00:00:00 IGIHE NETWORK KN KINYARWANDA EN ENGLISH FR FRANCAIS

Imipaka yarafunguwe! Indirimbo 10 zigezweho i Bujumbura mu zahuriyemo Abanyarwanda n’Abarundi

Yanditswe na Nsengiyumva Emmy
Kuya 19 Mutarama 2023 saa 04:51
Yasuwe :

Abakunzi b’umuziki yaba mu Rwanda ndetse n’i Burundi batangiye kurya ku mbuto z’umubano w’ibihugu byombi uherutse kuzahuka.

Ubaye utembera Umujyi wa Bujumbura, umurwa mukuru w’u Burundi uzwiho kunyura abakunzi b’umuziki byakorohera kumva umusaruro wo guhuza imbaraga hagati y’abahanzi bo mu Rwanda n’ab’i Burundi.

Imikoranire hagati y’abahanzi bo mu Rwanda n’ab’i Burundi yahozeho kuva cyera, abamaze igihe bakurikira umuziki baribuka indirimbo zakanyujijeho zihuriweho n’abahanzi bo mu bihugu byombi.

Ingero ni nyinshi, ushaka wahera kuri Gapapu ya Uncle Austin na Yoya, Indoro ya Charly&Nina na Big Fizzo, Baza ya Tom Close na Big Fizzo, Hansange ya Social Mula na Big Fizzo, I Love you ya Sat B afatanyije na Urban Boys na Aime Bluestone n’izindi nyinshi.

Umubano mwiza ukunze kungukira abahanzi bo mu bihugu byombi, wabangamiwe cyane n’umwuka mubi wari umaze igihe cy’imyaka irindwi kuva mu 2015 kugeza mu mpera z’umwaka ushize.

Muri icyo gihe cyose hasohotse indirimbo nke cyane zihuriwemo n’abahanzi bo mu bihugu byombi, iyamenyekanye ikaba ‘Beautiful’ yakozwe na Sat B afatanyije na Meddy.

Nubwo na mbere gato y’uko umubano hagati y’ibihugu byombi uzahuka hari bamwe mu bahanzi bari batangiye kwihuza bagakorana, kuva mu Ukwakira 2022 ubwo u Burundi bwafunguraga imipaka ibuhuza n’u Rwanda, abahanzi nabo babaye nk’abazahuye uwabo batangira gukorana ndetse ku muvuduko wo hejuru.

Mu mezi atatu gusa, biroroshye gutondeka indirimbo zigera mu icumi ziri mu zigezweho zahuriwemo n’abahanzi bo mu bihugu byombi.

Uyu muvuduko wo gukorana indirimbo ku bahanzi bo mu bihugu byombi witezweho umusaruro w’ubufatanye bwanacubya uburakari abahanzi b’i Burundi bafitiye abakunzi ba muzika iwabo bashinja guharara umuziki wo mu Rwanda bakirengagiza uw’iwabo.

Si ugukorana indirimbo gusa kuko kugeza ubu ibihugu byombi byongeye no gufungura amarembo, abahanzi bakaba bemerewe gukora ibitaramo bisanzuye bihabanye n’uko byari byifashe mu myaka ishize.

Benshi baribuka ubwo u Burundi bwavugaga ko butakwemera ko Bruce Melodie na Israel Mbonyi bajya kuhakorera igitaramo mu 2021, icyo gihe urwitwazo rugirwa Covid-19 nyamara ku rundi ruhande hari ababibonaga nk’ibibazo bya politike.

Body ya D- One na Social Mula

Social Mula uri mu babimburiye abandi kujya gutaramira i Burundi nyuma yo gufungura imipaka, uretse guha ibyishimo abakunzi b’umuziki i Burundi yahavuye anakoranye n’umuhanzi waho D-One indirimbo bise ‘Body’.

Iyi ndirimbo iri mu zimaze igihe zicurangwa yaba ku ma radiyo y’i Burundi no mu tubyiniro twaho.

Yale yale ya Papa Cyangwe na Double Jay

Papa Cyangwe uri mu bahanzi bagezweho i Burundi ariko bataragira amahirwe yo guca iryera ababataramira, nyuma yo kumva inkuru nziza y’uko imipaka ifunguye, yegereye Double Jay bakorana indirimbo ‘Yale yale’.

Bitewe n’uko Double Jay ari mu bahanzi bagezweho i Bujumbura ndetse abakunzi ba muzika i Burundi bagakunda bikomeye umuraperi Papa Cyangwe, byatumye iyi ndirimbo ikundwa byihariye.

‘Truth or Dare Rmx’ ya Davis D na Big Fizzo

Davis D yasubiranyemo indirimbo ‘Truth or Dare’ na Big Fizzo yasohotse mu minsi ishize, bwa mbere aba bahanzi bayiririmbanye ku rubyiniro mu gitaramo Davis D yakoreye i Bujumbura ku wa 31 Ukuboza 2022.

Mu minsi ishize aba bahanzi bahuriye ku mucanga wo ku kiyaga cya Tanganyika bafata amashusho yayo ategerejwe.

Quality ya Kenny Sol na Double Jay

Iyi ndirimbo umuntu atatinya kuvuga ko iyoboye izindi zahuriwemo n’abahanzi bo mu Rwanda n’ab’i Burundi mu gukundwa, yafatiwe amashusho muri Tanzania.

Gukundwa ku iyi ndirimbo ntabwo ari ibintu byayigwiririye ahubwo ni uko yari ihuriwemo n’abahanzi bari bagezweho muri ibi bihugu byombi.

Inzoga n’ibebi ya Bruce Melodie, Double Jay na Kirikou

Inzoga ni bebi ni indirimbo muri iyi minsi icurangwa bikomeye cyane i Bujumbura bitewe n‘uko ihuriwemo n’abahanzi bagezweho mu bihugu byombi.

Bruce Melodie uri mu bahanzi bagezweho mu Rwanda yari ahuje imbaraga na Double Jay kimwe na Kirikou bari mu bagezweho i Bujumbura.

Turajana ya Bwiza na Alvin Smith

Bwiza uri mu bakobwa bakora umuziki bagezweho i Kigali nawe ntabwo yacitswe ku isoko rya muzika y’i Burundi, yahisemo gukorana indiirmbo ‘Turajana’ na Alvin Smith.

Aba bahanzi navuga ko bakiri gukusanya abakunzi mu bihugu byombi, bahuje imbaraga bakorana indirimbo iri mu zigezweho cyane i Bujumbura.

Akadaje ya Alvin Smith na Juno Kizigenza

Alvin Smith umaze igihe agerageza gupfumurira mu muziki w’u Rwanda, mu minsi ishize yifatanyije na Juno Kizigenza bakorana indirimbo bise ‘Akadaje’.

Ni indirimbo muri iyi minsi igezweho i Bujumbura cyane ko usanga amaradiyo hafi ya yose n’utubyiniro tugezweho i Bujumbura badasiba kuyicuranga.

X Love ya Isimbi Dee na Drama T

Drama T ugezweho i Bujumbura mu minsi ishize yikojeje i Kigali ahakorera indirimbo X Love yahuriyemo n’umukobwa uri kuzamuka mu muziki Isimbi Dee.

Nubwo benshi mu bakunzi b’umuziki i Bujumbura batari bazi uyu mukobwa, ntabwo byababujije gukunda indirimbo muri iyi minsi umuntu atatinya kuvuga ko igezweho bikomeye.

Ndakwikundira ya Alyn Sano na B Face

Umwe mu bahanzikazi nyarwnada bagezweho i Bujumbura muri iyi minsi ni Alyn Sano, imwe mu mpamvu ituma uyu mukobwa akundwa cyane ni indirimbo ‘Ndakwikundira’ yakoranye na B Face.

Iyi ndirimbo yakiranywe yombi n’abakunzi b’umuziki i Burundi, kuri ubu iri mu zicurangwa cyane yaba ku ma radiyo ndetse no mu tubyiniro tunyuranye tugezweho i Bujumbura.

Say less ya Alyn Sano, Sat B na Fik Fameica

Iyi ndirimbo yumvikanamo Alyn Sano na Sat B, kuri ubu iri mu zigezweho bikomeye i Bujumbura cyane ko uyu muhanzikazi amaze kuzamura izina rye mu bakunzi ba muzika.

Ni indirimbo utataha utumvise icurangwa yaba mu kabari, akabyiniro cyangwa ngo umare akanya utayumvise kuri radiyo iyo ariyo yose y’i Burundi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .