00:00:00 IGIHE NETWORK KN KINYARWANDA EN ENGLISH FR FRANCAIS

DJ Brianne yakomoje ku bibazo yahuye nabyo i Burayi byatumye yijundika Social Mula (Video)

Yanditswe na Nsengiyumva Emmy
Kuya 6 Mutarama 2023 saa 03:11
Yasuwe :

Nyuma y’ukwezi kurenga yari amaze i Burayi, kuri uyu wa 6 Mutarama 2023 nibwo DJ Brianne yageze i Kigali ndetse ava i muzi inkuru y’ibibazo yahuriye nabyo i Burayi byari byatumye yijundika umuhanzi Social Mula bari bajyanye.

Uyu mukobwa umaze kubaka izina mu kuvanga imiziki, wageze i Kigali ubona ko akeye ku maso nubwo umunaniro wo wigaragazaga, yakiriwe n’abo mu muryango we.

Akigera i Kigali, DJ Brianne yashimiye Imana yamubaye hafi mu rugendo ndetse ikaba yari imaze iminsi ibana nawe aho yari ari i Burayi.

Nk’umunyamakuru wari ugize amahirwe yo guhura n’uyu mukobwa akigera i Kigali ntabwo yari kugenda atabajijwe ibijyanye n’ibyavuzwe ko yahuriye n’akaga mu Budage ubwo yajyaga kuhacuranga ku wa 30 Ukuboza 2022.

Iki gihe DJ Brianne yatangaje amagambo akomeye yikoma abamutumiye, abashinja gushaka kumwicisha imbeho yo mu Budage no kumuta ku muhanda wo mu gihugu atazi.

Ni inkuru ndende DJ Brianne abarana umujinya n’akababaro cyane iyo ari kwibuka ibihe ahamya ko yanyuzemo.

Uyu mukobwa yahagurukanye i Kigali na Social Mula, icyo gihe bakaba bari berekeje i Burayi mu mpera z’Ugushyingo 2022, mu gihe igitaramo cyabo cyari ku wa 30 Ukuboza 2022.

DJ Brianne ahamya ko nta kibazo agifitanye na Social Mula, akemeza ko ibyo yari yanditse yabitewe n'umujinya

Ibi byari bisobanuye ko aba bahanzi bari bagiye kumara ukwezi i Burayi mbere yo gutaramira mu Budage aho bari batumiwe mu Mujyi wa Hannover.

Icyakora uyu mukobwa avuga ko baje gutungurwa n’uko uwari wabatumiye nta mafaranga ahagije yari afite ku buryo yari kubatunga ukwezi kose mbere y’uko bamukorera igitaramo ku wa 30 Ukuboza 2022.

Nk’uko DJ Brianne abihamya, icyo gihe ngo bahise bafata icyemezo cyo kwigumira mu Bubiligi, atangira no kuhabona ibiraka byo gucuranga mu tubyiniro tunyuranye.

Bitewe n’uko uwabatumiye atigeze abitaho muri icyo gihe cyose kandi byari bikubiye mu masezerano bagiranye, DJ Brianne avuga ko yaje gufata icyemezo cyo kutazitabira igitaramo cye.

Ku rundi ruhande ariko, DJ Brianne avuga ko uko igitaramo cyegerezaga ariko uwabatumiye yarushagaho gushaka uko bahura.

DJ Brianne wari wabereye ibamba uwamutumiye, yavuze ko bize amayeri mashya yo kunyura kuri Social Mula ngo abimwemeze.

Ati “Njye nari maze ukwezi mu Bubiligi nkora buri mpera z’icyumweru barananiwe kubahiriza ibyo twumvikanye. Social Mula aranyegera ambwira ko twajya gukora iki gitaramo banyizeza ko nzishyurwa mbere yo gucuranga.”

Uyu mukobwa wishyuzaga amayero 1000 (arenga gato kuri miliyoni imwe y’amafaranga y’u Rwanda) yaje kwemera kujyayo ariko yemeranya nabo ko nyuma y’igitaramo bagomba guhita bamusubiza mu Bubiligi kuko tariki 31 Ukuboza 2022 yari afiteyo ibitaramo bibiri.

Nguko uko DJ Brianne ahamya ko yisanze mu Budage mbere y’iminsi itatu ngo igitaramo kibe.

Ahamya ko ubwo yari akigera mu Budage bamwitayeho bamufata neza icyakora ibyo kumwishyura bakagenda babyihunza.

Ati “Mbere yo kuhakorera igitaramo naje kubabwira ko ntari bujye ku rubyiniro ntarabona amafaranga nk’uko twari twabyumvikanye. Icyo gihe bashatse kumpa amayero 500 gusa ndabyanga, baje gusaba Social Mula Amayero 300 mu yo bari bamuhembye baba bampaye 800 ariko twemeranya ko 200 bayampa bukeye.”

Uyu mukobwa avuga ko uburyo yagoranye yaba kugera mu Budage ndetse na mbere yo kujya ku rubyiniro biri mu byarakaje uwamutumiye bigatuma nawe atangira kumuhima.

Nyuma y’igitaramo uyu mukobwa yashatse uwamutumiye wari wamwijeje ko bahita bamusubiza mu Bubiligi aramubura.

DJ Brianne avuga ko kubura uwamutumiye, yagerageza no kwiyambaza Social Mula ntagire icyo amufasha, byatumye atekereza ko ari wenyine muri ibyo bibazo.

DJ Brianne avuga ko uretse ibibazo yahuriye nabyo mu Budage, ubundi urugendo rwe rwagenze neza kuko icyamujyanye yagikoze

DJ Brianne wari ufite akazi mu Bubiligi mu ijoro ryo ku wa 31 Ukuboza 2022, avuga ko uwo munsi yabuze uko ava mu Budage bimutera ihungabana rikomeye.

Yahise afata icyemezo cyo gushaka inshuti zamufasha kuva mu Budage kuko abamutumiye bari batakimwitaba kuri telefone ngo bamufashe.

Bitewe n’iminsi mikuru uburyo bwo kugenda bwari bugoranye ndetse imbeho y’i Burayi yakamejeje, gusa ntibyaciye intege DJ Brianne wahise atangira gushaka uko yirwanaho abifashijwe n’inshuti yungukiye i Burayi.

Uyu mukobwa yagiriwe inama yo gutega bus iva mu Hannover ikajya i Bruxelles, urugendo avuga ko rwari rugoye cyane icyakora rurangira abashije kugera mu Bubiligi.

Ubwo yari muri uru rugendo ahamya ko rwamugoye, nibwo yanditse amagambo akomeye benshi bibuka ku mbuga nkoranyambaga ze.

Urugendo rugoranye rwatumye DJ Brianne agera mu Bubiligi mu rukerera rwo ku wa 1 Mutarama 2023, byatumye akazi ka mbere yari afite ku wa 31 Ukuboza 2022 gapfa.

DJ Brianne yaboneyeho guca impaka, avuga ko nta kibazo yigeze agirana na Social Mula, ndetse ko ibyo abantu babonye yandika kuri we byaturutse ku burakari yari afite cyane ko atumvaga ukuntu uyu muhanzi bari bajyanye yamusize akaba ari kumwe n’ababatumiye nyamara adashobora kubabwira kujya kumufasha.

Icyakora nyuma uyu mukobwa ahamya ko yaje kumenya ko Social Mula ntaho yari ahuriye n’ibyo, akemeza ko kugeza ubu nta kibazo na kimwe bafitanye.

DJ Brianne yageze i Kigali yakirwa n'abarimo umwana we
DJ Brianne yagiriye inama abanyamuziki batumirwa i Burayi kujya bagenda banogeje amasezerano bagirana n'ababatumiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .