00:00:00 IGIHE NETWORK KN KINYARWANDA EN ENGLISH FR FRANCAIS

Ibitaravuzwe ku ‘isupu’ yatindije ikiganiro cya Wizkid n’abanyamakuru b’i Kigali

Yanditswe na Nsengiyumva Emmy
Kuya 17 Mutarama 2023 saa 03:03
Yasuwe :

Inkuru itaravuzwe mu myaka irindwi ishize, ni ukuntu Wizkid yanze kwitabira ikiganiro n’abanyamakuru atabonye isupu (isosi) y’imboga z’iwabo akunda kubi, bikamukerereza isaha irenga.

Hari mu 2016 benshi barabyibuka ubwo Wizkid yageraga i Kigali yitabiriye igitaramo cya ‘Beer Fest’.

Akigera mu murwa ku wa 25 Kanama 2016, yari ategerejwe n’abanyamakuru benshi bari bakoraniye muri Kigali Marriott Hotel ariko byabasabye kwihangana bamutegereza umwanya.

Uyu musore akigera kuri hoteli yagombaga gucumbikamo, yasanze abanyamakuru bamutegereje ariko we ahitira mu cyumba aho yamaze igihe kirenga isaha.

Ababyibuka ntibazibagirwa uburakari bw’abanyamakuru bari batangiye kwivovota ariko kuko yari umuhanzi utegerejwe cyane ko bwari ubwa mbere ageze i Kigali, nta wigeze ahaguruka ngo agende.

Nyuma y’isaha irenga bategereje umuhanzi wari wahageze kare, abanyamakuru bagiye kubona babona arahingutse akanyamuneza karagaruka ikiganiro kiraba ndetse bamwe imitwe y’inkuru bayikorera aho.

Icyakora ibyavuzwe byose, nta wigeze agaruka ku cyatumye uyu muhanzi atinda kwitabira ikiganiro n’abanyamakuru, yewe ababashije kubimenya ni mbarwa kuko intambara yari iri kurota mu cyumba aho yari ari kumwe n’abateguye igitaramo ndetse n’abagize itsinda rireberera inyungu ze.

Umwe mu bantu bari mu ikipe yatumiye Wizkid i Kigali yahishuye ko uyu muhanzi yatinze kwitabira ikiganiro n’abanyamakuru kubera ko yari yabuze isupu akunze kunywa.

Ati “Sinibuka ibyo iyo supu ikozemo ariko ndacyibuka ko ari iy’imboga, yaraje abaza muri hoteli asanga ntayo bafite yanga kujya mu kiganiro n’abanyamakuru biraturenga.”

IGIHE yemenye amakuru ko uyu muhanzi akunze kwigendanira imboga zikorwamo iyi supu, ku buryo aho agiye kurara iyo ayihabuze abaha imboga ze bakayimukorera.

Bitewe n’uko uyu muhanzi yari amaze iminsi muri Tanzania aho yari afite ikindi gitaramo gikomeye, byatumye imboga yari yitwaje zishirirayo agera i Kigali impamba ayimariye i Dar Es Salaam.

Icyo gihe bitewe n’uko na restaurants z’abanya Nigeria zari mbarwa mu Mujyi wa Kigali ndetse abenshi batazizi, byagoye abateguye igitaramo kubona aho bamukurira iyi supu bo batari banasobanukiwe uko ikoze.

Uwaduhaye amakuru wari imbere mu batumiye Wizkid yagize ati “Yatubwiraga ko adashobora kujya mu kiganiro atanyweye ku isupu ye, icyo gihe twakubitiye mu gikoni na manager we turayibura, ikibazo cyari gikomeye twe b’inaha ntitwari tunazi uko iyo supu imeze byibuza.”

Icyakora mu gihe bari muri izo mpaka babunza imitima ngo bashake aho bakura iyo supu, umwe mu bantu bari aho yababwiye ko imboga ikorwamo bashobora kuzisanga mu isoko rya Kimironko.

Imodoka yari ihari iteguye yahise ijyamo umujyanama wa Wizkid n’umwe mu bari batumiye uyu muhanzi berekeza mu isoko rya Kimironko birangira za mboga bazibonye.

Ati “Tukizigeza kuri hoteli yahise atekerwa agasupu aragahuta, umutekano uraboneka ajya mu kiganiro.”

Abajijwe ubwoko bw’imboga zakozwemo iyi supu yavuze ko atazibuka neza icyakora ahamya ko ari imboga rwatsi.

Mu gihe yatumirwaga i Kigali, Wizkid yari agezweho mu ndirimbo nka One Dance yahuriyemo na Drake, Ojuelegba, Final (Baba Nla), Show You the Money, In My Bed, Bad ft Tiwa Savage, Mamacita yaririmbanye na Tinie Tempah n’izindi nyinshi.

Icyo gihe Wizkid yakoze igitaramo gikomeye cyanyuze abakunzi b’umuziki bari bakoraniye ahitwa Rugende.

Abari mu itsinda ryatumiye Wizkid, ntibazibagirwa ibyo uyu muhanzi yabakoze kubera isupu y'imboga
Nyuma y'isaha irenga abanyamakuru bamutegereje, Wizkid wari umaze guhuta agasupu ke yahise yitabira ikiganiro
Wizkid yahingutse imbere y'abanyamakuru abasaba imbabazi zo gukerererwa
Wizkid amaze kunywa agasupu yari yabuze yarashyize yemera kwitabira ikiganiro n'abanyamakuru
Wizkid yari ategerezanyijwe amatsiko i Kigali, igitaramo cye cyabereye i Rugende ariko barakubita baruzura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .