00:00:00 IGIHE NETWORK KN KINYARWANDA EN ENGLISH FR FRANCAIS

Igitaramo cya Tay C i Kigali kiri mu bihendutse azakora mu mpera z’umwaka

Yanditswe na Nsengiyumva Emmy
Kuya 21 July 2022 saa 09:33
Yasuwe :

Ibiciro by’amatike yo kwinjira mu gitaramo Tay C yatumiwemo mu Mujyi wa Kigali byashyizwe hanze, biba ibya mbere biri hasi ugereranyije n’ibindi bitaramo uyu muhanzi uri mu bafite igikundiro ateganya gukora uyu mwaka.

Bitandukanye n’ibimenyerewe ko itike yo kwinjira mu bitaramo bya Tay C iba ihanitse, abari kumutegurira icyo agiye gukorera i Kigali bo bahanantuye ibiciro ku kigero cyo hejuru.

Unaze akajisho ku mbuga zicururizwaho amatike y’ibitaramo ushaka kumenya neza igiciro cyo kwinjira mu bitaramo bya Tay C muri uyu mwaka wa 2022, usanga byibuza ihendutse ibarizwa hagati ya 37$-43$, ni ukuvuga hagati y’ibihumbi 37 Frw na 43 Frw.

Icyakora bitandukanye n’amafaranga yishyurwa mu kwinjira mu gitaramo cya Tay C cyane ku batuye ku Mugabane w’u Burayi, i Kigali ho kuva ku bihumbi 5 Frw umukunzi w’umuziki azabasha kwitabira igitaramo cy’uyu muhanzi uri mu bafite izina rikomeye ku Isi.

Byitezwe ko Tay C azataramira i Kigali ku wa 30 Nyakanga 2022 muri BK Arena, inyubako yakira abantu ibihumbi 10 bicaye neza.

Intore Entertainment, sosiyete yatumiye uyu muhanzi, yatangaje ko itike yo kwinjira mu gitaramo cya Tay C i Kigali ku bari kuzigura mbere ari ibihumbi 5 Frw mu myanya isanzwe, ibihumbi 10 Frw ahakurikiye, ibihumbi 20 Frw mu myanya y’icyubahiro, mu gihe itike ya menshi iri kugura ibihumbi 50 Frw.

Ku bazagurira amatike ku muryango bazishyura ibihumbi 10 Frw mu myanya isanzwe, ibihumbi 15 Frw mu myanya ikurikiye, iy’icyubahiro ni ibihumbi 25 Frw naho iya menshi ikaba ibihumbi 55 Frw.

Ugereranyije ibi biciro n’ibyo uyu muhanzi yashyizeho mu ruhererekane rw’ibitaramo 20 agiye gukorera ku Mugabane w’u Burayi ni bwo ushobora kwemera ko igitaramo cye cy’i Kigali gihendutse.

Mu kumenya uko itike zo mu gitaramo cya Tay C zihagaze ugereranyije n’ibindi bitaramo asanzwe akora, twifashishije ibitaramo 20 ateganya gukora muri uyu mwaka kugeza tariki ya 7 Ukuboza 2022.

Tay C uri kwitegura uruhererekane rw’ibitaramo bizazenguruka u Burayi guhera muri Nzeri 2022, itike ihendutse muri byo iri kugura amadorali ya Amerika 43.

Ni ibitaramo ushobora gutekereza ko bihenze, ukaba wakeka ko bitazabona abantu nyamara si ko bimeze.

Ugiye kureba igitaramo ateganya kwinjizamo abantu bake ni ikizabera i Montpellier mu Bufaransa, aho azataramira ahantu hicara abantu 2000, mu gihe aha benshi ari i Lyon hahurira ibihumbi 17.

Nyamara muri ibi bitaramo 20 bya Tay C bizitabirwa n’ibihumbi by’abantu, nta na kimwe wabona gisigaranye amatike agera ku ijana akiri gucuruzwa cyane ko henshi ari no gushira.

Tay C utegerejwe i Kigali ni Umunya-Cameroun wavukiye mu Bufaransa ku wa 2 Gicurasi 1996. Ubwo yari amaze kwimukira mu Mujyi wa Paris mu 2012, ni bwo yatangiye umuziki. Ku wa 30 Gicurasi 2017 ni bwo uyu musore yasohoye Mixtape y’indirimbo icumi yise ‘Alchemy’.

Mu 2018, Tay C yasohoye Mixtape ye ya kabiri yise ‘H.E.L.I.O.S’. Nyuma uyu musore yaje gusinya mu nzu isanzwe ifasha abahanzi yitwa H24. Iyi studio ni yo yakoreyemo album ye ya mbere yise NYXIA iza gusohoka mu 2019, iyi ikaba ari yo yatumye izina rye rimenyekana ku rwego mpuzamahanga mbere y’uko asohora iyitwa ‘Fleur froid’ mu 2020.

Tay C ni umwe mu bahanzi bakoresha imbaraga nyinshi ku rubyiniro
Tay C ari mu bahanzi bakunzwe ku Isi by'umwihariko mu bihugu bikoresha ururimi rw'Igifaransa
Igitaramo cya Tay C i Kigali kiri mu bihendutse azakora uyu mwaka

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .