Iki gitaramo cyari gihanzwe amaso na benshi mu bakunzi b’umuziki gakondo, cyari kiyobowe na Luckman Nzeyimana cyatangiye ku isaha ya saa Mbili hamurikwa imideli ndetse n’uruvange rw’imiziki yacuranzwe na DJ Grvndlvng.

Iki gitaramo cyari kigizwe n’ibice bine, icya mbere cyatangijwe na Ariel Wayz cyaranzwe n’indirimbo za Ruti Joël ndetse n’iza Massamba waririmbye indirimbo ze za kera harimo Berenadeta bivugwa ko ari iy’umubyeyi we Sentore Athanase.

Ariel Wayz wabimburiye abandi ku rubyiniro yaririmbye “Ni wowe gusa” yakurikiwe n’iyo yise “Ntabwo yantegereza” nyuma y’izi ndirimbo uyu muhanzikazi yahise aririmba indirimbo ya Kamaliza “Kunda Ugukunda”.

Ruti Joël wari uherekejwe na Clement The guitarist yakirijwe amashyi n’impundu atangira aramutsa abakunzi b’umuziki akurikizaho indirimbo yise “Cunda” imwe mu zigize album ye ya mbere “Musomandera”.

Uyu muhanzi kandi yongeye gukirigita amarangamutima y’abakunzi ba Yvan Buravan aririmba indirimbo “Low Key” yaririmbanye n’abakunze uyu muhanzi witabye Imana tariki 17 Kanama 2022.

Ruti Joël ubwo yari ageze ku ndirimbo “Igikobwa”, abantu bavuye mu byabo baririmbana nawe ijambo ku rindi kugeza avuye ku rubyiniro yakira Massamba Intore.

Massamba Intore ubwo yari ageze ku rubyiniro ibintu byahinduye isura, yakirizwa impundu n’amashyi y’urufaya abitabiriye igitaramo bamwereka ko banyotewe no gutaramana batera hejuru bagira bati “Massamba, Massamba, Massamba” abandi bati “30 kuri 40, 30 kuri 40, 30 kuri 40.”

Uyu muhanzi yinjiriye mu ndirimbo “Amarebe n’Imena” yafatanyije na Ruti Joël, yakurikijeho indirimbo yise “Imihigo y’Imfura” , “Amararo”, “Impunga Inanga” na “Berenadeta”.

Igice cya kabiri cyaranzwe n’indirimbo zirata ubutwari bw’Inkotanyi, Massamba yazirimbye yambaye impuzankano igaragaza imyenda ya gisirikare.

Ni igice cyari gishyushye cyane dore ko abitabiriye iki gitaramo bahagurutse bacinya akadiho baririmbana na we izirimo “Inkotanyi Cyane”, “Kibonge” na “Iyambere” na “1420”.

Massamba Intore ubwo yari agarutse mu gice cya gatatu cy’igitaramo yagarukanye indirimbo “Araje” “Nzajya inama nande”, “Arihehe”, “Mpore Mpore”, “Agasaza” zikaba zimwe muzo uyu muhanzi akoresha inshuro nyinshi iyo yagiye kuririmbira abageni.

Igice cya kane cyari kigizwe n’indirimbo z’urukundo, cyatangiwe n’indirimbo “wirira” yahanze ubwo yaririmbiraga umurundikazi bakundanaga mbere y’uko ajya ku rugamba rwo kubohora igihugu.

Massamba yanaririmbye indirimbo zirimo “Ibimbabaza”, “Ngwino”, n’izindi . uyu muhanzi yahise ahamagara umukobwa we witwa Ikirezi Deborah uba muri Canada, ahabwa umwanya aririmba indirimbo ye yise “Smile”. Massamba kandi yazanye ku rubyiniro undi mukobwa we witwa Ntore Gicanda uba mu Bubiligi.

Ubwo iki gitaramo cyaganaga ku musozo, Massamba yahamagaye umuhanzi Josh Ishimwe aririmba indirimbo “Sinagenda Ntashyimye” ndetse na Lionel Sentore aririmba “Uwangabiye”.

Teta Dianna nawe yahamagawe ku rubyiniro na Massamba azamukana na Jules Sentore baririmbana indirimbo bise “Umpe akanya.”

Iki gitaramo cyasojwe n’indirimbo “Ntimugire Ubwoba” DJ Marnaud yakoranye na Massamba Intore ndetse na Ruti Joël bakoze mu bihe byo kwamamaza Perezida Kagame.

Abakunzi b'umuziki wa Massamba bageze ahabereye iki gitaramo kare cyane ubona ko bafite inyota y'ibyo bateguriwe

Abambere bageze kuri BK Arena saa Kumi n'Imwe z'umugoroba

Abakunzi b'umuziki wa Massamba batashye banyuzwe

Akanyamuneza kari kose ku bitabiriye iki gitaramo

Akanyamuneza kari kose kuri Massamba, Teta Diana na Jules Sentore

Andy Bumuntu yari yizihiwe cyane

Ariel Wayz wabimburiye abandi ku rubyiniro yishimiwe na benshi binyuze mu ndirimbo 'Ni wowe gusa'

Buri wese yabyinnye uko abyumva bitewe n'indirimbo igezweho

Buri wese yageragezaga kujyanisha n'abandi abyina indirimbo za Massamba

DJ Marnaud na Massamba babyina indirimbo 'Ntimugire ubwoba'

Hamuritswe imyenda ya Bralirwa yahanzwe na Intwali Collection

Igice cya kabiri abakunzi ba Massamba bahagurutse baririmbana nawe kugeza avuye ku rubyiniro

Igice cya kabiri Massamba yagihariye indirimbo zirata ubutwari bw'Inkotanyi

Igice cya kabiri cy'iki gitaramo cyatumye benshi bacinya akadiho

Ijwi rya Ariel Wayz ryanyuze benshi binyuze mu indirimbo ya Kamaliza 'Kunda Ugukunda'

Iki gitaramo cyabereye muri BK Arena

Ikirezi Deborah ni umukobwa wa Massamba Intore uba muri Canada

Iki gitaramo cyari kiyobowe na Lucky Nzeyimana

Imbyino ya DJ Marnaud na Ruti Joël yatunguye benshi

Ikirezi yishimiye kuririmbana na Ruti Joël

Imbyino za Massamba na DJ Marnaud ziri mu byasusurukije benshi biganjemo urubyiruko

Impano Massamba yahawe igizwe n'Icumu ndetse n'Ingabo byari biherekejwe n'ifoto ye aramukanya na Perezida Kagame

Indirimbo 'Kibonge' na 'Iyambere' zatumye benshi bava mu byabo barahaguruka babyinana nawe ndetse banaririmbana na Massamba ijambo ku rindi

Indirimbo 'Dushengurukanye isheja' yahagurikije benshi muri iki gitaramo bacinya akadiho

Indirimbo zirata ibigwi by'Inkotanyi zanyuze benshi

Indirimbo zose Massamba Intore yazirimbanye na Ruti Joël

Intore Massamba ubwo yari agarutse mu gice cya gatatu cy’igitaramo yagarukanye indirimbo yifashisha iyo ataramiye abageni

Jules Sentore yishimiye uburyo yacurangiwe na Clement

Massamba Intore yahamagaye Josh Ishimwe bafatanya kuririmba indirimbo 'Sinagenda ntashimye'

Massamba Intore yaririmbye indirimbo zirimo “Inkotanyi Cyane”

Massamba Intore yasoje igitaramo aririmba indirimbo yakoranye na DJ Marnaud bise 'Ntimugire ubwoba' bakoreye Perezida Kagame ubwo yari mu bihe byo kwiyamamaza

Massamba yahamagaye ku rubyiniro umukobwa we witwa Ikirezi Deborah uba muri Canada

Massamba yahinduye imyenda inshuro eshatu

Massamba yamanutse ku rubyiniro aramutsa Makanyaga Abdul

Massamba yaserukanye imyambaro yahanzwe n'Inzu y'imideli Moshions

Massamba yazanye ku rubyiniro undi mukobwa we witwa Intore Gicanda uba mu Bubiligi

Massamba yazirikanye ibihe yagize ubwo yari mu basore bagiye ku rugamba rwo Kubohora Igihugu

Massamba yashimishijwe n'uburyo urubyiruko rwitabiriye igitaramo

Massamba yishimiye kubona Makanyaga Abdul mu gitaramo cye

Mbere gato y'uko igitaramo kigana ku musozo Massamba Intore yaririmbanye n'umukobwa we Ikirezi Deborah

Mu gice cya kabiri Massamba Intore yagarutse yambaye impuzankano y’imyenda igaragaza imyenda ya gisirikare

Muri iki gitaramo haririmbwe indirimbo zaranze Inkotanyi ku rugamba rwo kubohora Igihugu

Muri iki gitaramo hamurikiwemo imyenda ya Bralirwa

Ni igitaramo cyahuje abato n'abakuru bakunda umuziki wa Massamba Intore

Amafoto : Nezerwa Salomon & Nkusi Christian