yagaragaje utarabikora, wakagombye kumuha inama yubaka.”

Undi wiyise Analyser & Teacher we yagize ati “Mwaramutse, bamufuga gute se kandi nta tegeko rihana abaryamanye bahuje ibitsina? Ahubwo yongere ashinge n’izindi sosiyete zitandukanye hano hirya hose mu duce two mu Rwanda ibyo kumufuga byo byibagirwe.”

Uwitwa Emma Musa we yagize ati “Ariko mugira amagambo we! Afungirwa iki buriya niba umwifuriza gufungwa, tubwire itegeko ubona yishe hanyuma tugusubize.”

Impaka kuri Turahirwa kandi zishingiye kuri dosiye ya Mugabekazi Liliane watawe muri yombi umwaka ushize nyuma yo kugaragara mu ruhame yambaye imyenda bamwe bise ko igaragaza ibice by’ibanga. Uwo mukobwa yaje gufungurwa by’agateganyo n’urukiko.

Iyo abihamywa n’urukiko yari guhanishwa igihano cy’igifungo kitari munsi y’amezi atandatu ariko kitarenze imyaka ibiri.

Turahirwa binyuze ku rukuta yafunguye ku rubuga rwa Snapchat, aherutse gusohora amashusho ari gusambana n’abagabo bagenzi be.

Ni amashusho yemeje ko ari we ugaragaramo icyakora avuga ko batunguwe n’uko yagiye hanze kuko yari ayo kwifashisha muri filime bari bari gukorwa ’Kwanda1’.

Bidateye kabiri, hahise hasohoka andi mafoto y’uyu musore yambaye ubusa buri buri ndetse n’imyanya ye y’ibanga igaragara ku karubanda.

Turahirwa yageze mu Rwanda avuye mu Butaliyani

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .