Dody watsinze muri Hanga Higa ya mbere yatangiye gushyirwamo imbaraga na Alain Muku

Yanditswe na Nsengiyumva Emmy
Kuya 8 Gashyantare 2020 saa 05:42
Yasuwe :
0 0

Umuhanzi Rwogera Dody uri mu batsinze muri Hanga Higa ya mbere yabaye mu 2014 ntagire ubufasha buhagije abona yatangiye gushyirwamo imbaraga na Alain Muku usanzwe utegura aya marushanwa.

Irushanwa rya Hanga Higa ryatangijwe na Alain Muku mu mwaka wa 2013, rifite muri gahunda gufasha abahanzi bakiri bato badafite ubushobozi kandi bafite impano ntashidikanywaho.

Rwogera ari mu bahanzi begukanye iri rushanwa mu 2014. Muri uwo mwaka ntiyashoboye kwitabwaho cyane kuko Alain Muku yahise ava mu Rwanda.

Alain Muku yagize ati ”Dody ari mu batsinze mbere, igihe nari kuba naramwitayeho byabaye ngombwa ko mpita njya i Burayi sinamufasha, ni umusore w’umuhanga wari watsinze amarushanwa ku rwego rw’igihugu, yabaye uwa kabiri rero ntabwo ari uwo gushidikanyaho.”

Yavuze ko abaherutse gutsinda irushanwa rya Hanga Higa riheruka aribo bamuteye imbaraga zo kwibuka ko hari uwo yari ataruzuriza isezerano.

Yakomeje ati “Bakimara gutsinda nasanze ntahita mba aribo nkorera nyamara uyu watsinze mbere atarakorerwa. Niyo mpamvu ariwe nahereyeho ariko n’abandi baraje kuko ibihangano ubu turabifite kandi byinshi buri muhanzi wo muri Boss Papa muzamwumva mu minsi iri imbere.”

Dody kuri ubu yashyize hanze indirimbo nshya yise “Inyovi” yanasohokanye n’amashusho yayo.

Uyu muhanzi aganira na IGIHE yavuze ko iyi ndirimbo ishingiye ku nkuru mpamo y’ibyamubayeho yiga mu mashuri yisumbuye aho yakundanye n’umukobwa urukundo rwabo rukaza kwitambikwamo n’iwabo kubera ko uyu musore yari umukene.

Agahinda k’urukundo rwe rwajemo kidobya yiga mu mashuri yisumbuye niko katumye akora iyi ndirimbo yise “Inyovi”.

Abajijwe igisobanuro cy’inyito yahaye indirimbo ye, Dody yagize ati "Ubundi bavuga ko umuntu yakuye inyovi cyangwa se yakuye ubwatsi."

Alain Muku yavuze ko uyu muhanzi kimwe n’abandi babarizwa mu nzu ya Boss Papa bagiye gutangira gushyira hanze ibihangano ku buryo abakunzi b’umuziki batazongera kugira irungu.

Reba indirimbo "Inyovi" ya Dody

Dody watsinze muri Hanga Higa ya mbere yatangiye gushyirwamo imbaraga na Alain Muku

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .