Urwibutso rwa Riderman kuri Album ‘Impinduramatwara’ amaze imyaka 10 amurikiye abakunzi be

Yanditswe na Nsengiyumva Emmy
Kuya 1 Mutarama 2021 saa 03:52
Yasuwe :
0 0

Ni karundura mu baraperi akaba umwe mu birahirwa kandi bafite ibikorwa bifatika mu Rwanda, bimuha intebe y’icyubahiro mu muziki nyarwanda. Uwo nta wundi ni Gatsinzi Emery wamamaye nka Riderman mu muziki kuko ari umwe mu baraperi bamaze imyaka myinshi mu muziki Nyarwanda.

Ni umwe mu baraperi bake begukanye umwanya wa mbere mu irushanwa rya Primus Guma Guma Super Star ubwo yabaga ku nshuro ya gatatu , mu ijoro rya tariki ya 10 Kanama 2013.

Azwiho kuba ari umwe mu bazanye impinduramatwara mu gisekuru gishya mu muziki mu myaka ya 2008, by’umwihariko akaza afite umuziki uryoheye amatwi biteye n’uko yungikanyaga amagambo mu nsubirajwi izira ‘ifuti!’

Uyu mugabo w’imyaka 33, yaje yiyita amazina menshi arimo‘’Inkuba, ‘ Nyiri igitero gitera ikitwa amafro nk’igisare’, ‘Cyamatare’ n’andi mazina menshi.

Yaryohereje benshi babyirukaga muri icyo gihe kugeza n’uyu munsi abavutse bakumva ibihangano bye baranurirwa, kuko yisanisha na buri gisekuru kandi akagendana n’ibigezweho bigatuma ahora ari mu bahanzi bakunzwe mu Rwanda.

Azwiho kuba ariwe muhanzi wa mbere wujuje Petit Stade mu 2008 ubwo yamurikiragamo Album ye ya mbere, yise ‘Rutenderi’.

Mu 2010 yashyize hanze album ya kabiri yise ‘Impinduramatwara, ifite umwihariko w’uko ariyo ya mbere yakoze yiyishyuriye amafaranga.

Yari album ya mbere ya Riderman yakoze nyuma yo kuva mu itsinda rya UTP Soldiers yayifashijwemo n’aba Producers batandukanye bagendaga bamukorera indirimbo z’ubuntu.

Ni album ifite udushya twinshi!

Ni album igizwe n’indirimbo 13 zakozwe n’aba producers batandukanye
Iyi Album iriho indirimbo 13 arizo; Biragaragara yakozwe na Davydenko uyu akaba ari nawe wakoze ‘Impinduramatwara’ yayitiriwe. Junior Multisystem yakozeho indirimbo ebyiri arizo; Imyumvire yabo na Kabutindi.

Producer Jimmy na we yakozeho ebyiri arizo Maritiri na Africa ndota. Lick Lick niwe wakozeho indirimbo nyinshi kuko yakozeho enye zirimo Underground, Nanjye sinjye, Abo turibo na Umwana w’Umuhanda.

Izi ziyongeraho Nyereka icyo nkora yakozwe na Ishimwe Clement, Bombori bombori yakozwe na Mastola ndetse na Nakoze iki yakozwe na Dr Jack.

Riderman avuga ko iyi album gukorwaho n’aba producers benshi ari uko yifuzaga gutanga ibintu byiza kurusha ibyari gukorwa n’umuntu umwe.

Riderman yakoze iyi album afite umujyanama

Nyuma yo kumurika Album ya mbere nta mujyanama afite, Queen Ally mwene wabo yasabye Muyoboke Alex kuba yafata Riderman.

Muyoboke wareberaga inyungu za Tom Close yababwiye ko bitakunda ahubwo abizeza kubaha undi muntu bakorana. Nguko uko Riderman yisanze akorana na David Bayingana.

Guhera mu 2008 Riderman ni umwe mu bahanzi bagihagaze neza mu muziki nyarwanda

Mu kiganiro na IGIHE, Riderman avuga ko atazibagirwa ukuntu atumvikanye na Bayingana ku isohoka ry’indirimbo ‘Bombori bombori’.

Ati ”Iyi ndirimbo yakorewe muri studio ya MC Monday, nta kintu na kimwe nari nayishyuyeho. Yarakozwe irarangira, igihe cyo kuyisohora kigeze abajyanama banjye bambwira ko itasohoka kuko ari afrobeat cyane.”

Iki gihe byasabye imbaraga z’undi muntu Riderman yirinze kuvuga, wayisohoye ayijyanira ku maradiyo iza kuba indirimbo nziza ndetse yanakunzwe cyane.

Uretse aka kantu kabayemo ko kutumvikana kuri iyi ndirimbo, Riderman avuga ko Bayingana yamufashije cyane ndetse amushimira bikomeye ibyo bakoranye.

Riderman abaye ari igihugu, ‘Indirimbo Abana b’imuhanda yaba iy’icyo gihugu…

Anyura kuri buri ndirimbo iri kuri iyi album, Riderman yagarutse ku busobanuro bwa zimwe mu ndirimbo zikomeye ziyiriho.

‘Abana b’imuhanda’, Riderman avuga ko iyi ndirimbo yayikoze avuga ubuzima bwari bugoranye bwa benshi mu rubyiruko. Akurikije uko iyi ndirimbo yamufashije mu kuzamura izina rye no kurikomeza, ahamya ko abaye ari igihugu yahita iba indirimbo yubahiriza icyo gihugu.

Indi ndirimbo agarukaho ni iyitwa ‘Underground’ yakunzwe cyane, Riderman avuga ko yayikoze kubera igihe barimo.

Ati “Yaba njye, The Ben, Meddy, King James n’abandi benshi icyo gihe twari underground, njye rero nahaye isezerano abakunzi banjye mbizeza ko nzagerayo kandi ntekereza ko baribonye.”

Mu majoro yagenze akora kuri iyi album, Riderman yavuze ko atazibagirwa ubwo yari avuye gukora indirimbo muri Celebrities Music ya Jimmy Pro yabaga mu Gatsata, ari mu nzira kuko hari mu ijoro abajura bakamwirukankana.

Ati ”Icyo gihe nari umusore, nkora imyitozo ihagije. Narirutse ndabasiga rwose.”
Iyi album yihariye kuba iriho indirimbo zivuga ku buzima bw’uyu muraperi cyangwa ubwo yabonaga ku bandi bantu.

Urugero ni nka ‘Nakoze iki’ Riderman avuga ko yakoze afite agahinda gakomeye kuko inshuti ze nyinshi zari zaramuvuyeho nyuma yo gutandukana n’itsinda rya UTP Soldiers yatangiriyemo umuziki.

Ni Album avuga ko yakomeje inganzo ye ndetse n’ubuzima bwe muri rusange

Iyi album ya mbere asa n’aho yashoyemo amafaranga ni imwe mu zakunzwe cyane imufungurira amarembo yo gukorana n’ibigo bitandukanye. Mu gukora iyi album niho Riderman yafatiye icyemezo cyo gusezera burundu ibijyanye na ‘Beef’ cyangwa gushyamirana n’abandi bahanzi.

Riderman ni umwe mu bahanzi bakora Hip Hop babashije gutwara ibihembo bitandukanye mu Rwanda birimo na Primus Guma Guma

Uyu muraperi avuga ko yamwinjirije amafaranga byibuza agereranyije n’iya mbere yari yakoze mu 2008.

Ati ”Urumvaiya mbere nayimuritse nta muterankunga n’umwe mfite, ariko icyo gihe nari nababonye."

Aimable Twahirwa wayoboraga Maison des jeunes Kimisagara yari umwe mu baterankunga bakuru, AHUPA, iyari Minisiteri y’Urubyiruko n’Umuco icyo gihe n’abandi benshi.

Kuba yari afite abaterankunga byatumye uyu muraperi noneho agira utwo asagura bituma no kuri konti ye hagira ikijyaho.

Ibitaramo byo kumurika iyi album byabereye mu mujyi wa Kigali ndetse no mu karere ka Rubavu. Riderman avuga ko ari ubwa mbere yari akoze ibitaramo bibiri byo kumurika Album kandi byose bikitabirwa cyane.

Yashimiye buri muntu wese wakoze kuri iyi album, by’umwihariko ashimira abafana be babanye kuva atangiye umuziki kugeza uyu munsi.

Avuga ko atazibagirwa ukuntu abafana bamweretse urukundo mu bitaramo byo kuyimurika. Ntihinyuzwa Patrick uri mu bafashije Riderman mu gitaramo cyo kumurika iyi album, yabwiye IGIHE ko byari ibirori bikaba ibintu abakunzi b’umuziki batazibagirwa.

Ati "Wasangaga kuva ku muhanzi kugera ku mufana bafite urukundo rudasanzwe rw’umuziki. Ndibuka ko saa kumi z’umugoroba kimwe cya kabiri cya stade cyari cyuzuye."

Riderman yemeza ko abafana n'abandi bafatanyabikorwa bagize uruhare mu kuba uwo ari we uyu munsi

Rwigamba Nadine, umwe mu bafana bitabiriye igitaramo cy’i Kigali, ahamya ko urukundo akunda Riderman ari rwo rwatumye yumva kiriya gitaramo kitamucika. Yavuze ko atazibagirwa uko yakigiyemo atorotse iwabo anyuze mu idirishya yataha agakubitwa bikomeye.

Uyu mukobwa uri mu itsinda ry’abafana ba Riderman ryiyise Ibisumizi, yavuze ko ko muri icyo gitaramo ari bwo mbere yabonye umukunzi w’uyu muraperi kuko yaserukanye na Asinah bakundanaga muri iyo myaka.

Ibitaramo byo kumurika iyi album ya kabiri ya Riderman byari birimo abandi bahanzi nka Jay Polly, Bull Dogg, Tom Close, Uncle Austin, Ganzo, Kamichi, Knowless, Rafiki, Naason, Pacson, Oda Paccy, Urban Boys, Dream Boys, Just Family, Mani Martin na Bably.

Riderman yemeza ko imyaka ye ya mbere mu muziki yamubereye umusingi w'ubuhanzi bwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .