00:00:00 IGIHE NETWORK KN KINYARWANDA EN ENGLISH FR FRANCAIS

Igitaramo cya Ish Kevin ’cyaburijwemo’ cyahawe izina rishya

Yanditswe na Nsengiyumva Emmy
Kuya 24 May 2022 saa 09:31
Yasuwe :

Igitaramo ‘The Love, Drunk & Party concert’ cyari kuririmbamo abahanzi batandukanye kigahagarikwa kigitangira, kigiye kongera kuba ndetse hatangajwe ibiciro byo kwinjira n’izina ryacyo rishya.

Ni igitaramo cyari cyateguwe na Trapish Music ya Ish Kevin ndetse na Evolve Music Group. Cyabaye ku wa 19 Werurwe 2022 gihagarikwa n’umwe mu bayobozi wavugaga ko kiri guteza urusaku.

Gilbert Rukundo ukuriye Evolve Music Group wari mu bateguye iki gitaramo, aheruka kubwira IGIHE ko kigiye gusubukurwa mu mpeshyi. Ati “Igitaramo kigiye gusubukurwa mu mpeshyi nyuma y’ibiganiro twagiranye na Rwanda Convention Bureau (RCB). Batwemereye kudufasha mu itegurwa ryacyo ku bintu bimwe na bimwe.”

Yakomeje avuga ko uretse umuziki, hazabaho n’ibindi bikorwa bijyanye no kumurika imideli. Iki gitaramo kizaba ku wa 16 Nyakanga 2022 kuri Canal Olympia.

RCB yabishimangiye ishyira hanze itangazo ivuga ko igiye gutera inkunga iki gitaramo cyaburijwemo. Hari aho rigira riti “Ibi bijyanye n’intego yacu yo gutera inkunga ibikorwa by’imbere mu gihugu ndetse n’iyo guteza imbere ubuhanzi.”

RCB ivuga ko yatanze inyubako ya Canal Olympia ku buntu ndetse bakazafatanya n’abateguye iki gitaramo mu kwishyura ibizifashishwa mu kugitegura.

Kuri ubu igitaramo cyiswe “My 250 & Trapish Concert”. Abari baguze amatike mbere bemerewe kwinjira batongeye kwishyura mu gihe baba bafite icyerekana ko bari bishyuye.

Nk’uko byari bimeze mu gitaramo giheruka cyabereye muri Hotel Villa Portofino i Nyarutarama ku wa 19 Werurwe, aho kwinjira byari 10.000 Frw, 15.000 Frw muri VIP na 20.000 Frw muri VVIP, mu gihe ameza y’abantu batandatu byari 200.000 Frw, no muri iki niko bizaba bimeze gusa haziyongeraho ko hazaba hari n’amatike ya 5 000 Frw.

Abahanzi bo mu Rwanda bagombaga kuririmba mu cy’ubushize barimo Logan Joe, B-Threy, Babou Tight King, Bushali, Ish Kevin, Kivumbi, Gabiro Guitar, France, Kenny K-Shot, OG2tone na Derek YMG nibo bazongera kuririmba havuyemo Bushali wasimbujwe Mike Kayihura.

Hari amakuru avuga ko Ycee wo muri Nigeria wari watumiwe nk’umuhanzi w’imena atazaririmba ahubwo ko hari amahirwe menshi yo gusimbuzwa Costa Titch wo muri Afurika y’Epfo ugezweho mu njyana ya ’Amapiano’.

Reba indirimbo Ish Kevin aheruka gushyira hanze

Igitaramo cya Ish Kevin cyari cyaburijwemo kigiye kongera kuba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .