Aha ni mu nzu yamenyekanye cyane mu bakunda kwidagadura ndetse hari bamwe bazaga i Kigali bafite amashyushyu yo kuhatera akajisho, kuko hatasibaga kuvugwa. Iyi nzu yamamaye mu gukundisha benshi imipira na sinema yamamaye bigizwemo uruhare na Emmanuel Mayaka witabye Imana mu 2022.

Nyuma y’igihe kinini hameze nk’ahadakoreshwa cyane hongeye kuvugururwa ndetse ubu benshi bashobora kujyayo kuharebera filime zigezweho. ‘Kwa Mayaka’ havuguruwe bigizwemo uruhare na Imitana Productions.

Imitana Productions yashinzwe na Philbert Aimé Sharangabo Mbabazi na mugenzi we Samuel Ishimwe Karemangingo. Bavuga ko aha nka hamwe mu hakundishije benshi sinema, bahisemo kongera kuhavugurura ndetse bakaba baratangiye gahunda yo kuherekanira filime.

Iyo ugeze ‘Kwa Mayaka’ usanganirwa na bimwe mu bikoresho byakoreshwaga mu myaka yo hambere mu kwerekana filime. Ibi birimo televiziyo za kera, CD n’ibindi. Uhabona kandi n’ibindi bikoresho birimo na camera zo hambere ubu utapfa kubona ahabonetse hose.

Uretse ibyo bikoresho kandi uhabona ‘ecran’ ya rutura abantu bareberaho filime, imbonankubone. Kuri iyi nshuro abakunzi ba filime bahuriye ‘Kwa Mayaka’ bizihiza imyaka 47 hamaze herekanirwa filime muri Kigali.

‘Kwa Mayaka’ ubu ni hamwe muri iki gihe hari kwerekanirwa filime mu iserukiramuco rya ‘Kigali CineJunction Festival’. Ni iserukiramuco riri kuba guhera ku wa 1 rikazasozwa ku wa 4 Kanama 2024. Rizabera ahantu hatandukanye mu Mujyi wa Kigali harimo muri Car Free Zone, Kwa Mayaka i Nyamirambo, ahakorera Moshions ndetse no muri L’Espace Kimihurura.

Philbert Aimé Sharangabo Mbabazi uri mu batangije iri serukiramuco, yabwiye IGIHE ko iri serukiramuco ryatangiye neza ndetse abantu bitabiriye kurusha uko byari bimeze umwaka ushize ubwo ryatangiraga.

Avuga ko bahisemo kuryizihizamo isabukuru y’imyaka 47 ‘Kwa Mayaka’ hamaze kuko ari hamwe mu hatumye ibihe by’ahahise bya benshi bigenda neza. Ati “Urumva ni ahantu habayeho nta terambere rihari, uwashakaga kumenya filime zigezweho ni ho hamufashaga. Ikindi hatumye benshi baticwa n’irungu kuko habayeho nta terambere nk’iry’ubu.’’

Avuga ko ‘Kwa Mayaka’ ari ahantu hakwiriye guhabwa agaciro gakomeye muri sinema, kuko hafite amateka akomeye.

Yakomeje avuga ko uyu mwaka muri iri serukiramuco, bazerekaniramo filime ahantu hatandukanye harimo no ‘Kwa Mayaka’ hazerekanwamo indende nyinshi n’ingufi ku buryo abazitabira bazabasha kureba filime 30.

Ikindi avuga ko bazerekana na filime z’Aba-Diaspora zirimo iy’umunyarwanda uba Londres mu Bwongereza, uwa Bruxelles mu Bubiligi, Paris mu Bufaransa ndetse n’i Genève mu Busuwisi. Izi bazazerekana mu cyiswe ‘Diaspora Voices’.

Kigali Cine Junction [KCJ] ni iserukiramuco ritandukanye n’andi cyane ko ryo nta bihembo bitangwamo. Kuri uyu wa Gatandatu tariki 3 Kanama 2024, Umugande Loukman Ali wubatse izina muri sinema muri Afurika arerekana filime ze ‘Kwa Mayaka’ i Nyamirambo.

Ubu bwari ububiko bwa CD bwifashishwaga ngo zitangirika

Umuhire Eliane aganira na Gael Kamirindi uzwi cyane mu gukina amakinamico mu Bufaransa

Philbert Aimé Sharangabo Mbabazi uri iburyo ari mu bagize uruhare ngo 'Kwa Mayaka' hongere kugaruka havuguruye

Televiziyo zo hambere zifashishwaga 'Kwa Mayaka' na n'ubu zirahari nk'urwibutso

Kwa Mayaka iyo uhageze umenya ibigwi bye mu ncamake

Kwa Mayaka iyo uhageze ubu usanganirwa n'ibikoresho bya kera

Kwa Mayaka hitezweho kongera kuba igicumbi cyo kureberamo filime

Kwa Mayaka hubatse amateka akomeye muri sinema

Kwa Mayaka hari ibikoresho birimo na camera zo hambere

Kwa Mayaka hari ahamanitse CD za filime zakunzwe mu myaka yo hambere

Iyo ugeze Kwa Mayaka ubona ibikoresho byakoreshwaga mu myaka yashize

Iyo ugeze ‘Kwa Mayaka’ usanganirwa na bimwe mu bikoresho byakoreshwaga mu myaka yo hambere mu kwerekana filime

Imitana productions yagize uruhare mu kurimbisha Kwa Maya bundi bushya

Ibikoresho byinshi Mayaka yakoreshaga kera biracyahari n'ubwo havuguruwe

Eliane Umuhire na Gael Kamirindi bari bari kuganira

Ada Cotton usanzwe akorera ibikorwa bya sinema mu Bufaransa ni umwe mu baje mu iserukiramuco rya KigaliCine Junction ndetse yanabashije kuganura Kwa Mayaka

Binyuze mu iserukiramuco Kigali Cine Junction abakunze 'Kwa Mayaka' bagiye kongera kuryoherwa no kuharebera filime zitandukanye

Abato batazi uko hambere inzira byanyuraga ngo abantu barebe filime baba batangaye

Abumvaga Kwa Mayaka, bahawe rugari ngo bamenye amateka yaho n'uruhare hagize mu guteza imbere sinema muri rusange n'abakunzi bayo

Abantu bageze Kwa Mayaka baratangara

Abakiri bato bahawe rugari ngo bamenye 'Kwa Mayaka' bakuze bumva

Amafoto: Kasiro Claude