Imbamutima za Somi, Umunyarwandakazi washyizwe mu bahataniye Grammy Awards

Yanditswe na Uwiduhaye Theos
Kuya 30 Ugushyingo 2020 saa 08:57
Yasuwe :
0 0

Umuhanzikazi Laura Kabasomi Kakoma [Somi] ufite inkomoko mu Rwanda ku wa 24 Ugushyingo 2020 yashyizwe ku rutonde rw’abahatanira ibihembo bya Grammy Awards 2021.

Ni itariki itazasibangana mu mutima w’uyu mubyeyi cyane ko ari gake usanga Abanyarwanda, bari guhatanira ibi bihembo bifite izina rikomeye ku Isi yose.

Grammy Awards ni ibihembo ngarukamwaka bitangwa hagamijwe gushimira abantu bo mu ruganda rw’imyidagaduro bitwaye neza.

Album y’uyu muhanzikazi yitwa ‘Holy Room’ yatoranyijwe mu cyiciro cya Best Jazz Vocal Album ihatanye n’izindi enye zirimo; Ona ya Thana Alexa, ‘Secrets Are the Best Stories’ ya Kurt Elling yakoranye na Danilo Pérez, ‘Modern Ancestors’ ya Carmen Lundy na ‘What’s the Hurry’ ya Kenny Washington.

Ibihangano bihatanira ibihembo bigomba kuba ari ibyakozwe hagati ya tariki ya 1 Nzeri 2019 kugeza tariki 31 Kanama 2020.

Somi yabaye Umunyafurika w’umwirabura wa mbere washyizwe mu cyiciro cy’abahanzi bakora Jazz ndetse aba n’umuhanzi ukora iyi njyana wo muri Afurika muri rusange washyizwe mu cyiciro cy’abahatanira iki gihembo.

Yabwiye The New Times ko kuba yarashyizwe mu bahatanira Grammy Awards bivuze byinshi kuri we n’umuziki we.

Ati “Igihe nicyo kizagaragaza icyo bivuze kuri njye, ariko nishimiye ko ibyo nakoze byahawe agaciro. Hejuru ya byose, gushyirwa mu bahatanira Grammy Awards bituma umuntu amenyekana ku rundi rwego n’ibyo akora bikagera ku yindi ntera.”

Avuga ko kuva kera yahoraga atekereza kuzajya muri Grammy Awards. Ati “Ni ikintu nahoze nizera ariko gikenera ingufu nyinshi ndetse kigasaba gutegereza nk’umuhanzi. Urugendo rwa buri muhanzi rukenera kudacika intege ku gucibwa intege no kudahabwa agaciro.”

Uyu mubyeyi watangiriye umuziki mu Mujyi wa New York muri Amerika, yavuze ko ari ngombwa ko umuziki w’u Rwanda utera imbere.

Ati “Nizera ko bikenewe ko umuziki w’u Rwanda ukura ukagera ku rwego rwo guhangana ku rwego mpuzamahanga. Nahoranye indoto zo kuzazana mu Rwanda iserukiramuco rya Jazz mu Rwanda nkazana abahanzi mpuzamahanga bafite amazina akomeye n’abandi b’inararibonye mu ruganda rwa muzika; kugira ngo bahure n’abahanzi bo mu Rwanda.”

Somi yashimiye Jacques Murigande [Mighty Popo] uyobora ishuri ry’umuziki ryahoze ku Nyundo, ku bw’igitekerezo yagize cyo kuritangiza, kuko ritanga abanyempano batanga icyizere ku hazaza h’umuziki.

Grammy Awards izatangwa ku nshuro ya 63 ku wa 31 Mutarama 2021, ahitwa Staples Center i Los Angeles.

Somi ni umuririmbyi ukomoka mu Rwanda ariko wavukiye akanakurira i Champaign, Illinois ho muri Leta Zunze Ubumwe za Amerika. Yamamaye cyane mu njyana ya Jazz ndetse afitanye amasezerano n’inzu itunganya umuziki ya Sony Music basinyanye muri Kanama 2013, i New York, aho asanzwe akorera ibikorwa bye bya muzika.

Aheruka gutaramira mu Rwanda mu 2018, mu gitaramo cyo kwishimira igihembo gikomeye cya NAACP Award yegukanye no gususurutsa Abanyarwanda yifashishije umwimerere w’injyana ya Jazz aririmba.

Iki gitaramo cyanyuze benshi bacyitabiriye barimo na Madamu Jeannette Kagame. Somi yerekanye ubuhanga bwe aririmba indirimbo zitandukanye kuri albums zirindwi yari amaze gukora kuva yatangira umuziki mu 2003.

Harimo indirimbo ziri kuri album yitwa ‘Petite Afrique’ yari aherutse gusohora, ibara inkuru y’imibereho mu gace yimukiyemo ka Harlem kamaze kwiyubaka muri iki gihe mu Mujyi wa New York nubwo kabitse amateka asharira ku bisekuruza by’abirabura bahabaye.

Uyu muririmbyi ukomeye w’imyaka 39 ni mwene Dr. Ibulaimu Kakoma na Elizabeth Nyarubona Kakoma; akaba afite inkomoko ku mubyeyi w’Umugande n’Umunyarwandakazi. Mu by’amashuri, Somi afite icyiciro cya gatatu cya kaminuza mu bijyanye n’ubuhanzi, yavanye muri New York University’s Tisch School of the Arts.

-  Indirimbo “Holly room”, Somi yitiriye Album ye iri guhatana muri Grammy Awards

Somi ni umwe mu bahanzikazi bafite impano ihambaye mu Njyana ya Jazz

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .