Ibyo wamenya ku bukangurambaga ‘Ubumuntu’ bwatangijwe n’abegukanye ikamba rya Miss Rwanda, uzatsinda azegukana 1000$

Yanditswe na Nsengiyumva Emmy
Kuya 17 Ukuboza 2020 saa 03:00
Yasuwe :
0 0

“Nyampinga Foundation”, ihuriwemo n’abakobwa batandatu begukanye ikamba rya Miss Rwanda, yatangije ubukangurambaga bwiswe ‘Ubumuntu’ bugamije gukangurira abanyarwanda gufashanya.

Ubukangurambaga ‘Ubumuntu’ bugamije gukangurira Abanyarwanda kugira neza no gukorera ibikorwa by’urukundo abatishoboye yaba abo babana, abo bafitanye isano, abaturanyi, inshuti n’abavandimwe.

Ni igikorwa bifuza ko cyaba ngarukamwaka, muri uyu mwaka kizatangira tariki 21 Ukuboza kirangire ku wa 25 Ukuboza 2020 mu gihe uwatsinze we azatangazwa tariki 26 Ukuboza 2020.

Miss Jolly Mutesi uhagarariye uyu muryango mu Rwanda, yabwiye IGIHE ko batekereje iki gikorwa nyuma yo kwitegereza bagasanga Isi ifite ikibazo cy’uko abayituye bihugiraho cyane bakibagirwa inshuti n’abavandimwe.

Ati “Uretse n’iki gihe cya Covid-19, Isi iri kudushyira mu bihe bisa n’aho bigoye, uko iterambere ryihuta ni ko buri wese yihugiraho tukibagirwa abaturanyi inshuti n’abavandimwe badukeneye.”

“Iyo witegereje usanga abantu dukomeje kugenda dutakaza ubumuntu, kugira neza bikaba ibintu bigoranye. Ni muri urwo rwego twatekereje uburyo twakangurira abantu kwirukankana n’umuvuduko w’Isi ariko ntidusige ubumuntu.”

Miss Mutesi yongeyeho ko abantu badakwiye kumva ko gufasha bisaba kugira ibya mirenge ati ”Kugira neza ntibisaba ikiguzi gihambaye. Twaratekereje dusanga twakoresha amazina yacu tugakangurira abantu kugira ubumuntu.”

Umuntu uzitabira ubu bukangurambaga bizajya bimusaba kwifata ifoto cyangwa amashusho ari gukora igikorwa cy’ubumuntu, akayasangiza abamukurikira ku mbuga nkoranyambaga ndetse akabimenyesha [Tag] “Nyampinga Foundation” n’abanyamuryango bayo ku bo byoroheye.

Jolly Mutesi niwe uhagarariye uyu muryango mu Rwanda

Uzaba yatoranyijwe nk’uwakoze igikorwa cy’ubumuntu kigakora ku mitima ya benshi, azahabwa ishimwe ry’amadolari igihumbi [ni ukuvuga hafi miliyoni y’amafaranga y’u Rwanda].

Abajijwe impamvu bifuje gushyiraho iki gihembo, Miss Jolly Mutesi yagize ati “Twifuje gushyiraho igihembo, kugira ngo dukangurire abantu kubikora ku bwinshi. Nyuma y’iminsi yatanzwe twe ubwacu tuzareba uwakoze igikorwa cy’indashyikirwa hanyuma tumushimire bityo bitere ishyaka abandi.”

Uyu mukobwa asanga umuntu atagatewe ikimwaro no kubwira Isi ko yagize neza by’umwihariko mu gihe yaba ashishikariza n’abandi kubikora.

Ati ”Ni byiza ko gufasha bitaba ibyo kwirata, kubivuga ni ukugerageza gushishikariza abandi kubikora.”

Uyu muryango ‘Nyampinga Foundation’ urimo Bahati Grace wegukanye ikamba rya Miss Rwanda mu 2009, Mutesi Kayibanda Aurore wegukanye ikamba rya Miss Rwanda mu 2012, Akiwacu Colombe waryegukanye mu 2014, Kundwa Doriane waryegukanye mu 2015, Mutesi Jolly waryegukanye mu 2016, Nishimwe Naomie ugifite ikamba na Larry Muganwa wiyemeje kwifatanya n’aba bakobwa.

Bahati Grace wegukanye ikamba rya Miss Rwanda mu 2009
Kayibanda Aurore yegukanye ikamba rya Miss Rwanda mu 2012
Akiwacu Colombe yegukanye ikamba rya Miss Rwanda mu 2014
Kundwa Doriane niwe wegukanye ikamba rya Miss Rwanda mu 2015
Mutesi Jolly niwe wegukanye ikamba rya Miss Rwanda mu 2016
Nishimwe Naomie ugifite ikamba rya Miss Rwanda nawe yiyemeje gufatanya na bakuru be

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .