Hasobanuwe impamvu uwabaye Miss Rwanda afata mu ntoki 150 000 Frw buri kwezi mu gihe cy’umwaka

Yanditswe na Nsengiyumva Emmy
Kuya 9 Gashyantare 2020 saa 08:09
Yasuwe :
0 0

Ubuyobozi bwa Miss Rwanda bwikomye abantu bakunze kubushinja kurigisa amafaranga (umushahara) y’umukobwa uba wegukanye ikamba ry’iri rushanwa, buhishura ko amafaranga umukobwa ahabwa buri kwezi n’uko akoreshwa.

Mu kiganiro n’itangazamakuru mbere y’uko abakobwa bajya mu mwiherero kuri iki Cyumweru tariki 9 Gashyantare 2020, ubuyobozi bwa Miss Rwanda bwabajijwe ibibazo binyuranye bigaruka no ku mafaranga ahabwa ba Nyampinga nyuma yo gutorwa.

Umuyobozi wa Rwanda Inspiration Back Up, Ishimwe Dieudonné, yavuze ko umukobwa wegukanye ikamba rya Nyampinga ahabwa ibihumbi 150 Frw buri kwezi, andi akayashyirirwa kuri konti kugira ngo anatozwe umuco wo kwizigama.

Ati “Hari n’abo mbona bavuga ngo amafaranga ya Miss turayamurya, ngo burya ntamugeraho yose. None se mwe ko muzi ubwenge, umuntu wamwambura amafaranga wamuhaye? None se ubu tuvuze ngo Miss ajye ahabwa ibihumbi 500 hari uwaturasa?”

Yakomeje avuga ko amafaranga y’umukobwa batajya bayakoraho, ati “Wenda ni uko umuntu atajya mu masezerano yose tuba dufitanye ariko icyo mwamenya ni uko umukobwa utwaye ikamba rya Miss Rwanda ahabwa ibihumbi 150 Frw buri kwezi, andi ibihumbi 650 ajya kuri konti ye, akemererwa kuyakoresha ari uko umwaka urangiye.”

Yavuze ko amafaranga umukobwa wabaye Miss Rwanda aba yarabikiwe ariyo amufasha gukomeza imishinga ye nyuma yo gutanga ikamba.

Ati “Elsa aracyarya amafaranga yavanye muri Miss Rwanda, Liliane aracyarya ayo mafaranga.”

Ishimwe yahishuye kandi ko uretse amafaranga y’umushahara abakobwa bahembwa arangirana n’umwaka, hari ibindi bihembo binyuranye aba ahabwa iyo afite ikamba anabikomezanya mu gihe cyose agikorana n’ubujyanama bwa Rwanda Inspiration Back Up.

Uyu mugabo yavuze ko kwinjira mu bujyanama bwa Miss Rwanda ari uburyo bwo gufasha abakobwa baba begukanye amakamba kubaba hafi mu rwego rwo gukurikirana ishyirwa mu bikorwa ry’imishinga baba batanze.

Ibyo Miss Rwanda 2020 azahembwa

Imodoka nshya yo mu bwoko bwa Suzuki Swift 2019 izatangwa na Suzuki binyuze muri Rwanda Motor.

Azahabwa umushahara w’ibihumbi 800 Frw ku kwezi mu gihe cy’umwaka, aya akazatangwa na Africa Improved Foods.

Uzatorwa nka Nyampinga w’u Rwanda yemerewe kwivuza ku buntu ku ivuriro ryitwa Ubuzima Polyclinique no gusohokera muri Camellia agafata icyo ashaka mu gihe kingana n’umwaka azamarana ikamba.

Uzegukana ikamba rya Miss Rwanda kandi yemerewe itike y’indege izamujyana i Dubai n’ibindi byose bijyanye n’urugendo azakora mu rwego rw’ikiruhuko, iyi ikazatangwa na kompanyi yitwa Multi Design Group.

Keza Salon yemeye gukorera umukobwa uzegukana ikamba ibijyanye n’imisatsi ndetse no kwita ku bwiza bwe mu gihe cy’umwaka wose.

Uzegukana ikamba kandi azaba yemerewe “Printing” ku buntu ku bintu byose azaba ashaka muri Smart Design, mu gihe True Connect yo yamwemereye internet y’umwaka ku buntu.

Mu gihe agiye mu birori, umukobwa uzegukana ikamba azajya yambikwa na Ian Boutique ku buntu mu gihe azajya anahabwa imyenda ya Siporo y’ubuntu muri Magasin Sport Class.

Afrifame Pictures nayo yemereye Nyampinga w’u Rwanda kumufatira ibijyanye n’amafoto igihe cyose ayakeneye mu mwaka azamarana ikamba rya Miss Rwanda 2020.

Umukobwa wegukanye ikamba rya Miss Rwanda buri mwaka ahita anatsindira itike yo guhagararira igihugu muri Miss World.

Ibyo ibisonga bya Miss Rwanda bizahembwa

Igisonga cya mbere azahita agirwa Brand Ambassador wa Multi Design Group izamuhemba 1 200 000 Frw, mu gihe igisonga cya kabiri cya Miss Rwanda nawe azahembwa 1 200 000 Frw na Songa Logistics LTD, azanahita abera Brand Ambassador umwaka wose.

MTN Rwanda yemeye guhemba Miss Popularity 1 500 000 Frw akagirwa Brand Ambassador wa MTN Yolo, azahabwa iPhone 8Plus ya GB 64 ndetse anahabwe guhamagara no gukoresha Internet ku buntu mu gihe cy’umwaka azamarana iri kamba.

Miss Photogenic, umukobwa wifotoza akaberwa n’amafoto, yagenewe igihembo cyo kuba Brand Ambassador wa Bella Flowers, aba bakazamugenera igihembo cya 1 200 000 Frw.

Miss Rwanda 2020 ifite abaterankunga benshi banakomeye bayobowe na ECOBANK nk’umuterankunga mukuru w’irushanwa.

Iri rushanwa rizasozwa tariki 22 Gashyantare 2020 ahazaba hamenyekanye uwegukanye ikamba rya Miss Rwanda ndetse n’abandi bose bazaba batsindiye andi makamba.

Hasobanuwe impamvu uwabaye Miss Rwanda afata mu ntoki 150 000 Frw buri kwezi mu gihe cy’umwaka

Ishimwe Dieudonné yasobanuye ko uwabaye Miss Rwanda afata mu ntoki 150 000 Frw buri kwezi mu gihe cy’umwaka andi akayashyirirwa kuri konti
Ibi byasobanuriwe imbere y'abanyamakuru, abakobwa bahatanira ikamba rya Miss Rwanda2020 n'ababyeyi babo
Abakobwa 20 bagiye mu mwiherero wa Miss Rwanda 2020

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza