00:00:00 IGIHE NETWORK KN KINYARWANDA EN ENGLISH FR FRANCAIS

Ibisobanuro by’amagambo agize indirimbo “Imitoma” Kanjogera yatuye Rwabugili

Yanditswe na Nsanzabera Jean de Dieu
Kuya 25 April 2022 saa 07:31
Yasuwe :

Mu buhanga butiganwa bwaranze abakurambere mpangarwanda, harimo no guhanga indirimbo zirimo ubuhanga buhanitse bwuje inyurabwenge n’inyuramatwi utabasha kubona mu buvanganzo bw’ahandi hose ku Isi.

Hari igihe ugira utya ukagwa ku gihangano cy’indirimbo wakumva injyana yayo uburyo yengetse, wakurikirana imvugo ihanitse isobetsemo, ukaba wakwibaza uwahanze icyo gihangano uko yasaga!

Ni muri uwo mujyo IGIHE yahisemo kujya ibataturira ibisobanuro bya zimwe mu ndirimbo zuje ubuhanga bwambukiranyije ibinyejana na n’ubu bikaba bikivugwa ibigwi by’umwimerere wa byo.

Igihangano tubimburiyeho ni indirimbo imaze kugwiza ibigwi mu rwa Gihanga yiswe “Imitoma”, yo ku ngoma ya Kigeli Rwabugili ahasaga mu wa 1883, ikaba imaze gusubirwamo n’abahanzi bagera kuri batatu mu gihe cy’imyaka isaga 139 (1883-2022).

Abayisubiyemo bazwi mu mateka y’u Rwanda muri bo twavuga Mahwehwe, Rujindiri Berinarudo na Intore Massamba Alphonse. Ni gake cyane ushobora kubona igihangano nk’iki gishobora kwambukiranya ibinyejana bitatu kigikunzwe.

Iyi ndirimbo yitwa “Imitoma” yahanzwe na Kalira ka Rwogera wari mushiki wa Rwabugili, umwami w’u Rwanda ahasaga mu wa 1883.

Hari mu rwego rwo guhakirwa Kanjogera wari muramukazi we ngo asubirane n’umugabo we Rwabugili, nyuma yo guteranywa na Nzigiye za Rwishyura wari umutware w’u Buganza bw’Iburasirazuba ku ngoma ya Kigeli Rwabugili, waje kumusenda ku bintu bidasobanutse.

Ni indirimbo Kalira ka Rwogera yahangiye muramukazi we Kanjogera ngo ayiture Rwabugili amutunguye amugaragarize igishyika cy’urukundo amufitiye kinamwibutsa ibihe byiza bagiranye mu buto bwabo bagishakana.

Kanjogera yari mu kigero cy’ubwangavu (bashakanye mu wa 1879 afite imyaka 14 kuko yavutse mu wa 1865) mu gihe Kigeli Rwabugili yari umugabo w’igikwerere w’imyaka 39 (kuko yavutse mu wa 1840).

N’ubwo iyi ndirimbo yaririmbwe na Kanjogera ariko ihimbitse mu buryo amagambo yayo ari nka Rwabugili ubwe ubwira Kanjogera.

Ihimbitse mu buryo Kanjogera yibutsaga Rwabugili ibihe byiza bagiranye mbere y’uko bateranywa na Nzigiye za Rwishyura.

Amwibutsa uburyo yamukundwakaje akamurutisha abandi bagore bari bakuru kuri we.

Hari aho aririmba ati “Twari imitoma, Nyonga we. Tukiri imitoma, Nyonga we. Igihe ga turagira inyana, Nyonga we. Twatobanye ga utwondo, Nyonga we. Twamaranye ga inkondo, Nyonga we. Ariko….,ni izawe nanjye.”

Iki gice cya mbere, kivuga imvugo Rwabugili yakundaga gukoresha akundwakaza Kanjogera mu mizo ya mbere bakibana, aho yamwitaga “Nyonga ya Mishenyi” ari nayo nyikirizo igaruka kenshi muri buri gice cy’indirimbo.

Inyonga mu Kinyarwanda cyo ha mbere, bisobanuye “Ibimenyetso by’ubwami” ari byo byari ibirango by’igihugu, byashyikirizwaga umwami wimye nk’ikimenyetso cy’uko ahawe u Rwanda ngo arutware.

Inyonga zari zigizwe n’Ingoma Ngabe Kalinga, Urusengo Nyamiringa, Inyundo Nyarushara n’Urushingo rwo gucana umuriro wa Gihanga

N’ubwo Rwabugili yashatse Kanjogera amurusha imyaka 25, muri iyi ndirimbo ntiyabuze kumwibutsa imikino abana bato bakinana n’imirimo bakorana iyo baturanye asa nk’aho amwibutsa ko bayikoranye, dore ko Kanjogera yari mubyara wa Rwogera se wa Rwabugili.

N’ubwo Rwabugili atari mu kigero kimwe na Kanjogera ariko yabyirukanye na basaza be barimo Kabare na Ruhinankiko bari n’abatware b’imitwe y’ingabo za Rwabugili bakaba baranashinganye umutwe w’Ingangurarugo bakiri ibihenga.

