Icyongereza cya Bruce Melodie mu ndirimbo ye nshya cyatembagaje benshi

Yanditswe na Uwiduhaye Theos
Kuya 20 Ugushyingo 2020 saa 12:37
Yasuwe :
0 0

Ubuhanga bwa Bruce Melodie ntabwo bugishidikanywaho mu muziki! Ndetse uwavuga ari mu bahanzi batanu bahagaze neza mu muziki w’u Rwanda ntabwo yaba agiye kure y’ukuri.

Ni umuhanzi ufite amateka maremare yaba mu buzima bwe cyangwa se mu muziki, kandi nawe ntatinya kuvuga ko ari ‘bavakure’ ariko ibyo byose yarabirenze ubu ni umuhanzi w’ikirangirire.

Mu mateka ye make mu buzima bwe akenshi avuga ko yacikirije amashuri nyuma yo gupfusha umubyeyi yari asigaranye, atangira kurera abavandimwe be nawe agikeneye kurerwa.

Ahungiye mu muziki atangira gusiragizwa kuko yatangiye ari utunganya indirimbo nyuma akaza ari umuririmbyi n’ubwo naho yabanje gucibwa intege. Bamwe bamubwira ko ‘ubwiza bwe budahagije ndetse ko buzatuma adakundwa!’

Ubu ni icyogere! Mu minsi ishize indirimbo ye yitwa ‘Katerina’ yaramamaye cyane muri Kenya nyuma yaho Guverineri w’Umujyi wa Mombasa, Hassan Joho, yayiririmbye bigatuma benshi muri icyo gihugu bamenya impano ye.

Mu Rwanda ho, yamaze gufata abantu bugwate ku buryo n’abataramukandaga babuze aho bamuhungira bakisanga basigaye bakunda ibihangano bye. Akunze kwitabazwa n’abahanzi benshi ngo baririmbane, kuko indirimbo yashyizemo ikirungo nta mananiza ikundwa.

Abatazi kuririmba nabo baramwitabaza ugasanga indirimbo yanuriye. Urugero rwa hafi ni iyitwa ‘Kungola’ yakoranye na Sunny wari usanzwe avugwaho ubuhanga bugereranyije mu kuririmba, ariko bayihuriramo ikirahirwa.

Bruce Melodie ubusanzwe witwa Itahiwacu Bruce, yari amaze iminsi anengwa kuririmba indirimbo ziganisha ku busambanyi kubera iyitwa ‘Saa moya’, ‘Ntiza’ yakoranye na Mr Kagame n’izindi.

Yongeye gutangaza benshi nyuma yo gushyira hanze indirimbo yise ‘Abu Dhabi’.

Iyi ndirimbo irimo ubutumwa buvuga ku mugabo watandukanye n’umugore we witwa Angelina bitewe n’ubukene, ari naho uyu musore aririmbamo imijyi itandukanye irimo Bujumbura, Abu Dhabi n’ahandi avuga ko amenye ko umugore ariho ari yajya kuhamushaka.

Nyuma Bruce Melodie uba wishyize mu cyimbo cy’umugabo w’umukene aza gukira wa mugore akamugarukira.

Icyongereza uyu muhanzi yaririmbye muri iyi ndirimbo cyatangaje benshi. Ni icyongereza agenda aririmba neza neza kikamera nk’ikinyarwanda.

Nyuma y’aho ashyize hanze iyi ndirimbo ibitekerezo byatanzwe byose abantu bavugaga ko atajya abatenguha, abandi bakavuga ko batangajwe n’Icyongereza yakoresheje.

Uwitwa Fatnah Saleh, yabanje araseka arangije ati “Bruce Melodie iki cyongereza ni byose. Uri umunyadushya.”

Quotes23 yagize ati “Ndi mu rukundo na buri kimwe muri iyi ndirimbo. Icyongereza, uko yakozwe; mbese buri kimwe cyuzuyemo ubuhanga.”

Hervé K. we yavuze ko iki cyongereza Bruce Melodie yagikomoye kuri Lucky Fire usanzwe aririmba ikivugisha benshi, ati “ Iki Cyongereza wakoresheje wagikomoye kuri Lucky Fire.”

Iyi ndirimbo nshya ya Bruce Melodie yakozwe mu buryo bw’amajwi na Element, naho amashusho atunganywa na Kenny usanzwe akorera Diamond Platnumz. Amashusho yafatiwe mu cyaro cyo muri Tanzania.

Bruce Melodie yaririmbye Icyongereza cyavugishije benshi
Bruce Melodie ni umwe mu bahagaze neza muri iki gihe mu muziki

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .