Gaël Faye yahishuye uko yagowe no kubona umukunzi bitewe n’ibara ry’uruhu rwe

Yanditswe na Muvunyi Arsène
Kuya 15 Nyakanga 2019 saa 10:42
Yasuwe :
0 0

Umwanditsi w’ibitabo akaba n’umuraperi Gaël Faye yatangaje uburyo kuvuka afite uruhu rw’imvange byamugizeho ingaruka aho yabaye hose kugera no mu rukundo.

Gaël ni Umufaransa ufite inkomoko mu Rwanda umaze kwamamara cyane ku rwego mpuzamahanga bitewe n’igitabo yanditse cyitwa “Petit Pays” cyangwa se “Agahugu gato.’’

Kivuga ku nkuru y’umwana ufite hagati y’imyaka 10 na 15, aba yibuka uburyo ubuto bwe bwaje kwicwa n’ibibazo bya politiki. Yavukiye mu Rwanda ahungira mu Burundi aho yavuye ajya mu Bufaransa agendeye kuri pasiporo ya se.

Anavuga ku kibazo cyo kuvuka ku babyeyi badahuje uruhu kuko se ari Umufaransa na nyina akaba Umunyarwandakazi.

Haba i Burayi no muri Afurika hose bamufataga nk’umunyamahanga ku bwo kugira uruhu rw’imvange.

Mu kiganiro yagiranye n’ikinyamakuru cyo muri Brésil cyitwa ELPAIS, Gaël Faye, yavuze ko kuba yaravutse ku muzungu w’umwiraburakazi ukomoka mu Rwanda, byatumye sosiyete yabayemo zose zitamufata neza kuko nta na hamwe bamwibonagamo.

Yagize ati “Kuba ndi imvange byakoreshejwe cyane mu kunsenya ariko ubu nabihinduye mu kwiyubaka.’’

“Mu buzima bwanjye abantu ntibigeze bamenye uko bamfata. Sindi umuzungu kandi si ndi n’umwirabura. Nabaye ku mihanda mibi yo mu Burundi mba no mu duce twiyubashye twa Versailles. Nize ibijyanye n’ubukungu ariko ndirimba Rap nakora mu kigega cy’ishoramari i London.”

Gaël Faye yavuze ko kuvuka ku babyeyi b’impu zitandukanye byamugizeho ingaruka no mu rukundo ku buryo kubona uwo bubakana byamugoye cyane, ku bw’amahirwe abona umukunzi bahuje.

Ati “Mu gihe kirekire, urukundo rwanjye rwari rugoye cyane. Nagize amahirwe mpura n’umuntu dusangiye icyerekezo. Nizera ko abana bacu na bo bavanze by’igice badahura n’ibibazo nk’ibyacu.”

Gaël yashakanye na Violaine Gauthier, umukobwa wa Alain Gauthier na Daphrose biyemeje gukurikirana abasize bakoze Jenoside yakorewe Abatutsi mu 1994 baba mu Bufaransa.

Uyu mugore babyaranye abana babiri, mu 2015 bakoze ubukwe ndetse bubera ku Kiyaga cya Kivu mu Rwanda ndetse muri icyo gihe niho yari atuye.

Mu ntangiriro za 2019 mu Karere ka Rubavu hatangiye gufatirwa amashusho ya filime ishingiye kuri “Petit Pays”, iki gitabo cyagurishijwe kopi 700,000 mu Bufaransa.

Gaël Faye yamenyekanye mu ndirimbo zirimo ‘Je pars’, ‘Ma femme’, ‘Petit Pays’, ‘PiliPili’ n’izindi. Yavukiye anarererwa i Bujumbura mu Burundi nyuma yerekeza i Paris afite imyaka 13. Akunze kuvuga uruhurirane rw’imico kuri we ndetse n’ingorane kuri album ye yise “Pili pili sur un croissant au beurre”.

Iyi album yayikoreye i Paris n’i Bujumbura ikaba ishushanya imyaka ya mbere ya Faye ubwo yageragezaga kwimenyereza ubuzima bw’i Paris. Kuri iyi album kandi hari abandi bahanzi yakoranye nabo nka Tumi Molekane wo muri Afurika y’Epfo mu itsinda rizwi nka Tumi n’Umunya-Angola, Bonga n’abandi.

Gaël Faye kuvuka ku muzungu n'umwirabukazi byamutumye afatwa nk'umunyamahanga n'abantu bose
Gaël Faye wagowe no kubona umugore bahuje yaje gushakana na Violaine Gauthier, ubukwe bwa bombi bwabereye ku Kiyaga cya Kivu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza