Mu butumwa John Legend yakurikije amashusho agaragaza urugendo we n’umugore we, Chriss Teigen bagiriye muri Pariki y’Ibirunga, yavuze ko yishimiye ibyiza yabonye.

Ati “Ubwo twari mu Rwanda twitabiriye Move Afrika, twagize umwanya wo gutembera, tugira amahirwe yo gusura ingagi aho zisanzwe ziba. Mu by’ukuri byari ubundi bunararibonye mu buzima. Turashimira Abanyarwanda uburyo bakirana abashyitsi urugwiro n’umutima ukunze.”

Ni ubutumwa John Legend yatambukije ku mbuga nkoranyambaga yishimira kuba yarasuye Pariki y’Igihugu y’Ibirunga, akabasha kwihera ijisho imibereho y’ingagi.

Ubwo aheruka i Kigali ku wa 21 Gashyantare 2025, John Legend yahakoreye igitaramo gikomeye cyitabiriwe n’abarenga ibihumbi umunani baturutse mu bihugu 41.

Uretse Pariki y’Igihugu y’Ibirunga yasuye, uyu muhanzi uri mu bakomeye ku Isi bakora injyana ya R&B, yanasuye Urwibutso rwa Jenoside yakorewe Abatutsi rwa Kigali, asobanurirwa byimbitse amateka y’u Rwanda mbere ya Jenoside yakorewe Abatutsi mu 1994, mu gihe cya Jenoside, uko yahagaritswe n’aho u Rwanda rugeze rwiyubaka.

Uyu mugabo yafashe umwanya wo kunamira abazize Jenoside yakorewe Abatutsi mu 1994, ndetse ashyira indabo ku mva, mu rwego rwo kubaha icyubahiro.

John Legend ni umwe mu bahanzi bakomeye ku rwego mpuzamahanga, aho azwiho ubuhanga mu kwandika indirimbo no gucuranga ‘piano’.

John Legend yakunzwe mu ndirimbo nyinshi zirimo ‘All Of Me’, ‘Love Me Now’, ‘You &I’, ‘Tonight’, ‘Preach’, n’izindi nyinshi.

John Legend ageze muri iki kibaya mbere yo kurira Ibirunga, yabanje gufata ifoto

John Legend yishimiye urugwiro yakiranywe mu Rwanda

Banyujijemo bamubyinisha n'ikinimba

John Legend yasuye Pariki y'Ibirunga ari kumwe n'umugore we

Kimwe n'abandi benshi basuye Parike y'Ibirunga, John Legend hari aho yageraga akananirwa akabanza kuruhuka

Ubwo John Legend n'umugore we bitegerezaga ingagi muri Pariki y'ibirunga

John Legend ahamya ko gutembera Pariki y'Ibirunga bwari ubundi bunararibonye yagize mu buzima