00:00:00 IGIHE NETWORK KN KINYARWANDA EN ENGLISH FR FRANCAIS

Ibitekerezo bya La Fouine ku kibazo cy’abimukira b’i Burayi

Yanditswe na Uwiduhaye Theos
Kuya 30 June 2022 saa 10:18
Yasuwe :

Umuraperi w’Umufaransa ufite inkomoko muri Maroc, Laouni Mouhid, wamamaye mu muziki nka La Fouine yagaragaje ko nta ruhande ahagazemo ku gusubiza abimukira b’i Burayi iwabo cyangwa kubarekera mu bihugu barimo, ariko agaragaza ko adashyigikiye ihohoterwa iryo ari ryo ryose ribakorerwa.

Uyu muhanzi avuka ku babyeyi b’Abanya-Maroc ariko we yavukiye mu Bufaransa. By’umvikane avuga ko yavutse ku babyeyi b’abirabura bishoboka ko byagoye kugera mu Bufaransa.

Kuri uyu mugabane hamaze iminsi harahagurukiwe ikibazo cy’abimukira biganjemo abo muri Afurika ndetse mu minsi yashize mu bageze mu Bwongereza mu buryo butemewe n’amategeko bari bagiye kuzanwa mu Rwanda bipfa ku munota wa nyuma.

Mu kiganiro La Fouine uri mu Rwanda yagiranye n’itangazamakuru gitegura igitaramo agiye gukorera mu Rwanda ku wa Gatandatu tariki 2 Nyakanga, 2022 muri Car Free Zone mu Mujyi Rwagati, yabajijwe uruhande ahagazeho nk’umwe mu birabura baba mu Bafaransa, niba yumva ko basubizwa mu bihugu byabo cyangwa bakaguma mu Burayi.

Ati “Nk’umuhanzi, ni urugamba rwanjye kandi nzi ko hamwe no gukoresha amagambo ndetse n’umuziki dushobora gukora byinshi byiza kurusha Leta zimwe. Ibihugu by’i Burayi byibagirwa ko abimukira ari abantu nk’abandi bakwiriye icyubahiro. Nka La Fouine, ndamagana ihohoterwa iryo ariryo ryose abimukira ku isi yose bakorerwa.”

Nk’umuntu wabaye igihe kinini mu Bufaransa yavuze ko nta vangura riba mu nzu zo mu Mijyi yiganjemo ituyemo abakene zizwi nka ‘ghetto’ kubera ko abantu baba barakuriye muri ibyo bice abenshi baba ari abimukira.

Aba bose avuga ko biga kubaho babanye neza kuko baba babayeho mu buzima bumwe kandi bukomeye. Avuga ko iyo ugiye mu Murwa Mukuru nka Paris cyangwa ahandi mu Mijyi ikomeye yiganjemo abazungu ari ho uhura n’ivangura.

La Fouine mu ndirimbo ze agerageza kuririmba aha abantu ihumure n’icyizere by’ejo hazaza avuga ko nk’Umunyafurika yagiye akorana n’abandi bagenzi be.

Uyu muhanzi mu myizerere ye abona Afurika nk’amizero y’Isi yose kuko ari umugabane ufite umutungo kamere n’ibindi yihariye byinshi bitaba ku yindi migabane.

Afite indirimbo yahimbye yise ‘Afrika’agaragazamo akababaro aterwa n’ibibazo biri mu bihugu byinshi bitandukanye kuri uyu mugabane. Hari n’aho aririmba agaragaza ko Mandela atari akwiriye gufungwa azira kurwanya ivangura n’ibindi.

La Fouine agiye kumara umunsi ageze mu Rwanda. Yaje asanga Zozibini Tunzi wo muri Afurika y’Epfo wegukanye Ikamba rya Miss Universe 2019 wageze i Kigali kuri uyu wa Gatatu, tariki 29 Kamena 2022.

Uyu mukobwa yagereye mu Rwanda rimwe na Jarrrel Carter wo muri Roc Nation na Gordon Williams bakunze kwita ‘Commissioner’ akaba umwe mu ba-producer bakomeye muri Leta Zunze Ubumwe za Amerika.

Aba bose baje bitabiriye Iserukiramuco rya Africa in Colors rigiye kubera i Kigali kuva kuri uyu wa 30 Kamena 2022 kugeza tariki 3 Nyakanga 2022.

Byitezwe ko kuri uyu wa 30 Kamena 2022 muri Kigali Radisson Blu hazabera igitaramo cyo guha ikaze abashyitsi bitabiriye iri serukiramuco, kikazacurangamo DJ Toxxyk.

Kwinjira muri iki gitaramo bizaba ari ibihumbi 10 Frw. Ku wa 1 Nyakanga 2022 umunsi hazafungurwa ku mugaragaro iri serukiramuco, hitezwe ibikorwa bitandukanye byiganjemo ibiganiro bizatangwa n’abahanga mu by’imyidagaduro biyambajwe.

Ku wa 2 Nyakanga 2022 uretse ibikorwa binyuranye bizaranga iri serukiramuco, hitezwe igitaramo gikomeye kizabera muri Car Free Zone mu Mujyi wa Kigali ahazaririmba abahanzi barimo La Fouine, Riderman, Afrique, Chris Hat na Angel Mutoni.

Kwinjira muri iki gitaramo bizaba ari ibihumbi 7 Frw ku bari kugura amatike mbere, ibihumbi 10 Frw mu myanya isanzwe ndetse n’ibihumbi 20 Frw mu myanya y’icyubahiro.

Tariki 3 Nyakanga 2022 byitezwe ko ari bwo Iserukiramuco ‘Africa in Colors’ rizaba risozwa nyuma y’igitaramo kizahuza abahanzi barimo Magic System, Ariel Wayz, Kenny Sol, Okkama, Chris Eazy n’abandi.

La Fouine yagaragaje ko adashyigikiye ihohoterwa rikorerwa abimukira aho bari hose ku isi
La Fouine yageze mu Rwanda ku wa Gatatu, ku wa Kane agirana ikiganiro n'itangazamakuru
La Fouine yagiranye n'itangazamakuru kuri uyu wa Kane mbere yo gutangira ibitaramo azaririmbamo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .