Iki gitaramo cyo kumvisha abatuye mu Mujyi wa Hannover mu Budage album nshya ya The Ben yise ‘The Plenty love’ byitezwe ko kizaba ku wa 22 Werurwe 2025. Mu bazamufasha ku rubyiniro harimo Bill Ruzima.

Uyu muhanzi akimara kubona ko agiye guhurira ku rubyiniro na The Ben, yagaragaje ibyishimo bidasanzwe ahamya ko uyu mugabo ari umwe mu bahanzi beza bahuye mu buzima, cyane ko yigeze kumufasha kuririmba ‘live’ mu gitaramo cyo ‘Kwita izina’ cyabaye mu 2017.

Uyu muhanzi mu nkuru ngufi yabariye abakunzi be n’abamukurikira, yavuze ko yakuze yifuza guhura na The Ben.

Ati “Nk’umuhanzi ukiri muto wo mu Rwanda, u Burundi na Uganda, nahoraga nifuza guhura na The Ben, umuhanzi ukomeye cyane mu Karere ka Afurika y’Iburasirazuba. Amahirwe akomeye nabonye ni uko namubonye bwa mbere mu 2017 […] byarushijeho kuba byiza kuko twanataramiye hamwe ku rubyiniro rumwe, turirimba indirimbo dukunda cyane ingendo y’abeza.”

Uyu musore uhamya ko The Ben ari umuhanzi bakiganira ndetse amutera imbaraga mu mikorere, ati “Kugeza ubu aracyanyoherereza ubutumwa ambwira ati Bill, komeza uririmbe, komeza uririmbe! Nanjye nti nzakomeza kuririmba.”

Kuri ubu Bill Ruzima asigaye atuye mu Budage aho yagiye kwiga.

Bill Ruzima agiye kongera guhurira na The Ben mu gitaramo

Mu 2017 The Ben yari yatumiwe nk'umuhanzi mukuru mu gitaramo cyo 'Kwita izina'

Bill Ruzima ni umwe mu bari bagize itsinda ryafashaga The Ben ku rubyiniro

Bill Ruzima ntajya yibagirwa ko mu 2017 yaririmbanye na The Ben indirimbo 'Ingendo y'abeza'

Mu 2017 The Ben yafashwaga n'itsinda ry'abari bari kwiga umuziki mu ishuri rya muzika ry'u Rwnada barimo Igor Mabano, Ariel Wayz, Kenny Sol n'abandi benshi