00:00:00 IGIHE NETWORK KN KINYARWANDA EN ENGLISH FR FRANCAIS

Hagiye kuba iserukiramuco rigamije guteza imbere umuco n’ubukerarugendo

Yanditswe na Uwiduhaye Theos
Kuya 13 May 2022 saa 09:40
Yasuwe :

Umuryango ‘Ikirenga Art Culture Promotion’ wateguye iserukiramuco ngarukamwaka rigamije guhuriza hamwe abantu b’ingeri zitandukanye kugira ngo babone banavumbure u Rwanda binyuze mu muco warwo, ururimi, n’ubwiza nyaburanga.

Iri serukuramuco rigamije guteza imbere ubukerarugendo rizarangwa n’ibitaramo by’ubuhanzi n’ubugeni, gusura ahantu nyaburanga ndetse n’ibiganiro byibanda ku muco Nyarwanda.

Iri serukiramuco rifatwa nk’urubuga rugamije guteza imbere imico itandukanye ndetse no kumenyekanisha u Rwanda bishingiye ku muco warwo. Ni ku nshuro ya mbere iri serukiramuco rigiye kubera mu Rwanda.

Ikirenga Art and Culture Promotion bateguye iri serukiramuco, ni umuryango udaharanira inyungu ukorera mu Rwanda ufite intego yo guteza imbere ubukerarugendo bushingiye ku muco ndetse no gufasha urubyiruko kwihangira imimo by’umwihariko mu bijyanye n’ubuhanzi n’ubugeni.

Umuyobozi Mukuru w’uyu muryango, Hakizimana Pierre, yabwiye IGIHE ko batekereje gutegura iri serukiramuco mu rwego rwo gushyigikira Leta muri gahunda yo guteza imbere Imijyi yunganira Kigali ndetse no gushishikariza Abanyarwanda gutembera u Rwanda gukunda umuco wacu no kuzamura impano zo mu buhanzi no mu bugeni.

Ikirenga Cultural Tourism Festival izabera mu Karere ka Musanze mu Ntara y’Amajyaruguru kuva ku wa Gatanu tariki 18 kugeza tariki 26 Kamena 2022.

Hakizimana Pierre yavuze ko bateganya ko iri serukiramuco rizitabirwa n’abantu bo mu ngeri zitandukanye harimo abayobozi mu nzego z’igihugu, abahagarariye ibihugu byabo mu Rwanda, abakerarugendo, urubyiruko ndetse n’abanyarwanda bose muri rusange.

Mu bikorwa bizaranga iri serukiramuco harimo imbyino n’indirimbo gakondo, imbyino zigezweho, kwerekana imideli, gutaka no kwerekana indyo nyarwanda, gushushanya, kureba filime zigisha umuco n’amateka y’urwanda, ubusizi ndetse n’imikino n’imyidagadura yo mumuco nyarwanda n’ibindi byinshi.

Iri serukirmuco rizaba mu gihe kimwe n’Inama y’Abakuru b’Ibihugu na za Guverinoma bo mu Muryango wa Commonwealth (CHOGM) izaba muri Kamena 2022.

Ikirenga Art Culture Promotion ishaka guteza imbere impano z'abato mu muco n'ubukerarugendo

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .