Igifunguzo nzagisigira Kitoko! Ibyo wamenya ku bukwe bwa Emmy wambitse impeta umukunzi we (Video)

Yanditswe na Nsengiyumva Emmy
Kuya 14 Mutarama 2021 saa 04:36
Yasuwe :
0 0

Umuhanzi Emmy amaze iminsi mu Rwanda mu rugendo yabanje kugira ibanga kugeza umunsi yatangarije ko yambitse impeta y’urukundo umukobwa bamaze imyaka itatu baterana imitoma.

Emmy na Umuhoza Joyce urukundo rwabo bahisemo kurugira ibanga kuko ngo babonaga atari ngombwa ko bimenywa n’umuhisi n’umugenzi.

Aganira na IGIHE, Emmy yagize ati “Ni icyemezo twafashe kuko adakunda kujya mu itangazamakuru, kandi murabizi akenshi iyo tugaragaje abakunzi bacu ubuzima bwabo tuba tubushyize ku karubanda.”

Emmy uhamya ko byari bigoye kumara imyaka itatu akundana n’umuntu batari kumwe, yahishuye ko kumenya icyo bashaka ari cyo cyabafashije kuba bageze kuri iyi ntambwe.

Yavuze ko ubukwe bwe na Umuhoza atahamya igihe buzabera kuko batarafata icyemezo cy’uzasanga undi.

Ati “Ndacyareba niba ari njye uzaza inaha cyangwa niba we azansanga muri Amerika, hari amahirwe ko nshobora kugaruka gutura mu Rwanda ngakora umuziki ariho ndi.”

Uyu musore nyuma yo kwambika umukunzi we impeta, yavuze ko umunsi yakoze ubukwe Kitoko ari we azasigira urufunguzo rw’ubusiribateri.

Usibye ibijyanye n’ubuzima bwite, ubwo twaganiraga twari tumusanze aho yafatiraga amashusho y’indirimbo nshya yitegura gushyira hanze yise ‘Dokimenti’.

Inkuru z’urukundo rwa Emmy na Umuhoza Joyce zatangiye kuvugwa kuva mu 2018 gusa bombi bagakunda kuryumaho.

Uyu muhanzi ni umwe mu bamaze igihe mu muziki w’u Rwanda. Mu 2012 ubwo yavaga mu Rwanda yerekeza muri Leta Zunze Ubumwe za Amerika, yari mu bagezweho cyane ko yari no ku rutonde rw’abahatanira irushanwa rya Primus Guma Guma Super Star ryabaga ku nshuro ya kabiri.

Icyo gihe yari afite indirimbo zikunzwe nka Nsubiza, Uranyuze, Kuki, Ibyo bavuga, Ese urinde n’izindi.

Ageze muri Leta Zunze Ubumwe za Amerika ntabwo yicaye ubusa kuko yakomeje gukora mu nganzo asohora izindi zirimo Ntunsige, Wabaga he yakoranye na Princess Priscillah, Ntari umuntu n’izindi.

Emmy yamaze kwambika impeta umukunzi we bitegura kurushinga
Emmy avuga ko kumara imyaka itatu ari mu rukundo n'umukobwa utamuri hafi bitari byoroshye
Emmy na Joyce bemeranyije kubana akaramata
Emmy yahishuye ko akimara kubwira uyu mukobwa ko yifuza ko babana undi yatitiye cyane
Byari ibyishimo ubwo Emmy yambikaga Joyce impeta
Emmy yambikiye impeta Joyce ku kiyaga cya Muhazi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .