Imihigo ya Shema Hortense uhagarariye u Rwanda mu irushanwa rya Miss Nation

Yanditswe na Uwiduhaye Theos
Kuya 7 Ukuboza 2020 saa 08:39
Yasuwe :
0 0

Hortense Shema w’imyaka 20 uhagarariye u Rwanda mu irushanwa rya Miss Nation ribera mu Mujyi wa Dubaï, ariko ubu rikazabera kuri internet afite intego yo kumenyekanisha urwa Gasabo yifashishije filime.

Uyu mukobwa yabwiye IGIHE ko yitabiriye iri rushanwa biturutse kuri sosiyete yitwa Embrace Africa yamubonye igakunda imiterere ye n’uko agaragara ku mafoto.

Ati “Barambonye bakunda amafoto yanjye tuvuganye baranyishimira batangira kumfasha kujya nshaka amarushanwa yo guhagararira igihugu cyanjye, rero banyeretse ririya birangira bamfashe.”

Shema avuga ko umushinga afite ari uwo gushyira imbere kumenyekanisha igihugu yifashishije filime, kuko abenshi bafite isura mbi y’uko u Rwanda rumeze bitewe n’amateka rwanyuzemo.

Ati “Nshaka guharanira gushyira amateka meza n’umuco Nyarwanda mu ruganda rwa sinema bikajya bikinwa. Hakifashishwa n’abamurika imideli mu bindi bigamije kumenyekanisha igihugu. Hari ibihugu byinshi tuzi amateka yabyo ndetse n’umuco kuko babinyujije muri izo filime ndetse n’amafoto maze Isi yose ikabimenya kandi ikabyigiraho.”

Arongera ati “Njya nsoma ibitabo by’u Rwanda rwa kera nkumva ni inkuru zigisha, zishimishije, ziryoshye zikwiye kumenyekana ku Isi hose maze ibihugu bikamenya u Rwanda kuko rimwe na rimwe bajya batwitiranya kubera amateka mabi twagize gusa ntabwo ari byo kuko bituruka ku kuba filime za Jenoside arizo zageze kure hanze y’igihugu. Gusa hari ibindi byiza biranga Abanyarwanda utanasanga ahandi tugomba kubwira isi.”

Shema asanzwe ari umwanditsi w’inkuru zitandukanye ariko yabikoraga yishimisha.

Uyu mukobwa wiyumvamo gukina filime ndetse akabikunda, avuga ko natsinda azaba abonye amahirwe yo gushyira mu bikorwa umushinga we.

Ati “Umuntu ukurikirana amateka n’umuco w’Abanyafurika asanga hari byinshi by’ubuhanga atari azi kandi byafasha buri wese ubimenye, rero icyo gukora n’ubundi kiri mu mishinga yanjye yose ikubiye mu gushyira ayo mateka yose muri filime bikamenyekana ku Isi hose. Ikindi ni ukugaragaza ubwiza Abanyafurika dufite kandi ko ari twe tugomba kubushimagiza, kubukunda no kubusigasira mu gihe duhuye n’irondaruhu.”

Uyu mukobwa ahanganye n’abandi bakobwa 22, baturutse mu bihugu birimo Hongrie, Afurika y’Epfo, Zambia, Pologne, Bulgaria, Nigeria, Tanzania, Iran, Ukraine, Indonesia, Iraq, Uganda, Romania n’ibindi byinshi.

Avuga ko ari ishema kuri we kuba ahagarariye u Rwanda muri iri rushanwa riri kubera kuri internet kubera icyorezo cya Coronavirus cyugarije isi.

Iri rushanwa ryatangiye ku wa 25 Ugushyingo rizasozwa ku wa 17 Ukuboza 2020. Shema Hortense ni ubwa mbere yitabiriye amarushanwa y’ubwiza yaba ayo mu Rwanda nayo hanze yarwo.

Iri rushanwa ryatangijwe mu 2016, rihuza abakobwa bo mu bihugu bitandukanye ku Isi yose. Ryatangijwe mu bukangurambaga bwa #StayU cyangwa mu Kinyarwanda ‘Komeza kuba wowe’. Ubu bukangurambaga bwashishikarizaga abakobwa gukomeza kugira uruhu rw’umwimerere n’ubwiza bwabo karemano aho kwibagisha no kuruhindura.

Abakobwa bahurira muri iri rushanwa buri wese yerekana indangagaciro z’iwabo n’umuco w’igihugu cye.

Umwaka ushize ryegukanywe na Olla Sidi wo muri Sudani. Icyo gihe iri rushanwa ryabereye muri Leta Zunze Ubumwe z’Abarabu mu Mujyi wa Dubai ku wa 31 Ukuboza 2019.

Ushaka guha amahirwe Shema Hortense kanda hano.

Shema Hortense ahanganye n'abakobwa 22 bo mu bihugu bitandukanye
Shema yasabye Abanyarwanda kumushyigikira mu irushanwa rya Miss Nation
Shema w'imyaka 20 ni ubwa mbere agiye mu marushanwa y'ubwiza
Shema Hortense avuga ko ashaka kumenyekanisha u Rwanda yifashishije filime

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .