Ibyamamare byafashe mu mugongo umuhanzi Christopher wapfushije umubyeyi

Yanditswe na Nsengiyumva Emmy
Kuya 22 Mutarama 2021 saa 01:34
Yasuwe :
0 0

Ku mugoroba wo ku wa Kane tariki 21 Mutarama 2020 nibwo hasohotse inkuru y’incamugongo ko Christopher yapfushije umubyeyi we; yashenguye bamwe mu nshuti za hafi z’uyu muhanzi ziganjemo abo babana mu buzima bwa buri munsi bw’umuziki.

Gahongayire Marie Mativitas ubyara Christopher cyangwa se Topher, yitabye Imana azize uburwayi.

Nyuma y’iyi nkuru y’akababaro, abahanzi n’ababarizwa mu ruhando rw’imyidagaduro bihanganishije mugenzi wabo basangiye umwuga ku byago yagize.

Babinyujije ku mbuga nkoranyambaga ab’ibyamamare batandukanye bihanganishije uyu musore bamusaba gukomera ndetse banasabira umubyeyi we kugira iruhuko ridashira.

Muyoboke Alex, umwe mu bagabo bagiye bakorana bya hafi n’abahanzi batandukanye, yagize ati “Ariko rupfu wowe wazapfuye, komeza kwihangana muvandimwe Christopher, Imana imwakire mu Bwami bwayo mama wacu, Amen.”

Zizou Alpacino yagize ati “Komeza kwihangana Christopher, Imana yonyine niyo izi impamvu.”

Umuraperi Jay Polly na we yifurije iruhuko ridashira uyu mubyeyi anasaba Christopher gukomeza kwihangana. Ati “Uruhukire mu mahoro mama, Chris komeza gukomera muvandimwe turi kumwe.”

Mico The Best yashenguwe bikomeye n’uko hari hashize iminsi mike Christopher amuganirije ku burwayi bw’umubyeyi we.

Yagize ati “Chris ndababaye pe ubyumve kuko uburwayi bwa mama wawe wari warabumbwiyeho mu minsi mike cyane ishize. Imana imwakire mu bayo.”

Umunyamakuru Basile Uwimana akaba umwe mu nshuti za hafi za Christopher na we ntiyahishe agahinda yatewe no kumva yabuze umubyeyi we.

Abinyujije ku rukuta rwe rwa Instagram, Uwimana yagize ati “Arwaye igihe, ababaye igihe nyamara Imana iramwisubije. Muvandimwe Christopher waramurwaje, wamubaye hafi, ibyo wanyuzemo ni byinshi ariko ntiwaruhiye ubusa, agiye azi ko uri umugabo. Komera nubwo bigoye, akabura ntikaboneke ni nyina w’umuntu ariko aho agiye ni heza. Imana imwakire mu bayo.”

Aba ni bamwe mu nshuti z’uyu muhanzi zamwihanganishije nyuma yo kubura umubyeyi witabye Imana azize uburwayi yari amaranye iminsi.

Gahongayire Marie Mativitas, nyina w’umuhanzi Muneza Christophe wamamaye mu muziki nka Christopher cyangwa se Topher, yitabye Imana ku mugoroba wo ku wa Kane tariki 21 Mutarama 2021.

Umuhanzi Christopher ari mu gahinda ko kubura umubyeyi we witabye Imana
Umubyeyi wa Christopher yitabye Imana azize uburwayi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .