Umwihariko wa Nyiramatabaro w’imyaka 66 ucuranga umuduri akagira ubuhanga mu muziki (VIDEO)

Yanditswe na Nsengiyumva Emmy
Kuya 20 Ukwakira 2019 saa 08:08
Yasuwe :
0 0

Kuwa Gatanu tariki 18 Ukwakira 2019 nibwo habaga ½ cy’amarushanwa ya muzika ya Hanga Higa ategurwa na Alain Muku, mu bitabiriye harimo umukecuru Nyiramatabaro w’imyaka 66 wanabonye itike imujyana mu cyiciro cya nyuma .

Nyiramatabaro Mariyana ni umwe mu bitabiriye Hanga Higa ari mu itsinda ahuriyemo n’abasore babiri baturuka mu karere ka Kirehe.

Mu kiganiro yagiranye na IGIHE, Nyiramatabaro yavuze ko yatangiye gucuranga umuduri afite imyaka 14, akaba yarakuze abyina mu itorero “Indangamuco” ahuriyemo n’urungano rwe rwo mu karere ka Kirehe.

Abasore babiri bakoraga umuziki usanzwe mu karere ka Kirehe babonye impano y’uyu mukecuru bamusaba ko bakorana.

Nyuma yo kwemeranya gukorana batangije itsinda rya “Gakondo Igisaka cy’Imigongo”. Iri rikaba ryanatsindiye kwinjira mu cyiciro cya nyuma cy’iri rushanwa giteganyijwe kuba tariki 15 Ukuboza 2019.

Abajijwe niba yiteguye gukomeza gukora umuziki mu gihe yaba atsinze irushanwa rya Hanga Higa, uyu mubyeyi yavuze ko nta kibazo byamutera cyane ko asanzwe aririmba ahantu hanyuranye.

Ibijyanye n’akazi asanzwe akora katari umuziki yagize ati” Njye ndi umuhinzi w’intangarugero ariko nkunda umuziki ku buryo iyo ndi kuwukora mba numva nishimye.”

Uyu mubyeyi n’abasore baririmbana baboneyeho akanya baratarama, mu njyana yabo yitwa “Ikinimba cyo mu Gisaka”.

Uyu mubyeyi ahamya ko gukorana n’uru rubyiruko mu itsinda ari ukugira ngo ababere urugero nk’umuntu mukuru.

Ati”Nta bwoba bintera kuririmbana n’aba bana, ni ukuvuga ngo umukecuru nkanjye niwe ugomba kwerera abakiri bato imbuto.”

Iri tsinda rimaze amezi atatu gusa ritangiye, bavuga ko rifite ikibazo cy’amikoro ku buryo babonye ubushobozi bakora umuziki mwiza ndetse bakamenyekanisha agace bavukamo binyuze mu muziki.

Babwiye IGIHE ko ariyo mpamvu bitabiriye iri rushanwa mu rwego rwo gushaka uwabafasha .

Nyiramatabaro n'abasore baririmbana mu itsinda rya "Gakondo y'imugongo mu gisaka"

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza