Ibyo Yvan Buravan atazibagirwa mu mwaka amaranye igihembo cya Prix Decouvertes (Video)

Yanditswe na Nsengiyumva Emmy
Kuya 16 Ukwakira 2019 saa 03:04
Yasuwe :
0 0

Burabyo Yvan cyangwa se Yvan Buravan ni umwe mu bahanzi bo mu Rwanda bamaze kubaka izina rikomeye, akaba yari amaranye umwaka igihembo cya Prix Decouvertes yegukanye mu 2018.

Buravan yegukanye iki gihembo tariki 8 Ugushyingo 2018, nyuma yo kwemezwa n’akanama nkempurampaka ko ari we ufite impano ihebuje mu bahanzi barenga 1000 bari baratanze ibihangano byabo mu irushanwa. Ibi bivuze ko umwaka usigaje igihe gito cyane ngo urangire afite iki gihembo.

Uwegukanye igihembo cya Prix Découvertes RFI ahembwa ibihumbi $10 akanafashwa gukora ibitaramo mu bihugu bitandukanye bya Afurika bivuga ururimi rw’Igifaransa.

Ibi bitaramo Buravan yabikoze mu bihugu 12. Tariki 20 Gashyantare yahereye muri Mali, asoreza mu mujyi wa Luanda muri Angola tariki 23 Werurwe 2019.

Mu kiganiro na IGIHE, Yvan Buravan yagarutse ku bintu atazibagirwa yagiye ahura nabyo mu gihe yari amaranye igihembo cya Prix Decouvertes by’umwihariko mu bitaramo yakoze ndetse no ku mahirwe anyuranye yagiye agira.

Buravan yagize ati”Njye ntangira umuziki abantu bagiye bambaza icyo nje kongera ku bisanzwe bihari, nkababwira ko mu myaka itanu nshaka kuba umuhanzi uri ku rwego mpuzamahanga. Narabyifuzaga ariko ntazi aho bizaca. Prix Decouvertes yabinshyiriye ku meza biba mu gihe kitanageze kuri ya myaka. Urumva ko ari amahirwe akomeye nagize.”

Yakomeje avuga ko ibyo yarotaga yabibonye kandi bikazana n’indi nyungu kandi mu gihe gito cyane.

Bimwe mu byo Yvan Buravan yungukiye mu gihe cy’umwaka amaze atwaye Prix Decouvertes yavuze ko harimo ibitaramo byinshi yitabiriye.

Muri uru rugendo rw’umwaka Yvan Buravan avuga ko yakozwe ku mutima n’igitaramo yakoreye muri Côte d’Ivoire aho yari azi ko batamuzi agataramira abantu barenga ibihumbi 10 by’abakunzi ba muzika, yishimira ko yahagiriye ibihe byiza bagakunda ibyo yakoze.

Iyo uganira na Buravan avuga ko atazibagirwa igihe yari muri Gabon agasarara habura amasaha make ngo akore igitaramo, iki gihe ngo ntabwo yasarajwe n’uko yaririmbye cyane ahubwo byari ikibazo cy’ikirere cyari cyamuhindutse. Ryari ihurizo rikomeye ariko yiyitayeho cyane bituma ataramira abakunzi ba muzika bari bitabiriye.

Yvan Buravan ntazibagirwa uburyo ku bibuga by’indege by’aho yagiye gutarama mu bihugu bitandukanye Abanyarwanda bamwakiranaga urugwiro.

Uyu muhanzi yemeza ko Angola iza ku isonga ry’ibihugu yagiriyemo ibihe byiza muri 12 yakoreyemo ibitaramo, hagakurikiraho Congo Brazaville na Mali.

Yavuze ko uretse ibihumbi icumi by’Amadolari yahembwe yegukana igikombe, hiyongeragaho amafaranga yahembwaga kuri buri gitaramo yakoraga icyakora yirinze gutangaza umubare wayo.

Buravan ahamya ko hari byinshi yungukiye mu gihe cy’umwaka amaze yegukanye igihembo cya Prix Decouvertes, aha akaba yagarutse ku kuba yarungutse inshuti zinyuranye kandi zamugirira akamaro mu mwuga we.

Uyu muhanzi ahamya ko Social Mula uhatanira iki gihembo ari umwe mu bafite amahirwe menshi yo kwegukana iki gihembo ariko bisaba ko Abanyarwanda bamutora cyane kuko amajwi azagira ariyo ashobora kumuhesha iki gihembo cya Prix Decouvertes ubu kibitse mu Rwanda.

Yavuze ko yahuye na Social Mula ndetse banakunda kuganira bajya inama, nk’umwe mu batwaye iki gihembo amwereka uburyo bwo kuba nawe yacyegukana.

Nyuma y’ibitaramo byinshi yari amazemo igihe ndetse na gahunda zitandukanye zijyanye n’intsinzi yari yagize muri Prix Decouvertes,Yvan Buravan yari amaze igihe mu karuhuko icyakora ahamya ko ubu karangiye agiye kugaruka mu muziki n’indirimbo nshya.

Yvan Buravan avuga ko yari amaze hafi umwaka adashyira hanze indirimbo nshya ariko ubu agiye gutangira kuzisohora. Iby’igitaramo ashobora gukora mu mpera za 2019 uyu muhanzi yatangaje ko hari ibitaranoga neza ariko yemera ko bigenze uko abiteganya yakora igitaramo cyo gushimisha abakunzi be.

Reba ikiganiro kirambuye na Yvan Buravan

Yvan Buravan ngo kwegukana Prix Decouvertes byamwihutishirije inzozi
Yvan Buravan niwe wegukanye iki gihembo muri 2018
Social Mula ari mu bahatanira igihembo cya Prix Decouvertes 2019

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza