00:00:00 IGIHE NETWORK KN KINYARWANDA EN ENGLISH FR FRANCAIS

Gisimenti, agace ka Weekend ya nyayo muri Kigali (Amafoto)

Yanditswe na Nsengiyumva Emmy, Thamimu Hakizimana
Kuya 27 Gashyantare 2022 saa 08:09
Yasuwe :

Amaherezo umuntu udatembera muri Kigali mu masaha y’ijoro, azashiduka atazi aho Isi igeze. Ubu ubuzima bw’uyu Murwa Mukuru w’urwa Gasabo busigaye buhinduka mu ijoro, abantu bakizihirwa bya nyabyo, ureke abawusebya bimwe by’abasenzi!

Weekend y’i Kigali itandukanye na zimwe zo hambere, noneho urubyiruko rwo rwashyizwe igorora muri iki gihe. Reka bizihirwe wa mugani ni no mu gihe, dore ko umuntu yari amaze imyaka ibiri nta kwinyagambura kubera iki kinyagwa cy’icyorezo.

Nyuma ya Biryogo mu cyayi na capati, ubu Weekend ya nyayo iba i Remera mu Gisimenti. Ndakurahiye ushobora kugera mu Gisimenti, hariya urenze kwa Lando, ugakata mu gahanda kari inyuma y’inyubako zisa n’iziteganye na Stade Amahoro ukagira ngo wayobye.

Nta bushakashatsi ndakora, ariko hariya hantu birashoboka ko ariho hari utubari twinshi kandi haba hari abantu benshi mu mpera za Weekend. Haba hahiye bya nyabyo.

Muri iyi minsi bwo Umujyi wa Kigali wakoze umuti [wihangane niba utazi icyo gukora umuti aricyo], maze ugena ko muri ako gace nta modoka zizajya zihaca muri Weekend. Bivuze ko mu muhanda, hasigaye hashyirwa intebe abantu bakizihirwa, umuheha ukanyarira ijigo nta rusaku rw’ihoni.

Ubusanzwe muri ako gace, nta muntu wanywaga yicaye, kuko umwanya w’intebe watumaga abakiliya babura aho bahagarara. Ubu kugira ngo n’amabwiriza ya Covid-19 yubahirizwe, ba nyiri utubari bemerewe gutera intebe mu muhanda ngo abantu bategerana cyane.

Ijoro rya mbere ry’iyo gahunda ryari ubunyunyusi wa mugani wa Mico. Ku wa Gatanu tariki 25 Gashyantare 2022, abantu bahageze bafata ikiyeli karahava, mushikaki n’ikirayi nabyo hafi aho binurira.

Icyashara cyari cyabonetse

Ba mucoma n’abavanga imiziki bateye ibyuma kare kare izuba rikiva biteguye ikirori cy’ijoro no gukorera amafaranga bakiyibagiza igihe bamaze bafunze.

Iyo wakataga uvuye muri uriya muhanda werekeza kuri Stade Amahoro ugana muri ako gace, wakubitanaga n’umuhumuro w’ikirungo, umuziki nawo rwose uri hejuru cyane, amapiano abantu bayumvira mu misokoro.

Imiziki yungikanyaga amajwi kuko buri muryango wari wakoze uko ushoboye ngo ureshye abakiliya.

Niba ukunda agasembuye, nta cyo wabura mu Gisementi kuko n’amazi y’Abarusiya [Водка; Soma: Vodka] aba ahari. Niba utari ubizi, mu Kirusiya, Voda [Вода] bisobanura amazi.

Hari n’akantu keza numvise i Remera, ngo burya zose ziba ziri ku kiranguzo. Ubwo rero umva ko ntakurangiye, nibaguhenda iyo hirya ntuzavuge ngo sinakubwiye.

Mucyo Ndeze Viateur ukorera mu kabari kitwa Bahamas, yagize ati “Icyiza ni uko twagize abakiliya benshi uyu munsi nawe urabona ko twashyize imbabura hanze, abakiliya ni benshi pe.”

Yavuze ko abakiliya babonetse ku bwinshi ndetse ahamya ko inyungu yabonetse agereranyije no mu bihe byashize.

Yongeyeho ko aka gace katari kagirwa ‘Car Free Zone’ bagezaga amasaha ya Saa kumi n’ebyiri z’umugoroba bamaze kugurisha mushikaki 60 mu gihe kuri uyu munsi bari bamaze kugurisha iziri hagati ya 400 na 500.

Uzamukunda Sarah ucururiza mu kabari kitwa La Petite Bruxelles Cuisine yagize ati “Ibi bintu byadushimishije, tugereranyije n’ibihe bishize bya Covid-19 aho twacuruzaga bitoroshye kubona abakiliya ari ikibazo ariko uyu munsi urabona ko hari ubwisanzure, hameze neza twateye intebe mu muhanda.”

Utubari twinshi mu two ku Gisimenti tutari ku muhanda wafungiwe imodoka, kubona abakiliya byari ingume, icyakora muri uwo muhanda wo byari ibicika abantu banyuranamo.

Bamwe mu baganiriye na IGIHE bavuze ko banyuzwe n’icyemezo cy’Umujyi wa Kigali, ibyishimo byari byose.

Jean Paul Uwizeye utuye Kabeza yagize ati “Imodoka zazaga bakatubwira ngo mube mwigiyeyo zihite none nategereje ko imodoka zihite nazibuze

ubu ibyishimo ni byinsi cyane nko kubakunzi b’agasembuye nka twe kuko nta modoka n’imwe iri guca aha ubu.”

Yongeyeho ko icyo yifuza ari uko bazana abigisha abasohokera muri iyi ‘Car Free Zone’ ku buryo batanywa inzoga nyinshi kuko byagaragaye ko hari abari kunywa izirenze urugero.

Egide Twagirumikiza we yagize ati “Sha ndabona ibintu bimeze neza cyane kabisa kubera ko mbere hari hari akavuyo imodoka zicacana ariko urabona ko abantu batuje nta kintu bikanga bameze neza kabisa bari kunywa, mu mutuzo.”

Mu Gisimenti niho hantu hahuzaga abantu, washoboraga kuhagera ukahahurira n'uwo muherukana kera
Icyo kunywa cyabaga cyateguwe neza. Uhereye ku mitobe y'abarokore ukageza ku mazi y'intare anywa n'abakunda icyanga cy'umwenge
Mu bubiko inzoga ziba zihari ku bwinshi ariko abakiriya barabuze
Igitoki, Ibirayi n'ibindi byifashishwa mu bikoni by'utubari byabaga byateguwe
Umuhumuro wa ka mushikaki wawumviraga kwa Lando ukagenda wiruka
Mbere abantu babaga buzuye ariko ubu ntawuharangwa
Hari abahitagamo kurisoma batembera mu muhanda
Abashaka kuganira ku mishinga y'ejo hazaza nabo ntabwo bahezwa
Imbere mu tubari haba harimo mbarwa, ibirori byimukiye mu muhanda
Abakorerabushake bareba ko amabwiriza y'inzego z'ubuzima yubahirizwa baba bahari bakumakuma abashaka gutana
Muri iki gihe, Gisimenti isigaye iha benshi umutuzo batabonera ahandi
Umuhanda ni munini, buri wese yateraga intebe imbere y'umuryango w'akabari ke
Niba ushaka abakiliya muri aka gace, bigusaba ibintu bitatu by'ingenzi: Icyo kunywa, umuziki n'icyo kurya ubundi ukaba ufite umuntu uri bukubarire inoti
Abenshi mu basohokera muri aka gace, ni urubyiruko
Hari abahatemberera batajyanywe no kunywa ahubwo bagiye kureba uko byifashe gusa
Iyo agatama kagiye gushiramo, bakugoboka bwangu bagakomera
Utubari twinshi two ku Gisimenti twashyizeho poromosiyo mu rwego rwo kureshya abakiliya
Abashinzwe umutekano bari babukereye, bagenzura ko nta kibazo na kimwe gihari
Abantu baba ari urujya n'uruza...
Mu muhanda hagati buri wese yisanzuye ukwe
Soma wongere usoma maze ucurure!
Bamwe baboneyeho gutembera uyu muhanda wahariwe utubari mu mpera z'icyumweru
Buri mpera z'icyumweru uyu muhanda uzajya uba ufunze
Byari ibyishimo ku bari basohokeye muri aka gace
Nubishobora uzasohokane n'umukunzi wawe ku Gisimenti
Imvura yabaye kidobya ku mugoroba wa mbere wo kwishimira aka gace
Abantu bahise bihinira mu nzu kubera imvura
N'ubundi kuva mu muhanda nta cyari kigoye kuko bihindiraga mu tubari imbere ho hasanzwe hatwikiriye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .