Ibi bitaramo biterwa inkunga na MTN ndetse na BRALIRWA biri kuzenguruka mu Mijyi umunani y’u Rwanda aho kuri ubu bimaze kunyura mu irimo Musanze, Gicumbi, Nyagatare ndetse na Ngoma.

Ni ibitaramo byatumiwemo abahanz banyuranye barimo Chriss Eazy, Bushali, Ruti Joel, Bwiza, Kenny Sol, Bruce Melodie na Danny Nanone.

Mu Karere ka Ngoma abakunzi b’umuziki bageze kare cyane ku kibuga cyabereyeho iki gitaramo kuko ahagana Saa Sita z’amanywa bari batangiye kucyuzura.

Ibi byatumye Saa Munani z’amanywa, ubwo Chriss Eazy yajyaga ku rubyiniro ari uwa mbere ataramira abakunzi be bose cyane ko ikibuga cyari cyamaze kuzura.

Nyuma yo gutaramira abakunzi be akababyinisha nubwo yari uwa mbere, Chriss Eazy ikibuga yagisigiye Ruti Joel wahise yinjirira mu ndirimbo ye Igikobwa.

Icyakora ubwo uyu muhanzi yageraga ku rubyiniro, ikirere cyari cyakunze guca amarenga ko gishobora gutanga imvura cyakomeje kurakara ukabona ko ari ikibazo cy’igihe ariko imvura ishobora kugwa.

Nyuma y’indirimbo enye ari ku rubyiniro, Ruti Joel yatunguwe no kubona imvura yisutse ku butaka, abari bamukurikiye bakwirwa imishwaro bashaka aho bajya kugama.

Nguko uko igitaramo ya Ruti Joel cyashyizweho akadomo nawe ajya kugama kimwe n’abandi benshi.

Nyuma y’iminota nka 45 imvura yihaye ahaberaga iki gitaramo yaje kugenza make abakunzi b’umuziki bongera kwinjira mu kibuga cyari cyabaye ibyondo.

Nubwo ikibuga cyari ibyondo ntabwo byabujije abakunzi b’umuziki kubyogoga bagataramana n’abahanzi babo.

Bushali niwe muhanzi wahise ajya ku rubyiniro bityo yongera gushyushya abakunzi b’umuziki bari bakoraniye ahabereye igitaramo.

Uyu muraperi wari waherekejwe na Slum Drip batangiranye muri Kinyatrap yavuye ku rubyiniro abantu bongeye gushyuha, akorerwa mu ngata na Bwiza.

Uyu mukobwa utajya asiga ababyinnyi be yakoze iyo bwabaga atanga ibyishimo ku bakunzi b’umuziki we b’i Ngoma nabo ntibamutenguha.

Nyinshi mu ndirimbo ze yasanze bazizi atera bikiriza arinda ava ku rubyiniro ubona benshi batabishaka.

Nyuma ya Bwiza, Kenny Sol nawe yahise afata umwanya atangira gususurutsa abakunzi be abifashijwemo n’inkumi imubyinira yitwa Bianca.

Uyu muhanzi nawe ufite abakunzi batari bake, ntiyigeze atenguha abakunzi be b’i Ngoma kuko bataramanye bigatinda.

Kenny Sol wari utaramiye bwa mbere i Ngoma, ahamya ko yatunguwe n’uburyo abakunzi b’umuziki bitabira ari benshi ndetse bakanashyigikira abahanzi bakunda.

Nyuma ya Kenny Sol, hari hatahiwe Danny Nanone nawe utigeze yorohera abakunzi b’umuziki we kuko kuva ku ndirimbo ze ziganjemo inshya kugeza ku za kera basimbukanaga batitaye ku cyondo cyari ahabereye iki gitaramo kubera imvura.

Danny Nanone wari umaze imyaka myinshi adataramira i Ngoma yatunguwe n’uburyo yakiriwe, ashimangira ko abakunzi be bo muri aka karere bamubitsemo ideni.

Iki gitaramo cyapfundikiwe na Bruce Melodie ukunze kuririmba ari uwa nyuma nawe ntatenguhe abakunzi be cyane ko uretse kubaha ibyishimo arenzaho n’akanozangendo bagatahana akanyamuneza.

Mu ndirimbo ze ziganjemo izo kubyina abantu basimbuka, Bruce Melodie yashimishije abakunzi be asimbukana nabo kuva ku munota wa mbere kugeza ku wa nyuma.

Nguko uko igitaramo cy’i Ngoma cyahumuje, kuri ubu abakunzi b’umuziki b’i Bugesera bakaba aribo batahiwe, cyane ko aba bahanzi bazahataramira ku wa 28 Nzeri 2024.

Ahagana Saa Sita z'amanywa, ikibuga cyari cyatangiye kuzura abakunzi b'umuziki

Abanze kubyiganira mu kibuga cyabereyemo igitaramo, bari biyicariye ku mukingo ukitegeye barya umuziki

Benshi banze gutaha batarebye igitaramo bahitamo kujya ahirengeye bihera ijisho

Bianca na MC Buryohe nibo bayoboye iki gitaramo

Bianca na MC Buryohe bamaze kubaka izina mu kuyobora ibitaramo bikomeye mu Rwanda

Chriss Eazy niwe wabanje ku rubyiniro

Kubanza ku rubyiniro ntabwo byabujije Chriss Eazy gutanga ibyishimo ku bakunzi be

Chriss Eazy yanyuzagamo agasuhuza abakunzi be

Uko abakunzi be babyinaga niko uyu muhanzi nawe yatwarwaga nawe agacinya akadiho

Chriss Eazy yabyinishije abakunzi b'umuziki ivumbi riratumuka

Ruti Joel n'abagize Itorero Ibihame by'Imana bashimishije abakunzi be

Ruti Joel ni umwe mu bahanzi bakora umuziki gakondo ukunzwe n'abatari bake

Ruti Joel yataramiye abakunzi be abibona ko ikirere cyarakaye

Nubwo yumvaga imvura inyuma ye ntabwo Ruti Joel yigeze acika intege kuko yakomeje gutaramira abakunzi be

Imvura yatumye Ruti Joel adasoza igitaramo cye i Ngoma

Imvura yaje kugwa buri wese ashaka aho yikinga, bamwe bahuriye mu mahema yari atwikiriye ibyuma

Ababuze aho bugama bateze agatuza imvura ibahitiraho

Nyuma y'uko imvura itanze agahenge, abantu batangiye gusubira ahagombaga kubera iki gitaramo

Bushali yitabiriye igitaramo cy'i Ngoma ari kumwe na Slum Drip batangiranye itsinda rya Kinyatrap

Bushali na Slum Drip bashyuhije abakunzi b'umuziki bari bamaze kunyagirwa n'imvura yaguye i Ngoma

Nubwo imbeho itari nke, abakunzi b'umuziki bageragezaga kuyimara bacinya akadiho

Nubwo ikibuga cyari cyuzuye icyondo, ntabwo byabujije abakunzi b'umuziki kuryoherwa

Bushali na Slum Drip bafatanye ifoto y'urwibutso n'abakunzi babo

Kenny Sol yatanze ibyishimo bikomeye i Gicumbi

Kenny Sol ari kugaragara muri ibi bitaramo afatanya n'umubyinnyi witwa Bianca

Kenny Sol byamusabaga imbaraga nyinshi imbere y'abakunzi be

Kenny Sol n'umubyinnyi bafatanya bakundirwa uburyo bajyanisha mu mibyinire

Bianca ni umubyinnyi utanga ibyishimo ku bakunzi b'ibitaramo bya 'MTN Iwacu Muzika Festival'

Abakunzi b'umuziki b'i Ngoma beretse urukundo Kenny Sol

Ari kwirebera igitaramo anakora ubucuruzi

Bwiza yakiranywe urugwiro i Ngoma

Bwiza ntajya asiga ababyinnyi be

Danny Vumbi n'umugore we ntibajya basiba ibi bitaramo

Ababyinnyi ba Bwiza bakije umuriro i Ngoma

Nyuma yo gutaramira i Ngoma, Bwiza yafatanye ifoto n'abakunzi be

Danny Nanone yeretswe urukundo n'abakunzi b'umuziki i Ngoma

Danny Nanone ni umwe mu baraperi bagezweho muri iyi minsi

Danny Nanone n'abamufasha ku rubyiniro bashimishije abakunzi b'umuziki i Ngoma

Bruce Melodie ni umwe mu bahanzi bagezweho mu Rwanda

I Ngoma, Bruce Melodie yakoresheje imbaraga nyinshi kugira ngo ashimishe abakunzi be

Bruce Melodie ni umwe mu bahanzi bashimisha bikomeye abakunzi b'umuziki we

Abatangiye igitaramo ikibuga cyabuzuranye, barinze bakirangiza bagikurikiraniye ku mukingo wirengeye aho cyaberaga

Abakunzi b'umuziki bari bananiwe kujya kubyiganira mu kibuga cyabereyemo igitaramo bagikurikiraniye hakurya aho

Amafoto: Kwizera Remy Moses