Imitoma ni imvugo ijimije ishaka kuvuga abana bato, ariko na none ikavuga imico myiza iranga abana yo guhora bishimye, bakina imikino ibashimishije hagira ubabara undi akamuhumuriza, nta we uratora imico mibi yo kuvuga nabi.

Ku bakuru imitoma bivuga: “Ijambo ryiza ry’intoranywa ubwira uwo ukunda ushaka kumugaragariza igishyika umufitiye”. Muri buri gice Rwabugili aba agaragaza ko ibyo yahasanze, n’ibyo bashakanye ari ibyabo bombi ntawe uzabyivangamo.

Mu gice cya kabiri cy’iyi ndirimbo, kigaragara nk’imvugo Rwabugili yagakoresheje arambagiza Kanjogera amusaba urukundo.

Akamugaragariza ko ibyiza by’urukundo bisangirwa na babiri badahuje igitsina, nta we urwiharira wenyine ngo bikunde, ari nayo mpamvu yamushatse ngo babane barusangire.

Bitewe n’uko Kanjogera yari umuhererezi mu bana ba Rwakagara na Nyiramashyongoshyo, byagaragaraga ko yari yarateteshejwe cyane.

Muri iyi ndirimbo Rwabugili akaba yaramusezeranyaga ko n’aho agiye urukundo rukeba azateta nta shiti.

Muri iki gice Rwabugili ni we uba uvuga aho agaragaza ko ibyo urukundo bakundana ari urwabo bombi nta we uzarwivangamo

Ati “Nagukunze ga rwinshi, Nyonga we. Nagukuye i Bwega, Nyonga we. Nagushyize ga i Bunyiginya, Nyonga we. Hose……..ni ahawe nanjye.”

Mu gice cya gatatu cy’indirimbo, kigaragaza aho Kanjogera akomoka ariho mu Bega n’aho yashatse kwa Rwabugili mu Banyiginya. Ni ho akomeza amugaragariza ko hose bahasangiriye isano, kuko n’ubusanzwe Abega n’Abanyiginya bari bafitanye isano.

Abega bari abuzukuruza b’Abanyiginya. Abega bari abagore b’Abanyiginya. Abanyiginya bakaba bishywa b’Abega. Abanyiginya bakaba babyara b’Abega.

Mu gice cya kane cy’indirimbo, Rwabugili aba agaragariza Kanjogera ko amukunda byahebuje, kugeza n’ubwo amugabiye amashyo y’inka yose yari afite ngo ayagenge, akayarenza abandi bagore bose yari afite bagera kuri 17.

Kumutura utunyana dusanze urwenda, bigaragaza ko n’ubwo Rwabugili yagabiye Kanjogera amashyo y’inka, ariko yari asanzwe afite n’andi mashyo y’inka yigengaho yagabiwe na se Rwakagara.

Mu mvugo inyarutse yamugaragarizaga ko aho yamukuye hari ibintu ariko ajya mu bindi. Icyabahuje ari urukundo gusa, ibindi byo nta cyo buri wese yari akennye.

Mu gice cya gatanu cy’iyi ndirimbo Rwabugili aba agaragaza icyubahiro yahaye Kanjogera ubwo yamurongoreraga mu Ngara za Bumbogo mu wa 1879.

Mu birori by’akataraboneka byahabereye, hanabaye n’ umuhango wo kumurika inka z’inyambo mu mwiyereko unoze wakorwaga n’Abatahira bazimurikira Abatware b’inyambo. Ariko icyo gihe zamurikirwaga Kanjogera ku munsi w’ibirori by’ishyingirwa rya na Rwabugili.

Muri gice cya gatandatu, Rwabugili aba agaragariza Kanjogera ko ibyiza nyaburanga biri ku mubiri we ari we yabimereye. Ingondo Rwabugili yavugaga ko yakebewe Kanjogera mu bituza byombi ni “mpwempwe”.

Agakomeza kumwibutsa ko ibyiza nyaburanga biri ku mubiri we ari ibyabo bombi nta wa byivangamo.

Imbuguyu Rwabugili yavugaga ko yamereye Kanjogera mu munsi y’umukondo, kandi munsi y’umudende ni “umusatsi wo hasi”.

Mu gice cya karindwi cy’iyi ndirimbo, Rwabugili aba agaragariza Kanjogera uko yamurutishije abandi bagore be 17 barimo ibyiciro by’Amagaju, Abaterambabazi, Abatahanashyaka, Abakina n’Inyamibwa.

Mu bindi bice akomeza aguyaguya Kanjogera kakahava amusezeranya kuzamuba hafi.

Mu gice cya nyuma cy’iyi ndirimbo, ni Kanjogera wavugaga we ubwe abwira Rwabugili.

Iyi ndirimbo isa nk’aho Kanjogera yibutsaga Rabugili ko yamushatse ari isugi nta wundi mugabo azi, noneho atangira kumuratira ibyiza nyaburanga amaze kunguka nyuma y’imyaka bamaze babana by’umwihariko mu gihe cyose amaze yaramusenze.

Mwiza wavugwaga muri iki gice ni Kanjogera wivugaga we ubwe, na aho Rwabugili we yamuhaye igisingizo cy’Inyamibwa.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .