00:00:00 IGIHE NETWORK KN KINYARWANDA EN ENGLISH FR FRANCAIS

Ikiganiro ‘Urukiko rw’Ubujurire’ cyakomwe mu nkokora; Taifa na Axel bagiye kugenda

Yanditswe na Nsengiyumva Emmy
Kuya 27 April 2022 saa 01:53
Yasuwe :

Ikiganiro ‘Urukiko rw’ubujurire’ kiri mu bimaze kwigarurira imitima ya benshi bakunda imikino mu Rwanda, kiri mu bihe bitoroshye nyuma y’uko bamwe mu banyamakuru bakomeye bagikoraga bivuzwe ko bashobora kujya mu mahanga.

Urukiko rw’ubujurire ni ikiganiro cyakorwaga na Sam Karenzi, Kalisa Bruno Taifa na Horaho Axel.

Gisanzwe gitambuka kuri radio Fine FM ariko icyumweru kigiye kwirenga kitumvikana, benshi bibaza ikihishe inyuma yo guhagarara, ku buryo hari n’abadatinya guhamya ko haba hari impamvu zihishe inyuma yo guhagarara.

Icyakora nubwo hakomeje kuvugwa byinshi yaba ku mbuga nkoranyambaga ndetse no hagati y’abantu ubwabo, IGIHE yamenye icyihishe inyuma y’ihagarara ry’iki kiganiro.

Amakuru yizewe dufite ahamya ko iki kiganiro cyakomwe mu nkokora nuko bamwe mu banyamakuru b’inkingi za mwamba bagikoraga bagiye kujya muri Leta Zunze Ubumwe za Amerika.

Kalisa Bruno Taifa wari mu nkingi za mwamba aherutse kubona ibyangombwa bimwerera kwimukira muri Leta Zunze Ubumwe za Amerika ari kumwe n’umuryango we.

Uretse Taifa, mu minsi iri imbere Horaho Axel ari gutegura ubukwe n’umukobwa uba muri Leta Zunze Ubumwe za Amerika ndetse hari amakuru y’uko nawe azahita yimukirayo.

Ikibazo cy’ingutu cyabaye ni uko ikiganiro cyari gisigayemo Sam Karenzi na we umaze iminsi ahugiye mu kandi kazi.

Icyakora abantu bari hafi cyane ya Sam Karenzi babwiye IGIHE ko uyu mugabo we yiteguye gukomeza akazi ndetse ari gushakisha abazasimbura bagenzi be.

Hari abanyamakuru bakomeje kuvugishwa ngo bazasimbure Taifa na Axel

Nyuma yo kubona ko Horaho Axel na Kalisa Bruno Taifa bagiye kwerekeza muri Amerika, hari amakuru avuga ko mu buryo bw’ibanga Sam Karenzi n’ubuyobozi bwa Radio Fine FM bari gushakisha abasimbura babo.

Ku rutonde rw’abo twamenye bari gutekerezwaho harimo; Claude Hitimana usanzwe ukorera Royal FM, Leonidas Ndayisaba ukorera Flash FM, Regis Muramira usanzwe kuri City Radio n’abandi banyuranye.

Icyakora nubwo aba aribo bari kugarukwaho nk’abashobora gukorera mu ngata abagiye mu kiganiro ‘Urukiko rw’ubujurire’ nta n’umwe baramara kwemeranya.

Gusa ngo mu gihe haba hamaze kuboneka ikipe isimbura Horaho Axel na Kalisa Bruno Taifa, Sam Karenzi yasubukura iki kiganiro.

Babiri muri batatu bakoraga ikiganiro Urukiko rw'ubujurire bagiye kwerekeza muri Amerika
Sam Karenzi afatanyije n'ubuyobozi bwa radiyo bari gushakisha abasimbura Horaho Axel na Kalisa Bruno Taifa mu kiganiro 'Urukiko rw'ubujurire'
Kalisa Bruno Taifa agiye kwimukira muri Amerika n'umuryango we
Horaho Axel witegura kurushinga hari amakuru avuga ko yitegura kujya muri Amerika

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .