Ibitaramo byatumiwemo abanyamahanga bigasiga umugani kubera kwitabirwa ku kigero cyo hasi

Yanditswe na Uwiduhaye Theos
Kuya 12 Ugushyingo 2019 saa 11:32
Yasuwe :
0 0

Akenshi usanga iyo hari igitaramo cyateguwe, bamwe baba bashyashyanye bashaka kujya kwidagadura banareba abahanzi bihebeye bitewe n’ibihangano byabo bibanyura.

Ariko si buri gihe hategurwa igitaramo ngo bashishikazwe no kucyitabira ku buryo usanga hari ibirangira hajemo abantu mbarwa.

Bimwe mu bituma ibitaramo bimwe bititabirwa hazamo kutamenyekanisha igitaramo ku buryo bukwiye, Igihe igitaramo kibereyemo, guhitamo umuhanzi utajyanye n’ibyo abanyabirori bifuza, igiciro cyo kwinjira, ubumenyi buke k’uwateguye igitaramo, aho kigomba kubera n’ibindi.

IGIHE yakusanyije ibitaramo byabayeho mu Rwanda bigasiga umugani kubera kwitabirwa n’abantu bake cyane.

Igitaramo cya Kiss Daniel

Kiss Daniel, umwe mu bahanzi bakomeye muri Nigeria yakoreye igitaramo mu Mujyi wa Kigali mu ijoro ryo kuwa 27 Gashyantare 2016, asiga abafana bijujuta abandi bamugaya ku mpamvu zitandukanye.

Kiss Daniel yaje mu Mujyi wa Kigali ku butumire bwa Royal Entertainment ya Gakire Denise usanzwe ukina filime na mugenzi we w’umunyamideli witwa Camille Yvette.

Muri iki gitaramo Kiss Daniel yabanjirijwe n’abahanzi Charly & Nina ndetse na Bruce Melodie bo mu Rwanda. Cyagombaga gutangira saa moya ariko byageze saa yine n’igice muri Serena Hotel hari abafana barenga gato mirongo itanu.

Abahanzi bo mu Rwanda bamaze kuririmba, hakurikiyeho icyiciro cyo kwerekana imideli yateguwe na Francis Zahabu, igikorwa cyasojwe saa sita zuzuye. Kuva saa sita z’ijoro kugeza saa saba, abafana bake bari baje, bategereje Kiss Daniel amaso ahera mu kirere.

Byageze igihe bamwe barambirwa gutegereza uyu Munya-Nigeria batangira gutaha urusorongo abandi bajya mu biganiro mu matsinda kugira ngo amasaha yigire imbere barebe umuhanzi wari wabahuruje.

Kiss Daniel yageze kuri Serena Hotel saa saba zibura iminota mike. Abateguye igitaramo babwiye abafana ko uyu muhanzi yari acyitegura.

Anidugbe Oluwatobiloba Daniel wari wishyuwe amadolari ibihumbi icumi [akabakaba miliyoni umunani y’u Rwanda]. Yaririmbye mu gihe cy’iminota 17 gusa arangije azinga ibyuma aritahira.

Abari baje kumureba [babarirwa muri 200] basigaye bibaza niba igitaramo gisojwe cyangwa niba agiye gufata akaruhuko akagaruka. Iki gitaramo nacyo kiri mu byatumiwemo abanyamahanga bitagize amahirwe yo kwitabirwa ndetse kikaba cyaranateye ipfunwe uwari watumiwe akaririmba ameze nk’utabishaka.

Darassa yaje i Kigali, igitaramo cye cyitabirwa n’abantu batarenga 10

Muri Kanama 2017, Umuraperi Darassa wari uri mu bagezweho muri Tanzania no muri Afurika y’Iburasirazuba muri rusange, yaririmbiye bwa mbere mu Mujyi wa Kigali, igitaramo cye cyitabirwa n’abantu mbarwa.

Uyu muhanzi ubusanzwe witwa Shariff Thabeet [Darassa] icyo gihe yari agezweho mu ndirimbo "Muziki" yahuriyemo na Ben Pol yanatumye izina rye ritumbagira igakundwa mu buryo buhambaye mu tubari dutandukanye.

Iyitwa "Too Much"; "Hasara Roho"; "Utanipenda", yakoranye na Rich Mavoko; "Heya Haye", ahuriyemo na Mr. Blue n’izindi.

Igitaramo cy’uyu muhanzi i Kigali byari biteganyijwe ko gitangira ku isaha ya saa kumi n’ebyiri z’umugoroba, gusa ayo masaha nta bantu bacyitabiriye bari bahageze, kuko byibuze abashoboye kuhagera mbere bari bahari guhera saa moya n’igice.

Mu gihe kingana n’amasaha akabakaba ane abahageze bacurangiwe umuziki na bamwe mu ba DJs batumiwe barimo Marnaud, Toxxyk n’abandi. Itsinda ry’ababyinnyi rya Jabba Juniors, ryagiye ku rubyiniro saa yine zishyira saa tanu, ribyina akanya gato abitabiriye igitaramo biganjemo abana n’urubyiruko bava mu dukundi bari biremyemo baregerana.

Umuhanzi Darassa wari ugeze mu Rwanda bwa mbere akakirwa n’abafana mbarwa mu gitaramo cye, ntiyigeze yikoza ku rubyiniro ahubwo yegereye igikundi cyarimo abitabiriye atangira kuririmba indirimbo ze zizwi. Yahereye ku yitwa "Too Much" aririmba ajyana n’abafana bacye bari bahari, asoza aririmbye eshatu gusa.

Darassa ntiyahiriwe mu gitaramo cya mbere yakoreye i Kigali, cyitabiriwe ku kigero cyo hasi

Dr Jose Chameleone na Amani wo muri Kenya

Ku itariki ya 23 Kanama 2014 nibwo Chameleone na Amani bakoreye igitaramo i Gikondo cyitabiriwe n’abantu batageze no kuri 50 bari baje gutaramirwa n’ibi byamamare.

Ubuke bw’abantu bitabiriye iki gitaramo bwatumaga umuhanzi waririmbaga ku rubyiniro atera akiyikiriza na za nyiramubande zimusubiramo.

Mu gitaramo cya Chameleone na Amani cyitabiriwe n'abantu mbarwa

Radio na Weasel

Ku wa 25 Nyakanga 2015 mu Rwanda habereye igitaramo, cyiswe ‘Kwibohora Concert’ cyaranzwe n’ubwitabire bwari ku kigero cyo hasi cyane ugereranyije n’uburemere bw’amazina y’abahanzi bo mu Rwanda na Uganda bari bacyitabiriye.

Urebye intebe ibihumbi zari zateganyirijwe abafana muri Serena Hotel, ukareba n’uburyo abaje kureba iki gitaramo bari bake cyane biguha isura y’ubwitabire buke.

Mu cyumba cyabereyemo igitaramo wasangaga bamwe bakoze udutsiko batera ibiparu abandi ugasanga bibereye kuri WhatsApp baganira n’inshuti.

MC Kate Gustave wari uyoboye iki gitaramo, amaze kubona ko hari abantu bibereye kuri WhatsApp n’abandi basa nk’abaje mu masengesho, yafashe ijambo asaba buri wese kujya mu mwuka w’igitaramo bakareka kwikomeza ndetse bakishima nubwo bari bake.

Radio na Weasel nabo bakoreye igitaramo mu Rwanda cyitabiriwe n'abantu mbarwa

Kidum nawe byamubayeho!

Muri Nyakanga 2016 umuhanzi ukomeye muri Afurika y’Iburasirazuba, Nimbona Jean Pierre [Kidum Kibido Kibuganizo] yakoze igitaramo cyiswe ‘Rosty Vibration Party’ cyabereye i Gikondo.

Igitaramo cyari cyatumiwemo Kidum, Big Farious na Charly&Nina, cyabereye ahasanzwe habera imurikagurisha i Gikondo mu Karere ka Kicukiro mu ijoro ryo kuri uyu wa 1 Nyakanga 2016.

Ni igitaramo cyagaragayemo ibintu byatunguye benshi, Big Farious wari mu bahanzi bakomeye bagomba kuririmba byarangiye atahakandagije ikirenge mu gihe abamutumiye bari bijeje itangazamakuru ko ‘agomba kuboneka’.

Kidum yaririmbiye abafana babarirwa muri magana abiri ndetse umubare munini wari wiganjemo abatumirwa gusa kuko mu myanya y’icyubahiro ariho hari hahagaze ababarirwa mu ijana na mirongo itanu. Igitaramo cyatangiye gitinze ugereranyije n’amasaha yari yatangajwe n’abari bagiteguye.

Abafana bari mbarwa ugereranyije n’ubunini bw’inzu yabereyemo igitaramo, mu gice cyagenewe abafana baciriritse hari hameze nk’ikibuga cy’umupira cyambaye ubusa. Abafana bari bake bikiyongeraho ko na bo baje urusorongo ku buryo igitaramo cyatangiye ahagana saa yine z’ijoro.

Kidum nawe yakoreye igitaramo mu Rwanda cyitabiriwe n'abantu mbarwa

2 Face Idibia (2Baba)

Umunya-Nigeria Innocent Ujah Idibia wamamaye nka 2Face Idibia, nawe yaje mu Rwanda ahava abihiwe kubera igitaramo cye kitabiriwe ku kigero cyo hasi.

Igitangaje kuri iki gitaramo ni uko ari kimwe mu bitaramo byari bimaze igihe bivugwa ko bikomeye mu Mujyi wa Kigali ariko nticyamamajwe ‘ari nayo ntandaro yo kutitabirwa’.

Abatumiye 2Face batunguwe n’uko ku munsi w’igitaramo bisanze muri Serena Hotel bari kumwe n’abatumirwa bake n’abanyamakuru gusa.

Igitaramo cyagombaga gutangira saa moya zuzuye ariko byageze saa yine abafana bagera kuri 30 bumva imiziki gusa yacurangwaga na Dj Lenzo. MC Tino wari uyoboye igitaramo yabwiye abafana ko agiye kubazanira umuhanzi ukunzwe mu Rwanda akabaririmbira; Jack B yahise ajya ku rubyiniro aririmba indirimbo eshatu arataha.

Umuziki warakomeje uracurangwa MC Tino agacishamo akamara abafana irungu ababwira ko 2Face agiye kuza kuririmba. Yaje kurabukwa umuhanzi Gabiro Guitar mu bafana ahita amuhamagara ngo aze aririmbe undi na we ntiyazuyaza ataramira bake bari bitabiriye.

Nyuma ya Gabiro Guitar nabwo MC Tino yasabye Dj gukomeza gucuranga mu gihe bategereje 2Face. Abagize itsinda ryita ku nyungu za 2Face bari aho igitaramo cyabereye ubona batishimye na gato, bazengurukaga mu cyumba bakongera bagasohoka nyuma y’iminota mike bakagaruka.

Wabonaga ko basa n’abatunguwe bikomeye n’ubwitabire buke bw’abaje mu gitaramo ari nacyo cyatumye badahita bemerera uyu muhanzi ko aza kuririmba.

Mbere yo kuzana 2Face ngo aririmbe babanje kugirana ibiganiro mu bihe bitandukanye na Murerwa Belinda wateguye iki gitaramo, basaga n’abajya impaka mu buryo bwo kutumvikana.

Byageze saa tanu abafana batangira kwijujuta bibaza niba 2Face atakiririmbye, ni nako abareba inyungu ze bakomezaga kunyuranamo bashaka icyakorwa ariko ukabona ko babuze amahwemo.

Ahagana saa tanu n’iminota 20 abagize itsinda rya 2Face bagiye kumukura mu cyumba bamusaba ko yaza akaririmba arabemerera ariko mbere y’uko ajya ku rubyiniro yagumye hanze yanga guhita yinjira ubona basa n’abamwinginga bamusaba ko yakwihangana akaririmba.

Yaje kuva ku izima yinjira ahabereye igitaramo azenguruka mu bafana akora mu kiganza cya buri wese.

Yahise agira ati “Kigali, muraho bantu banjye, nishimiye ko mwaje, uko mungana kose ndabishimiye […] Ntabwo tubivugaho byinshi murabizi, ndabashimira mwebwe mwaje. Ngiye kubakorera igitaramo cyihariye twishimane turi bake.”

Yaririmbye indirimbo enye zirimo ‘If Love Is A crime’, ‘African Queen’ na ‘Implication’ zishimiwe cyane asezera abafana arataha.

2Face Idibia yaririmbiye abantu mbarwa mu gitaramo cyo mu Rwanda

Igitaramo Uncle Austin yatumiyemo Bebe Cool

Bebe Cool nawe ibyabaye ku bahanzi batandukanye bakomeye bo hanze y’u Rwanda batumiwe mu bitaramo bakabura abafana, byamubayeho.

Icyo gihe Uncle Austin yari yamwitabaje nk’icyamamare muri muzika mu karere, mu kumurika album ye ‘Uteye ubusambo’.

Igitaramo cyabaye kuri 30 Kanama 2013 gusa aba bahanzi bombi kimwe n’abari baje kubafasha bisanze aho cyari kubera hari ubwitabire buri hasi cyane dore ko aho cyabereye i Gikondo hari abantu bari hagati 100 na 200.

Uncle Austin yateguye igitaramo atumiyemo Bebe Cool babura abantu

Fik Fameica na Bruce Melodie

Ku wa 8 Nzeri 2018 hari hateganyijwe igitaramo cya Summer Beach Party cyagombaga kubera i Rubavu ku nkengero z’ikiyaga cya Kivu cyagombaga guhuriramo Bruce Melodie na Fik Fameica wo muri Uganda.

Mu buryo butunguranye ku munota wa nyuma iki gitaramo cyaje gupfa nyuma y’uko kibuze abantu dore ko cyari kitabiriwe n’abantu bake cyane nabo bageze aho batangira kwigendera.

Abari bateguye igitaramo bari bakoze ibishoboka byose, imyiteguro yose yarangiye gusa bitunguranye amasaha y’igicuku yageze abantu bataraba benshi ahagombaga kubera igitaramo ndetse binagaragara ko igitaramo kitakibaye aba ari nako bagenda.

Icyo gihe umwuka mu bateguraga iki gitaramo ntabwo wari mwiza cyane ko bahamyaga ko igitaramo cyishwe n’imitegurire mibi ndetse no kudahuza umugambi hagati y’abagiteguraga b’i Rubavu ndetse n’abaturutse i Kigali.

Fik Fameica yatumiwe mu gitaramo mu Rwanda ataha ataririmbye kubera kubura abafana

Aki na Pawpaw baje mu Rwanda bataha bimyiza imoso

Mu ijoro ryo kuwa 14 Gashyanyare 2019 mu ihema rinini ryo muri Kigali Conference and Exhibition Village [Camp Kigali] nibwo habereye igitaramo cyahuje abanyarwenya bo mu Rwanda cyari cyanatumiwemo ibyamamare byo muri Nigeria, Aki na Pawpaw; kikaza kubura abantu.

Cyari cyateguwe mu rwego rwo gufasha abakundana kwizihiza umunsi wa Saint Valentin, ari ko hanamurikwa umushinga wiswe Naija-Rwanda Connect, ugamije guteza imbere sinema nyarwanda ifashijwe n’iyo muri Nigeria.

Abanyarwenya bamamaye muri filime zisetsa Aki na Pawpaw nibo bari abashyitsi b’imena, aho bafatanyije n’abandi banyarwenya bo mu Rwanda.

Iki gitaramo cyatangiye gitinze, ahanini bitewe n’ubwitabire buri hasi cyane. Saa moya mu ihema cyabereyemo harimo bake banyuranuranagamo batunganya ibitari byarangiye.

Hanze naho hari udutsiko tw’abantu bake barimo abanyarwenya bo mu Rwanda, abanyamakuru n’abandi bari bashinzwe imirimo muri iki gikorwa.

Saa mbili n’igice nibwo Uncle Austin yagiye ku rubyiniro, atangira kuganiriza abantu ashyiramo n’urwenya rwinshi. Yahamagaye umunyarwenya wa mbere witwa Sept, akurikirwa n’abasore babiri bari mu itsinda rya Daymakers, Japhet na 5k Etienne, Joshua, Kibonke, Babu na Divin bagiye bashimisha abantu mu buryo butandukanye.

Aki na Pawpaw bari bategerejwe na benshi baje kugerwaho bakora agakino bise Rosa. Nyuma y’aka gakino kamaze iminota itanu, hakurikiyeho gusobanura iby’umushinga wa Naija-Rwanda Connect.

Iki gitaramo nacyo kiri mu byabaye bigasiga inkuru mbi yo kutitabirwa n’abantu benshi cyane ko cyitabiriwe n’abatarenze 50 ubariyemo abanyamakuru, n’abandi bari batumiwe.

Aki na Pawpaw bakoreye igitaramo i Kigali cyitabiriwe kukigero cyo hasi
Mu cyumba cyabetereyemo igitaramo cya Aki na Paw byagaragaraga ko cyitabiriwe ku kigero cyo hasi

Harmonize yaririmbiye abantu mbarwa mu Mujyi wa Kigali ku nshuro ya mbere ahakoreye igitaramo

Harmonize, umuhanzi ukomeye muri Tanzania yakoreye igitaramo cya mbere i Kigali mu ijoro ryo ku wa Gatandatu tariki ya 24 Werurwe 2018, yatumiwe mu kumurika inzu nshya ya The Mane iteza imbere umuziki mu Rwanda.

Iki gitaramo cye i Kigali cyitabiriwe n’abafana bake ugereranyije n’ubunini bw’ihema ryari ryateguwe muri Camp Kigali ndetse n’umubare w’abahanzi bo mu Rwanda bakiririmbyemo.

Harmonize ubusanzwe witwa Rajab Abdul Kahali, ni we muhanzi mukuru wari utegerejwe. Yaririmbye nyuma y’abandi bahanzi bo mu Rwanda barimo Khalfan, Uncle Austin, Marina, Safi Madiba n’abandi.

Icyo gihe Umuyobozi wa The Mane, Bad Rama mu ijambo risoza igitaramo yagize ati “Nka The Mane ibi birahagije, ku mezi atandatu gusa ibi birahagije […] Mwari bake beza!”

Harmonize yaje mu Rwanda nawe mu gitaramo yari yatumiwemo cyo kumurika inzu ifasha abahanzi ya The Mane kitabirwa ku kigero cyo hasi
Mu gitaramo cyari cyatumiwemo Harmonize ahagana saa yine n'igice mu myanya yagenewe abishyuye ibihumbi icumi hari hambaye ubusa no mu yindi myanya harimo abantu mbarwa
Abantu mbarwa bari bagiye mu gitaramo cya 2Face Idibia

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza