00:00:00 IGIHE NETWORK KN KINYARWANDA EN ENGLISH FR FRANCAIS

Filime nshya zo kwitega muri uyu mwaka wa 2023

Yanditswe na Mahoro Vainqueur
Kuya 14 Mutarama 2023 saa 12:30
Yasuwe :

Uyu mwaka wa 2023 umaze iminsi mike utangiye ni umwe mu yitezweho kuzasohokamo filime nyinshi zitegerezanyijwe amatsiko menshi n’abakunda sinema bari hirya no hino ku Isi.

Kuva kuri "Guardians of the Galaxy" , "John Wick" , “Scream 6" kugera kuri " Magic Mike’s Last Dance," IGIHE igiye kugaruka kuri zimwe muri filime wakitegura kureba muri uyu mwaka.

Guardians of the Galaxy Vol. 3

Iyi filime izasohoka ku wa 5 Gicurasi 2023 yayobowe na James Gunn, igaragararamo abakinnyi ba filime batandukanye barimo Chris Pratt, Vin Diesel, Zoe Saldaña na Bradley Cooper.

Iyi filime igaruka ku bakinnyi ba filime za Marvel Studios bafite imbaraga zidasanzwe, igaruka ku nkuru ya Peter Quill uhangayikishijwe no kubura umukunzi we Gamora gusa akaba agomba gukora ibishoboka byose agahuriza hamwe ikipe yo kurinda isanzure ndetse n’abantu be.

Cocaine Bear

Iyi ni filime ishingiye ku nkuru mpamo y’idubu ryirabura ryapfuye nyuma yo kurya umufuka wuzuye cocaine mu Ukuboza 1985.

Iyi filime yayobowe na Elizabeth Banks izasohoka ku wa 24 Gashyantare 2023 igaragaramo abakinnyi ba filime nka Keri Russell, O’Shea Jackson Jr, Alden Ehrenreich, Ray Liotta

Iyi filime igaruka ku nkuru y’ idubu ryirabura rirya cocaine yatawe mu ishyamba biturutse ku mpanuka y’indege, nyuma yo guta ubwenge iri dubu ryica abantu bose bahuye naryo.

Magic Mike’s Last Dance

Niba ukunda filime zo kubyina iyi ni imwe muri filime wareba izasohoka ku wa 10 Gashyantare 2023, yayobowe na Steven Soderbergh.

Iyi filime igaragaramo Channing Tatum, Salma Hayek Pinault, Jemelia George, n’abandi.

Igaruka ku nkuru ya Mike Lane wahuye n’ihungabana yatewe n’igihombo yagize mu’ubucuruzi akajya gucuruza mu kabari muri Floride.

Nyuma y’igihe Mike yerekeza i Londres ari kumwe n’umukobwa w’umukire watumye yongera kugaruka mu ruhando rw’ababyinnyi beza bagezweho.

Knock at the Cabin

Iyi filime izasohoka ku wa 3 Gashyantare 2023 yayobowe na M. Night Shyamalan igaragaramo, Dave Bautista ,Jonathan Groff, Ben Aldridge, Dave Bautista, Rupert Grint, Nikki Amuka-Bird , Abby Quinn , n’abandi.

Igaruka ku nkuru y’umukobwa ukiri muto n’ababyeyi be bafashwe bugwate n’abantu bane batazi bitwaje intwaro babasaba kugira amahitamo bakora kugira ngo birinde imperuka cyangwa kurengera Isi.

Niba ushaka kumenya icyo bahisemo mbere y’uko iyi filime isohoka wasoma igitabo, ‘The Cabin at the End of the World’ cyanditswe na Paul Tremblay.

Dungeons & Dragons: Honor Among Thieves

Iyi ni filime izasohoka ku wa 31 Werurwe 2023 yayobowe na Jonathan Goldstein afatanyije na John Francis Daley

Iyi filime igaragaramo abakinnyi ba filime nka Chris Pine, Michelle Rodriguez, Justice Smith, Hugh Grant, Regé-Jean Page, n’abandi.

Ishingiye ku mukino wo kuri internet Dungeons & Dragons, igaruka ku nkuru y’umujura uri kumwe n’itsinda ry’abarwanyi bafite imbaraga zidasanzwe bajya kwiba ibintu by’agaciro gusa inzira yabo iba mbi cyane nyuma yo guhura n’abarwanyi batari biteze.

Scream 6

Iyi filime iri muri cyiciro cy’iziteye ubwoba izasohoka ku wa 10 Werurwe 2023 yayobowe na Matt Bettinelli-Olpin afatanyije na Tyler Gillett.

Iyi filime igaragaramo abakinnyi ba filime barimo, Jenna Ortega , Melissa Barrera, Hayden Panettiere, Courteney Cox, Samara Weaving, n’abandi.

Iki gice cya gatandatu cya filime yiswe Scream kigaruka ku bantu bane barokotse ubwicanyi bwabereye i Woodsboro bakerekeza mu mujyi wa New York bagiye gushaka imibereho mishya , gusa bisanga bakurikiwe na babicanyi bahoze babahiga.

John Wick: Chapter 4

Iyi ni filime itegerejwe n’abatari bake yayobowe na Chad Stahelski izasohoka ku wa 24 Werurwe 2023 .

Igaragaramo abakinnyi ba filime bakomeye nka Keanu Reeves, Donnie Yen, Scott Adkins, Bill Skarsgård, Ian McShane, Laurence Fishburne, Hiroyuki Sanada n’abandi.

Iki gice cya kane cya filime yitwa John Wick kigaruka ku nkuru y’umugabo witwa John Wick wahoze ari umwicanyi akaza kubivamo gusa aba ashakishwa n’abicanyi benshi kubera amafaranga yashyizweho ku muntu uzazana umutwe we.

Uyu John Wick ahura n’indwanyi zikomeye kuva i New York , Paris, Berlin kugera i Tokyo mu Buyapani.

Creed III

Iyi filime yayobowe na Michael B. Jordan izasohoka ku wa 3 Werurwe 2023, igaragaramo Michael B. Jordan, Tessa Thompson, Jonathan Majors, Phylicia Rashad n’abandi.

Iki gice cya gatatu cya Creed kitazagaragaramo Sylvester Stallone kigaruka ku nkuru y’umusore witwa Adonis Creed uba amaze kubaka ibigwi mu mukino w’iteramakofe.

Nyuma ahura n’ikigeragezo gikomeye cyo guhangana n’ishuti ye yo mu bwana Damian, uba avuye muri gereza kandi buri wese aba agomba kwerekana ko ashoboye uyu mukino w’iteramakofe.

Mission: Impossible — Dead Reckoning, Part One

Ku bakunze filime ya Mission Impossible ku itariki ya 17 Nyakaganga 2023 hazasohoka ikindi gice cyayo cyiswe ‘Dead Reckoning’ cyayobowe na Christopher McQuarrie.

Iyi filime imaze imyaka ibiri itunganywa ikaba yaratinze bitewe n’icyorezo cya COVID19, igaragaramo Tom Cruise, Hayley Atwell, Ving Rhames, Simon Pegg, Rebecca Ferguson, n’abandi.

Iki gice kigaruka kuri Ethan Hunt ukora ibikorwa by’ubutasi mu bihugu bitandakanye, akazi gafatwa nkakadashoboka ariko we abasha kugakora kandi neza nubwo aba ahingwa na benshi.

Spider-Man: Across the Spider-Verse

Ku bakunda filime z’inkuru zishushanyije (Destin Animé) ku wa 2 Kamena 2023 hazasohoka filime ya Spider-Man: Across the Spider-Verse.

Iyi filime yayobowe na Joaquim Dos Santos, Kemp Powers na Justin K. Thompson igaragaza Spider-Man uba amaze guhura n’inshuti ye Gwen Stacy nyuma afata umwanzuro wo kwambukiranya isanzure kugirango ahurize hamwe itsinda rishya rifite imbaraga nkize bakiyemeza kurinda umurage wabo gusa umwe muri bo Miles yisanga arwanya bagenzi be.

Sinabura kukurangira izindi filime nka ‘Ant-Man and the Wasp: Quantumania’ izasohoka ku wa 17 Gashyantare, ‘Aquaman and the Lost Kingdom’ izasohoka ku wa 25 Ukuboza, ‘Guardians of the Galaxy Vol. 3’ izasohoka ku wa 5 Girurasi, ‘The Expendables 4’ izasohoka ku wa 22 Nzeri , ‘’Indiana Jones and the Dial of Destiny’ izasohoka ku wa 30 Kamena, ‘Wonka’ izasohoka ku wa 15 Ukuboza 2023 .


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .