Diamond yabyinishije inkumi z’i Kigali mu isozwa rya Iwacu Muzika Festival- Uko igitaramo cyagenze (Amafoto na Video)

Yanditswe na Ishimwe Israel, Uwiduhaye Theos
Kuya 17 Kanama 2019 saa 05:57
Yasuwe :
0 0

Iminota 110 ni yo umuhanzi ufite izina ryamamaye mu muziki wa Afurika y’Iburasirazuba, Naseeb Abdul Juma [Diamond Platnumz] yamaze ku rubyiniro mu gitaramo gisoza IWACU MUZIKA FESTIVAL cyabereye muri Parking ya Stade Amahoro i Remera.

Iki gitaramo cyatangiye mu ijoro ku wa Gatandatu gisozwa mu rukerera rwo ku Cyumweru, tariki ya 18 Kanama 2019.

Abakobwa b’uburanga, abasore b’intarumikwa n’abandi bakunda ibihangano by’umuhanzi Diamond wo muri Tanzania n’iby’abandi bagezweho mu Rwanda, bari babukereye biteguye gutarama kakahava.

Iserukiramuco rya Iwacu Muzika ryateguwe mu gufasha abahanzi bo mu Rwanda kwegerana n’abakunzi babo. Ryahujwe no kwizihiza imyaka 25 ishize u Rwanda rubohowe mu maboko y’ubutegetsi bubi bwagejeje igihugu kuri Jenoside yakorewe Abatutsi yahitanye ubuzima bw’inzirakarengane zisaga miliyoni mu minsi 100.

Ibitaramo byaryo byashyizweho akadomo nyuma yo kunyura mu bice bitandukanye by’igihugu aho abahanzi bakomeye mu Rwanda bataramanye n’abakunzi babo, basangira ibyishimo.

Icya nyuma cyabereye muri Kigali aho abanyamujyi n’abandi basirimu bakunda umuziki bari babukereye, babyambariye mu buryo bugaragara ko biteguye ikirori gikomeye.

Abitabiriye iki gitaramo bataramiwe n’abahanzi barimo Nsengiyumva François wamamaye nka ‘Igisupusupu’, Intore Masamba, Safi Madiba, Marina, Queen Cha, Amalon, Bull Dogg, Bruce Melodie, Sintex, Bushali ukunzwe mu ndirimbo ye yitwa “Nituebue” n’ Itorero ry’Igihugu ‘Urukerereza’.

Cyasojwe na Diamond wasesekaye i Kigali mu gitondo cyo ku wa 16 Kanama 2019, mbere yo kujya gutaramira i Bujumbura akagaruka mu Rwanda.

Diamond umaze kugwiza ibigwi mu muziki wa Afurika yakoresheje amasaha agera kuri abiri, ari imbere y’abakunda ibihangano bye muri Kigali.

Yaririmbye indirimbo nyinshi zirimo izatumye amenyekana nka "Mbagala" n’izindi zirimo "Kanyaga" iri mu zo aheruka gushyira hanze.

Mu magambo ye yakunze kuvuga ko akunda uko abakobwa bo mu Rwanda babyina umuziki. Yaje guhamagara bamwe barabyinana ndetse mu kubasezera buri wese akamugwa mu byano mu kumugaragariza ko yamwishimiye.

Diamond yasezeye ku bakunzi be ahagana saa munani, ahita yerekeza mu modoka arataha. Yavuye ku rubyiniro hari abafana bagifite inyota yo gutaramana nawe nubwo hari n’abavugiraga mu matamatama ko uyu muhanzi afite umunaniro mwinshi.

UKO IGITARAMO CYAGENZE:

-  Amafoto ya Diamond abyinana n’abakobwa b’i Kigali

Diamond yabyinishije abakobwa b'i Kigali karahava
Yabyinnye ingwatira asoza avuza ko "Abanyarwandakazi muzi kubyina''
Abanyabirori b'i Kigali bari babukereye
Diamond yabyinishije inkumi z’i Kigali mu isozwa rya Iwacu Muzika Festival yanyuze mu bice bitandukanye by'igihugu
Bakaraze umubyimba mu kwerekana ko bazi kubyina koko
Inkumi z'i Kigali zishimiye gusuhuzanya no guhuza ibyano na Diamond
Bahoberanaga bigashyira kera! Bagafatwa n'amarangamuta
Uyu mugabo yanyuzagamo akanabyina mu buryo buryoheye ijisho

-  01:39: Diamond yashyize akadomo ku gitaramo gisoza IWACU MUZIKA FESTIVAL

Nyuma yo kuririmba indirimbo nyinshi zirimo izakunzwe cyane kuva mu myaka yo hambere, Diamond yasoje igitaramo cya Iwacu Muzika aririmba indirimbo yitwa “Mdogo mdogo”.

Uyu muhanzi mu masaha agera kuri abiri yamaze ku rubyiniro yeretswe urukundo nubwo hari abasigaranye akangononwa bamugereranya n’abahanzi bo mu Rwanda barimo Bushali bavuga ko ’yamuhize’.

Diamond mu ndirimbo yaririmbye harimo “Hallelujah” yakoranye na Morgan Heritage; Marry You yasubiranyemo n’Umunyamerika Ne-Yo; Iyena yakoranye na Rayvanny; “My number one”; Make Me Sing yakoranye na AKA; African Beauty yaririmbanye na OMARION; Katika yahuriyemo na Navy Kenzo; Kwangwaru yafatanyije na Harmonize [uyu bivugwa ko agiye gutandukana na we agatangiza label ye ya muzika]; Love you die yafatanyije na Patoranking n’izindi.

Yavuye ku rubyiniro ahita aherekezwa ajyanwa mu modoka, aho yari ashagawe cyane n’abiganjemo abakobwa b’ikimenyero bagaragara cyane mu bitaramo bikomeye muri Kigali.

01: 34: Diamond yikuye ishati

Mu rukerera rwo ku Cyumweru umuhanzi Diamond wari umaze isaha irenga ari ku rubyiniro yakuyemo ishati atangira kubyina, cyane yitegura gusoza.

Yahise aririmba indirimbo ye yitwa “Mdogo mdogo’’. Ababyinnyi be bayibyinnye mu buryo bwo kuzunguza ibice bitandukanye by’umubiri, byashimishije benshi.

Diamond Platnumz yaririmbye hafi amasaha abiri mu gitaramo yatumiwemo i Kigali
Yanyuzagamo agakoresha imbaraga nyinshi ku rubyiniro
Diamond ysangiye ibyishimo n'abakunze ibihangano bye ubwo yatangiraga umuziki nk'umuhanzi wigenga

-  Diamond yataramiye i Kigali avuye i Bujumbura

Diamond yakoreye igitaramo mu Mujyi wa Kigali nyuma y’amasaha make avuye mu Mujyi wa Bujumbura mu Burundi aho yataramiye ku wa 16 Kanama 2019.

Uyu muhanzi ku rubyiniro yagaragaje umunaniro ugereranyije n’imbaraga asanzwe akoresha mu bitaramo agaragaramo ndetse n’ibyo amenyerewemo.

Bamwe mu bakunzi ba muzika bavugiraga mu matamatama ko “Bushali [wamamaye muri ‘Nituebue’] yamurushije kuririmba neza.’’

-  Diamond yabyinishije abakobwa b’i Kigali

Umuhanzi Diamond Platnumz yageze ku ndirimbo "Salome" yafatanyije n’umuhanzi Rayvanny ubarizwa mu nzu ye ya Wasafi arishimirwa cyane n’abiganjemo igitsinagore.

Akiyisoza yahise ahamagara ku rubyiniro abakobwa bagera kuri bane bafatanya kubyina umuziki karahava.

Yagize ati “Njye nziko abakobwa b’Abanyarwanda babyina cyane.’’

Babyinnye mu buryo bwatangariwe na benshi uyu muhanzi aririmba indirimbo yitwa “Sema nami.’’

Yasojwe ahabwa amashyi na we ati “Ndabakunda cyane.’’ Ahita abahobera basubira mu byicaro byabo.

-  Diamond yaririmbye semi-live

Diamond yaje mu Rwanda nyuma y’urundi rugendo yahagiriye muri Mutarama 2018 aho yari aje muri gahunda ze bwite. Mu 2017 nabwo yari yahaje mu gitaramo cyabereye i Nyamata cyiswe Rwanda Fiesta yahuriyemo na Morgan Hertage bo muri Jamaica n’abandi.

No mu 2015 yataramiye i Kigali mu gitaramo cya East African Party cyo gutangiza umwaka. Icyo gihe yari yazanye na Zari bafitanye abana babiri wari umukunzi we.

Muri Parking ya Stade Amahoro aho yataramiye Abanyarwanda babarirwa mu bihumbi ku wa 18 Kanama 2019, hakunze kubera ibitaramo bikomeye. Umuhanzi wo muri Tanzania uheruka kuhakorera igitaramo ni Ali Kiba waharirimbiye muri East African Party itangira umwaka wa 2018.

Diamond yaririmbye mu buryo bwa semi-live, aho yafatanyije na band iri kumufasha gucuranga na DJ we uri gushyiramo indirimbo zitandukanye nk’izo yahuriyemo n’abandi bahanzi.

Mu ndirimbo yaririmbye harimo “The One”, “Ntampata Wapi”, “Mbagala’’, "Tandale" ziri mu ze zakunzwe kuva mu myaka yo hambere.

Mu kiganiro DJ Bissosso yagiranye na IGIHE mbere y’igitaramo yavuze ko "Diamond arakora semi live ariko ntabwo abapfunyikira amazi,ejo twari kumwe.’’

Diamond yataramiye mu Rwanda nyuma y'amasaha make avuye i Bujumbura mu Burundi
Umuziki we waramamaye muri Afurika hose

-  Diamond yakiriwe nk’intare mu Rwanda

Abakunzi b’umuziki wa Diamond bamwakiriye bavuga bati “Simba, Simba’’ bishatse kuvuga ’intare’.

Yasabye Abanya-Kigali kuzamura amaboko ngo bamwereke uko Kigali imeze n’urukundo bamufitiye; na we ahita yungamo ati “Ndabakunda cyane.’’

Diamond yanyuzagamo akagaragaza ko azi kubyina. Yageze ku ndirimbo “Inama” yakoranye na Fally Ipupa ukomoka muri Repubulika Iharanira Demokarasi ya Congo, ashyira micro na we afatanya n’itsinda ry’ababyinnyi ryamuherekeje, gukaraga umubyimba mu mbyino zigezweho.

Imbyino za Diamond zishimiwe cyane ku buryo yasoje kuyiririmba ahabwa amashyi menshi y’urufaya mu gushimangira uko ibihangano bye byinjiye mu buzima bwa benshi i Kigali.

Amateka avunaguye ya Diamond mu muziki

Nasibu Abdul Juma uzwi nka Diamond Platnumz ni umwe mu bahanzi bakomeye cyane muri Afurika muri iki gihe. Umuziki we warenze imbibi z’iwabo muri Tanzania ucengera henshi, ku buryo muri iki gihe igihembo gicaracara akibikaho.

Yahatanye mu bihembo bitandukanye bikomeye ku Isi nka BET, MTV n’ibindi bijyamo abahanzi b’inkorokoro. Uyu mugabo w’abana batatu afite imyaka 29 y’amavuko. Avuka kuri Abdul Juma na Sanura Kasim batandukanye uyu mugabo akiri umwana muto cyane.

Arebererwa inyungu mu muziki n’abajyanama babiri; Babu Tale na Said Fella. Ni we muyobozi mukuru wa Wasafi Records ibarizwamo Harmonize, Rayvanny, Queen Darlen, Lava Lava na Mbosso.

Ku myaka itanu yagiye mu ishuri ryitwa Chakula Bora Nursery, agize imyaka itandatu ajya mu ishuri ribanza rya Tandale yo mu Burengerazuba, mu 2002 nibwo yatangiye amashuri yisumbuye, mu 2006 arayasoza.

Kimwe mu byaranze ubuzima bwa Diamond harimo kuba yarabaye gafotozi ndetse akanacuruza caguwa ubwo yari akishakisha mu buzima ubushobozi bwe ari buke cyane ko se yari yaramutanye na nyina.

-  DIAMOND YAKIRIWE NK’ICYAMAMARE!

Ahagana saa 23:49 nibwo umuhanzi Diamond Platunmz yageze ku rubyiniro nyuma y’igihe hacurangwa umuziki uteguza abafana ko bagiye kwakira icyamamare mu muziki wa Afurika y’Iburasirazuba.

Anitha Pendo na MC Tino ni bo bafatanyije guhamagara Diamond.

Yageze ku rubyiniro amara nk’amasegonda nka 50 ataravuga. Yahise abaza Abanya-Kigali niba biteguye gutarama.

Ati "Mwiteguye kurya ikirori?’’ Yahise atangira aririmba indirimbo ye yitwa "Tetema’’.

Uyu muhanzi yeretswe urukundo bidasanzwe kuko buri ndirimbo ye yose yasanzwe atari nshya mu matwi y’abateraniye muri Parking ya Stade Amahoro.

-  DJ Marnaud yavanze umuziki ategurira Diamond abafana

Mugisha Gatera Arnaud [DJ Marnaud] ubarizwa mu itsinda ryishyize hamwe ry’abavanga imiziki rya Dream Team DJs ni we wavanze imiziki afatanyije na DJ wa Diamond

Yavanze imiziki itandukanye ndetse akananyuzamo agacuranga indirimbo yakoze zamamaye cyane nka “Boku’’.

Dj Marnaud ni we wavanze imiziki mbere yo kwakira Diamond

-  Amafoto ya IGISUPUSUPU ARIRIMBA

Nsengiyumva François wamamaye nka ‘Igisupusupu’ ubwo yageraga ku rubyiniro
Igisupusupu ni we muhanzi rukumbi w'Umunyarwanda witabiriye ibitaramo byose bya Iwacu Muzika Festival
Umwe mu babyinnyi bari kumwe na we
Nsengiyumva yageze ku rubyiniro yitwaje ababyinnyi be bamufashaga gususurutsa abafana
Yageragezaga gufata amashusho y'urwibutso azasigarana ku gitaramo

Nkora umuziki ukomeye cyane-Bruce Melodie

Mbere yo kuririmba indirimbo Bruce Melodie yakoranye na Sunny yitwa "Kungola" yabajije abafana b’umuziki we niba bamwemera.

Yagize ati "Ntimubizi ko dukora umuziki wa danger (ukomeye)? Ntitwabahaye ibintu bikomeye. Mutwereke urukundo rero.’’

Yahise akomeze aririmba iyi ndirimbo yishimiwe cyane ndetse afatanya n’abantu benshi kuyiririmba bajyana ijambo ku rindi mu ayigize.

Bruce Melodie yanaririmbye indirimbo zirimo "Blocka", "Ndumiwe" n’izindi. Yageze ku rubyiniro yambaye ikote ry’umuhondo rifite amatara yaka ku musozo waryo, hashize akanya arikuramo asigarana umupira wera na wo yaje gushyira hasi asigarana usa n’ibara rya orange.

Bruce Melodie ari mu bahanzi bitwaye neza
Melodie yaririmbye indirimbo ze nyinshi zirimo izamenyakanye kuva hambere

Amateka avunaguye ya Bruce Melodie

Itahiwacu Bruce [Bruce Melodie] ni umuririmbyi w’umunyempano, afite ubuhanga bwihariye mu guhanga no kwerekana ko ibyo akora biri mu maraso binyuze mu kuririmba. Muri iyi minsi ari mu bahanzi ba mbere bakunzwe cyane mu ndirimbo z’urukundo mu Rwanda.

Melodie yatangiye kuririmba mu 2012, icyo gihe yafashwaga na Producer Fazzo, yibandaga cyane ku ndirimbo zo mu njyana ituje nyuma agenda avangamo na Afrobeat.

Mu 2017 yabaye umuhanzi wo mu Rwanda wa mbere watumiwe muri Coke Studio Africa. Mu 2018 ni we wegukanye igihembo cya Primus Guma Guma Super Star cyanahise gihagarara.

Bruce Melodie ni mwene Ntibihangana Gervais na Verène Muteteri. Yavutse mu 1992. Ni ubuheta mu muryango w’abana bane barimo abahungu babiri n’abakobwa babiri. Avuka mu Kagari ka Kamashahi, Umurenge wa Nyarugunga, Akarere ka Kicukiro ari naho kugeza ubu abana n’umugore n’umwana babyaranye.

Iyo muganira umubaza ibyerekeye amashuri akubwira ko ‘yize bimugoye atari uko ari umuswa’ ahubwo ari ibibazo by’umuryango n’ubushobozi buke bwamwitambitse, gusa yarahanyanyaje nyuma yo gucikiriza amashuri akora ikizamini cy’abakandida bigenga[ candidat libre] aza kubona impamyabumenyi.

Amashuri abanza yayize ku bigo bibiri harimo Ecole Primaire Busanza na Groupe Scolaire Camp Kanombe. Amashuri yisumbuye yayatangiriye i Kanombe kuri EFOTEC ayarangiriza kuri Lycée Islamique de Rwamagana.

22: 50: Itahiwacu Bruce wamamaye nka Bruce Melodie yinjiye ku rubyiniro aririmba ‘Umuhungu wa muzika’ yahuriyemo na Fireman, avangamo iyitwa ‘Amashuri’ yakoranye na Ama G, ‘Am Back’ yakoranye na Jay C ahita yanzika n’indirimbo ‘Ikinyarwanda’ yakoranye na Riderman.

22: 34: IGISUPUSUPU yahamagawe ibintu bihindura isura

Nsengiyumva François [Igisupusupu] yageze ku rubyiniro yakiranwa ubwuzu. Yahamagawe mu gihe abafana bari babanje guteguzwa ko hagiye kuza umuhanzi Bruce Melodie.

Akigera ku rubyiniro yatangiye ati “Abanyamujyi muraho. Mureke twumvikane gato.’’

Yahise akubita agatwenge akomeza ati “Ubu aka kanya twagiye na ‘ICANGE’.

Uyu musaza umaze gukundwa n’ab’ibyiciro byose yongeye kwerekwa urukundo n’abatari bake. Yari aherekejwe n’itsinda ry’ababyinnyi bamufasha kubyina indirimbo ze zifite umudiho uryoshye.

Nsengiyumva yavuze ko "Abanyamujyi ndabakunda, turakunda.’’ Yanyuzagamo akavuga n’Icyongereza ati "Yes thank you very much’’ bishatse kuvuga ngo "Murakoze cyane.’’

Bwa mbere kuva ashyize ahabona indirimbo ye nshya "Rwagitima" yayiririmbiye mu Mujyi wa Kigali. Iyi ndirimbo itaramara igihe kirekire yishimiwe ndetse abakunzi be bafatanyaga kuririmbana ijambo ku rindi.

Yasoje aririmba "Mariya Jeanne’’ yamamaye nka "Igisupusupu" yishimiwe cyane.

Urugendo rwa NSENGIYUMVA mu muziki

‘Igisupusupu’ ari mu bahanzi bagezweho mu Rwanda muri iki gihe, ni umugabo watunguranye agakundisha benshi batajyaga bumva umuziki ucurangishijwe ‘umuduri’.

Nsengiyumva w’imyaka 41 afite umwihariko wo kuririmba anacurangisha umuduri. Uyu muhanzi uri mu bagezweho amaze gushyira hanze indirimbo eshatu zirimo “Mariya Jeanne” yamenyekanye nk’Igisupusupu “Icange Mukobwa” na Rwagitima iheruka.

Mbere yo kumenyekana Nsengiyumva yacurangiraga mu masoko atandukanye yo mu Karere ka Gatsibo aho akomoka, abantu bakagenda bamuha amafaranga make make, atagize icyo amumariye.

Uyu mugabo wo mu Murenge wa Kiramuruzi kuri ubu gucuranga umuduri byamuvanye mu cyaro aza gushakira amaramuko i Kigali ndetse ni umwe mu bafite igikundiro gikomeye mu muziki Nyarwanda.

Yize gucuranga umuduri mu 1999 ubwo yari afite imyaka 20 mu gihe cy’amezi atanu. Yize amashuri abanza gusa, ndetse ubu afite abana babiri.

Icyihariye atandukaniyeho n’abahanzi bamwe bakomeye mu Rwanda ni uko indirimbo ze zikundwa n’abanyamujyi, zagera mu cyaro ho zigakurirwa na benshi ingofero.

Ubu ‘Umuduri’ wafatwaga nk’igicurangisho gikoreshwa n’abacurangira gusomywa intama ku rwagwa, usigaye wumvwa na benshi kubera uyu mugabo.

Nsengiyumva azi gucuranga umuduri, iningiri, icyembe na gitari aragerageza. Ubu ari mu buzima bushya ndetse avuga ko yamaze kubona ko gukora umuziki no kugira igikundiro bitagombera imyaka ahubwo iyo igihe Imana yageneye umuntu kigeze atangira kubengerana nka zahabu.

Primus iri mu baterankunda b’imena ba Iwacu Muzika Festival

Iserukiramuco rya ‘Iwacu Muzika Festival’, Bralirwa yateye inkunga igikorwa cya Primus Guma Guma Super Star cyamamaye mu Rwanda kigahagarikwa kimaze imyaka umunani; ni nayo muterankunga mukuru waryo.

Abaryitabiriye yabafashije kubona icyo kunywa buri wese ahabwa ikimugera ku nzoka. Abari muri Parking ya Stade Amahoro ntibishwe n’inyota cyangwa icyaka kuko bazirikanwe.

Icyo kunywa cyari gihari kuva mu masaha ya kare

-  Bulldogg yagaye urukundo yeretswe

Mbere yo kuririmba indirimbo ye yitwa “Nk’Umusaza” yavuze ati “Urukundo rwanyu ruri kugerwa ku mashyi.’’

Bulldogg yaserukanye ku rubyiniro n’umuhanzi Dudu umufasha mu bijyanye n’imiririmbire. Yasoje aririmba indirimbo ye yitwa "Cinema."

22:07: Bulldogg yageze ahirengeye ku rubyiniro

Umuraperi Bulldogg yageze ku rubyiniro asukiranya imirongo iri mu ndirimbo ye “Mechament”.

Yahise avuga ati “Amahoro kuri mwe. Ndasuhuza abari muri VIP, na bariya bari iriya [atunga agatoki muri rubanda rugufi] ndabasuhuza.’

Abakunda Hip hop bafatanyaga na Double G kuririmbana indirimbo ze zatumye yandika izina kuva akiri muri Tuff Gangz. Yatangiye aririmba indirimbo ye yitwa “Baranzino”.

Rwarutabura ufana Rayon Sports ntiyahatanzwe
Bulldogg yavuze ko abafana batirekuraga ngo babyine
Bulldogg yagaragaye mu gitaramo cy'i Kigali nyuma yo gutaramira i Huye muri Iwacu Muzika Festival

Ndayishimiye Malik Bertrand umenyerewe nka Bulldogg yavutse tariki ya 16 Nzeri 1988, ni umwe mu baraperi bakundwa na benshi kubera indirimbo zivuga ku buzima bwa rubanda rugufi.

Yabaye muri Tuff Gangz yari ahuriyemo n’abandi baraperi bakomeye mu Rwanda nka Green P, Jay Polly, Fireman na P Fla; ryabanje kuvamo P Fla bikaza kurangira ryose ricitsemo ibice.

Bulldogg yamamaye cyane mu 2008 ubwo yasohoraga indirimbo yise ‘Umunsi w’imperuka’ yakunzwe na benshi. Uyu mugabo yize ibijyanye n’indimi muri kaminuza.

-  Safi yasabye imbabazi

Umuhanzi Safi mbere yo kuririmba indirimbo ye yise “Nisamehe”, yabanje kwisegura ku bafana be. Yagize ati “Umuntu wese nakoshereje musabye imbabazi.’’

Yahise ahamagara umuraperi Karigombe Siti True wize umuziki ku ishuri ryo ku Nyundo amufasha kuririmba aho Riderman yaririmbye kuko we atari ahari.

Uyu muraperi uheruka gushyira ahabona indirimbo yise “Sandra”, yishimiwe cyane kubera uburyo yasukiranyaga amagambo agize iyo ndirimbo.

Safi Madiba yageze ku ndirimbo "Got it" yafatanyije na Ngabo Medard, ahamagara ababyinnyi be babiri bamufasha kubyina.

Yasoje aririmba "Kontwari" indirimbo ye ikunzwe cyane muri iyi minsi. Yayiherekeje n’agace gato k’indi ndirimbo ye yitwa "Mambata.’’

Safi Madiba yari aragagiwe n'abakobwa babiri bamufashieje kubyina

21:42: Safi yinjiye ku rubyiniro aririmba indirimbo ye “Kimwe kimwe”

Umuhanzi Safi wahoze muri Urban Boyz yageze imbere y’abakunzi b’ibihangano bye aririmba indirimbo ye yise “Kimwe kimwe” yishimiwe cyane.

Safi w’imyaka 31 y’amavuko, avuka mu muryango w’abakirisitu biyeguriye isengesho no kubahiriza amahame y’Itorero ry’Abadiventisiti ari naryo uyu muhanzi abarizwamo.

Iyo avuga inkomoko y’ubuhanzi bwe, yumvikanisha ko ari impano yasanze afite akiri ingimbi ubwo yaririmbaga muri korali y’abana ndetse yakajije umurego ubwo yari ageze mu mashuri yisumbuye muri College Adventiste de Gitwe agahabwa kuyobora korali yari ikomeye mu kigo hose anayicurangira mu rusengero.

Uko yiyibuka akiri muto, ngo yari umwana ukunzwe cyane akaba yari azi gucuranga piano cyane ndetse ngo yiyibuka nk’uwakuriye mu rusengero.

Ati “Mama yarasengaga cyane, iwacu barasengaga, nanjye ndibuka ko mfite imyaka itandatu nacurangaga mu rusengero kandi ariho nakuriye.”

Hejuru ya byose, Safi akibyiruka ngo yakundaga kugendana n’abakobwa binamuviramo guhabwa izina rya ’Cyabakobwa’ akavuga ko no kuba akunze kuba agaragiwe na bo muri iki gihe ngo bikomoka mu buzima yaciyemo akiri muto.

Safi akiri mu mashuri abanza yari intangarugero mu banyeshuri bitondaga, ageze mu yisumbuye benshi bamukunda by’ikirenga kuko yari umuhanga mu bijyanye n’Itorero ry’Abadiventisiti ari nacyo cyamuhesheje kuyobora korali y’ikigo.

Amashuri abanza yayize iwabo mu cyaro i Gitwe, ayisumbuye ayakomereza mu kigo cya Collège Adventiste de Gitwe ari naho yarangirije mu Ishami ry’Imibare n’Ubugenge.

Safi afite Impamyabumenyi ya Kaminuza mu Ishami ry’Icungamutungo yakuye muri Kaminuza yigenga ya Kigali (ULK) mu 2015.

Yiga mu mashuri yisumbuye i Gitwe yabaye umuyobozi wa korali yitwa ‘Bride’, arangije amashuri yisumbuye abari aribwo ajya muri studio bwa mbere, yatangiye wenyine nyuma aza guhura na Humble Jizzo na Nizzo bashinga Urban Boyz, yaje gushwanyukamo ibice mu mwaka ushize nyuma y’imyaka 10 ishinzwe.

21:20: Bushali yakuriwe ingofero

Umuraperi Bushali ukunzwe n’abiganjemo urubyiruko yageze ku rubyiniro yakirwa n’amashyi menshi n’ibyishimo by’ikirenga.

Uyu muhanzi yinjiye aririmba indirimbo ye yitwa “Zunguzayi’ iri kuri album nshya yitwa “Ku Gasima”.

Bushali yahagurukije abakunzi b’umuziki benshi, batangira kubyina bamwe bashimangira ko uyu musore ari mu bakwiye kwitegwa mu muziki w’u Rwanda.

Bushali yeretswe urukundo rw'ikirenga n'abitabiriye igitaramo
Bushali akunzwe cyane mu ndirimbo "Ni tuebue"
Uyu muraperi ari ku isonga mu batanga icyizere cy'ahazaza ha hip hop
Bushali yeretswe urukundo rw'ikirenga n'abitabiriye igitaramo

Bushali The Trigger ari mu kwezi kwa buki!

Mu minsi mike, Bushali uririmba injyana ya Kinyatrap ikunzwe cyane yagaragarijwe urukundo mu buryo bw’ikirenga. Ibitaramo bike yitabiriye yagaragarijwe ko afitiwe icyizere n’ibihangano bye hari abo bifasha.

Bushali yageze ku ndirimbo ye ikunzwe cyane yitwa "Ni tuebue" buri wese n’iyonka afatanya na we kuyiririmba. Bagenzi be baririmbana na bo bahise bagana ku rubyiniro ngo bamufashe kuyiririmba.

Yasoje aririmba indirimbo yitwa "Ku Gasima", yatumye aherekezwa ahabwa amashyi menshi cyane.

Bushali, umunyempano ubadukanye ingoga

Umuraperi Hagenimana Jean Paul witwa Bushali The Trigger, ni umwe baraperi bari kwitwara neza muri iki gihe, yatangiye umuziki mu mpera za 2013. Aherutse gushyira hanze album ye ya kabiri yise ‘Ku gasima’ yaje nyuma y’iya mbere yagiye hanze muri Gashyantare mu 2018 yise ‘Nyiramubande’.

Uyu musore ni umuhanga mu gushushanya ndetse mu mabyiruka ye yatangazaga benshi, uretse ibyo yanabaye umuririmbyi mu korali muri ADEPR ariko aza kubivamo akomereza umuziki muri Hip Hop.

Izina rya Bushali The Trigger riherutse kuzamurwa cyane n’indirimbo yise ‘Nituebue’ yahuriyemo na B-Threy n’uwitwa Slum Drip.

Iyi album y’uyu musore iriho indirimbo 12 zirimo iyitwa ‘Kinyatrap’, ‘Sindi Mubi’, ‘Zunguzayi’, ‘Ipafu’, ‘Kinyarock’, ‘Mamayiwe’, ‘Kugasima’, ‘Inganjyi’, ‘Ayura’, ‘Bitinze’, ‘Impanda’ na ‘Niyibizi’.

Indirimbo ziriho zakozwe n’aba-producers batandukanye barimo Danny Beats, Dr. Nganji, Victoria, Bushali na Maxime.

21:06: Intore Masamba yaserutse mu mbyino gakondo

Umuhanzi uri mu bakunzwe mu muziki gakondo yageze imbere y’imbaga atangira kuririmba mu buryo buryoheye amatwi. Yatangiriye ku ndirimbo ze zamenyekanye kuva hambere zirimo "Kanjogera", "Mama Shenge" na "Nyaruguru".

Uyu muhanzi yeretswe urukundo mu bihangano bye ndetse umuziki we yafatanyaga kubyina n’ababyinnyi b’abahanga bari bamugaragiye.

Masamba yavuze ko “Turi mu bihe byo kwibohora kandi iyo tubikora dushyiramo akantu k’ishyamba gato.’’

Yahise akomeza n’indirimbo ye yitwa “Haturudi nyuma’’ yaririmbiye ingabo zatsinze urugamba rwo kubohora igihugu.

Yahise atangira abaza mu ndirimbo ati “U Rwanda ruzubakwa nande rubyiruko ?’’

Bose nk’abitsamuye bamusubiriza hamwe ko u Rwanda ruzubakwa natwe. Iyi ndirimbo izwi nka “Rwanda itajengwa na nani?” yishimiwe cyane, irabyinwa karahava.

Yayisoje akoresheje amagambo yo mu ikorasi yamamaye mu nsengero ivuga ko “Imana dusenga irakomeye, ni Imana yumva amasengesho.’’

Intore Masamba yishimiwe cyane mu njyana gakondo
Abakunzi b'umuziki gakondo bari bizihiwe pee!
Ntibahishiriye ibyiyumviro byabo ahubwo bafatanyije na Masamba kubyina bya Kinyarwanda
Yateze amaboko afatanya n'abandi gushayaya. Ni igitaramo cyarimo kwirekura ku bahanzi bamwe na bamwe
Igitaramo gisoza Iwacu Muzika Festival cyitabiriwe n'abafana babarirwa mu bihumbi
Abakunzi b'umuziki bari benshi muri Parking ya Stade Amahoro

Incamake ku buzima bwa Masamba Intore

Butera Alphonse wamamaye nka Masamba Intore yavukiye i Bujumbura mu Burundi, ku wa 15 Kanama 1969, avuka kuri Sentore, ubwe wari intore na Mukarugagi, akaba ari ubuheta mu bana icyenda.

Masamba ni umuhanzi wabigize umwuga, umucuranzi, ahimba kandi agatoza imbyino , ni umuproducer, anandika indirimbo. Ni n’inzobere yigwijeho impano zitandukanye, akaba anabarirwa mu byamamare mu njyana Nyarwanda dore ko anayimazemo imyaka isaga 25.

Yamamaye cyane ku bw’indirimbo Nyarwanda zirata ubwiza bw’umuco zirimo “Arihe” na “Nzajya inama nande?” avugamo imihango n’imigenzo gakondo by’umuco Nyarwanda.

Ku myaka itandatu gusa, Masamba yigaragaje bwa mbere mu ruhame, mu itorero “Intore indashyikirwa” .

Atarageza imyaka 20, yanditse anaririmba indirimbo ye ya mbere “Ndi Uwawe”, amurikiwe na se Sentore. Nyuma yaje kujya muri korali Gatolika ngo arusheho kunoza ijwi rye.

Masamba yize amashuri abanza imyaka itandatu n’aho ayisumbuye ayiga irindwi, nk’uko gahunda y’uburezi y’i Burundi ibiteganya. Yakomereje muri Kaminuza Nkuru y’u Burundi, aho yakuye Impamyabumenyi y’Icyiciro cy’imyaka ibiri. Yigaga ibijyanye n’Imitekerereze ya Muntu (Psychologie), Siyansi n’Uburezi. Ntiyakomeje ngo aminuze kuko yahise yifatanya n’abandi Banyarwanda b’impunzi mu rugamba rwo kubohora igihugu.

Nyuma ya Jenoside yakorewe Abatutsi no kwibohora, Masamba yatumiwe n’itorero ryo mu Bubiligi, agirana amasezerano na “Jeunesses Musicales” ngo atoze itorero ry’urubyiruko rw’Abanyarwanda baba mu Bubiligi “Amarebe n’Imena.”

Masamba yanakinnye muri filime ya Romeo Dallaire “Shake Hands With The Devil” akina nka nyakwigendera minisitiri Lando.

Uyu muhanzi yagiye yigaragaza mu maserukiramuco akabakaba 120 arimo "Festival de Mataaf" muri Israel, "Festival Fort de France" muri Martinique, "Jazz Festival" muri Dubrin, "Festival de Majorque" muri Espagne, "FESPAD" yo mu Rwanda, "FESPAM" yo muri Congo-Brazzaville, "Music Festival" i Londres n’izindi.

Yakomeje kwerekana ibihangano bye henshi muri Afurika, i Burayi no muri Amerika y’Amajyaruguru, ariko anaririmbana n’abahanzi Nyafurika b’ibyamamare nka Youssou N’Dour, Ismael Lo, Helmut Lotti, Casimir Zao Zoba na Lokua Kanza. Yaririmbanye kandi na Corneille Nyungura i Montréal muri Canada.

Ni umwe mu bahanzi bo mu gisekuru utajya azima ahubwo ahorana igikundiro n’igitinyiro mu ruganda rwa muzika.

-  Anitha Pendo na MC Tino bageze ku rubyiniro

Mbere yo gutangira kwakira abahanzi b’ibikomerezwa, abashyushyarugamba bakomeye mu Rwanda, Anitha Pendo na MC Tino batangiye gushyushya abakunzi b’umuziki bari bamaze akanya bayobowe na MC Buryohe [uyu ni we wayoboye ibitaramo byose byabereye mu ntara].

Anitha Pendo yabaye umushyushyarugamba
MC Tino na we yari mu bayobozi igitaramo

Banki ya Kigali yaherekeje IWACU MUZIKA FESTIVAL ibinyujije mu IKOFI

Abakozi batandukanye ba Banki ya Kigali bari mu bitaramo aho basobanuriye abitabiriye Iwacu Muzika Festival imikorere ya serivisi ya IKOFI yagenewe abahinzi.

Binyuze mu IKOFI abanyamahirwe batombora miliyoni 1 Frw ibafasha kwiteza imbere mu mwuga wabo w’ubuhinzi.

Ibyo wamenya kuri serivisi za IKOFI

IKOFI ikoreshwa kuri telefoni aho umuhinzi yiyandikisha akoresheje *334*2# na nimero y’indangamuntu; yegera umucuruzi w’inyongeramusaruro ugomba kubyemeza, akamuha umubare w’ibanga akoresha.

Udafite telefoni abifashwamo n’umucuruzi w’inyongeramusaruro akandikwa, agahabwa agafunguzo (Near Field Communications, NFC) gafite ikoranabuhanga ribikwamo amakuru ye, akakifashisha mu kubitsa no kubikuza kuri telefoni.

Impamvu y’umucuruzi w’inyongeramusaruro ni uko ari serivisi igenewe abahinzi gusa, nk’urwego rurimo amahirwe menshi ariko rudashorwamo imari uko bikwiye. Uyu mucuruzi akora nk’aba ‘agent’ batanga serivisi za mobile money, kuko IKOFI ikora nka zo.

Muri iyi serivisi umuhinzi ashobora kubitsa, kubikuza, kohereza amafaranga ku buntu mu Rwanda, kwishyura imbuto n’inyongeramusaruro. Indi serivisi IKOFI itanga ni iyo kugura umusaruro no kwishyura ubwiteganyirize bwa ‘Ejo Heza’.

-  Ubutumwa bwa Banki ya Kigali

Banki ya Kigali yifatanyije n’Abanyarwanda kwizihiza isabukuru y’imyaka 25 yo kwibohora no kwishimira ibyagezweho muri iyo myaka.

Muri ibi bitaramo bizenguruka igihugu, Banki ya Kigali yamuritse gahunda yayo ya IKOFI ku bahinzi kandi mu gihe cya vuba tuzayitangiza ku bantu bose.

Banki ya Kigali igamije gushimira abakiliya bayo, abakiri bato, abakunda umuco, Abanyarwanda bose turabakunda, tubitaho kandi twifuza kubagumana nk’abakiliya bacu.

Mumaze igihe mwumva gahunda ya IKOFI yo gufasha abakoresha banki n’abatayikoresha by’umwihariko abahinzi. Benshi bakomeje kwibaza impamvu ari abahinzi gusa ariko ibyiza biri imbere.

Icya gatatu turabamenyesha ko duhora twishimiye kubabona mwishimye, mureke twishimane.

Banki ya Kigali igiye kwagura imikorere ya serivisi y'Ikofi yahariwe abahinzi

-  Aba-Rayon ni abatsinzi

Queen Cha yageze ku ndirimbo yaririmbiye Rayon Sports, yise “We are the winners” abaza ati “abafana ba Rayon Sports muri he?’’

Abantu benshi bahise bavuza induru mu gushimangira ko bihebeye ikipe ya Gikundiro.

Queen Cha yahise akomeza kuririmba indirimbo ziganjemo izo yamenyekanyemo hambere.

Yasoje aririmba anafatanya n’abakobwa babiri bari bamuherekeje babyina batigisa umubiri.

20:40: Queen Cha yageze ku rubyiniro

Umuhanzikazi Queen Cha yageze imbere y’abakunzi b’umuziki mu Mujyi wa Kigali atangira kubaririmbira. Yahereye ku ndirimbo ye yise “Promise’’.

Iyi ndirimbo yayikurikiye iye nshya yise "Twongere" yakoranye na Bruce Melodie.

Queen Cha yageze ku rubyiniro yishimirwa n’abafana benshi
Imiterere y'inkweto Queen cha yari yambaye

20:15: Amalon uri mu bahanzi bagezweho yageze ku rubyiniro. Agihamagarwa yakirijwe amashyi n’abiganjemo abakunda indirimbo z’urukundo.

Yahereye ku ndirimbo ye yise "Impanga", ayikurikiza "Derila". Yafatanyaga na bake mu bakunzi b’ibihangano bye kuririmba.

Amalon ubusanzwe yitwa Bizimana Amani; ari mu bahagaze neza muri muzika y’u Rwanda, amaze kwamamara mu bihangano bitandukanye birimo ‘Yambi’, ‘Derila’ yafatanyije na Ally Soudy, ‘Madelina’, ‘Shaddy Boo’, ‘Byakubaho’, ‘Impanga’ n’izindi.

Yavukiye i Rubavu mu Ntara y’Iburengerazuba gusa ubu abarizwa mu Mujyi wa Kigali. Yasoreje amashuri yisumbuye muri Kagarama High School mu 2013.

Amalon yishimiwe n'abiganjemo ab'igitsinagore
Amalon amaze kumenyekana mu muziki w'u Rwanda nubwo awumazemo igihe gito

19:50: Marina yageze ku rubyiniro ari kumwe n’abakobwa bamufasha kubyina. Yahereye ku ndirimbo ye yise ‘Like That’, ‘Ni wowe’, ‘Mbwira’ ye na Kidumu n’izindi.

Yageze ku ndirimbo ye yise "Marina" we n’abakobwa bamuherekeje bafatanya gukaraga ikibuno, abafana benshi bavuza induru.

Marina yaririmbye muri iki gitaramo nyuma yuko yari mu bahanzi bataramiye muu cyabereye mu Karere ka Ngoma ku wa 20 Nyakanga 2019, ari nacyo cyasoje ibizenguruka mu ntara.

Marina yahagamaye umusore ku rubyiniro, bafatanya kubyina mu buryo bwatangariwe na benshi
Marina imbere y'abafana be i Kigali

-  Amateka avunaguye ya Marina

Uwase Ingabire Marina ni umukobwa w’ijwi rihebuje rihogoza benshi kandi uzi kubijyanisha no gushimisha abafana iyo ari ku rubyiniro ku buryo n’iyo byasaba ko ashinga umutwe yabikora.

Uyu muhanzikazi ubu ari mu maboko y’inzu ifasha abahanzi yitwa The Mane Music Label ihagarariwe na Bad Rama. Marina yatangiye aririmba muri ADEPR ndetse yari umuririmbyi akaba umunyamasengesho ukomeye.

Ubusanzwe Marina avuka mu Karere ka Rwamagana mu Ntara y’Iburasirazuba, afite imyaka 22. Ni imfura mu bana babiri.

Ni umukobwa ukataje muri muzika ndetse muri Gashyantare yizihije isabukuru y’imyaka ibiri atangiye gukora umuziki mu by’umwuga.

Umuziki we wiganjemo indirimbo z’urukundo zinyura benshi zikururutsa imitima y’abari kurwiyumvamo kubera imitoma aba yungikanya.

Izina Marina ubu rimaze gutumbagira ku rwego ruhambaye ndetse risigaye rifite umuriri mu itangazamakuru mu Rwanda kubera ibikorwa bye umunsi ku wundi bye.

Ubu amaze gushyira hanze indirimbo icyenda zirimo ‘Byarara bibaye’, ‘Bikakubera’, ‘Decision’ yahuriyemo na Papito, ‘Karibu’, ‘Log out’, ‘Tubisubiremo’, ‘Impano’, ‘It’s Love’ yakoranye na Uncle Austin na ‘Love You’ yahuriyemo na Harmonize.

Marina yize Icungamutungo mu mashuri yisumbuye aho yasoreje muri ESSA Nyarugunga iherereye i Kanombe mu Mujyi wa Kigali.

Uyu mukobwa avuga ko yakundaga umuziki kuva kera ariko akiyumvamo gufasha abahanzi mu miririmbire (Backing vocalist) ndetse ngo hari igihe yigeze kwandika ashaka kubikora muri Primus Guma Guma Super Star ntibyamukundira.

19:30: Sintex yinjiye ku rubyiniro aririmba ‘You and I’, ‘Twifunze’, ‘Byina’, ‘Akuka’ na ‘Super Star’.

Uyu muhanzi yishimiwe cyane muri ‘Twifunze ikunzwe na benshi biganjemo urubyiruko rwo muri iki gihe. Yahise asanganirwa n’inkumi yamubyinishaga mu buryo budasanzwe.

Yageze ku ndirimbo ye yitwa "Akuka" ahamagara itsinda ry’ababyinnyi bamufashije kubyina mu buryo bwashimishije benshi.

Bari bitwaje amabendera y’umuhondo n’umweru agaragaza amazina ya "Arthur Nation", inzu ifasha abahanzi y’umunyarwenya Arthur Nkusi, bavukana mu nda.

Yasoje ahabwa amashyi menshi yo kugaragaza ibyishimo yagiriwe.

Sintex yongeye kwerekwa urukundo nk'umwe mu bahanzi bazamutse neza
Sintex ni mukuru wa Arthur Nkusi wamamaye mu guterwa urwenya
Sintex yaririmbye indirimbo nyinshi zirimo ‘You and I’, ‘Twifunze’, ‘Byina’, ‘Akuka’ na ‘Super Star’
Yahamagaye umukobwa aramubyinisha cyane
Sintex akunzwe cyane kubera indirimbo ye yise "Twifunze''

IBYO WAMENYA KURI SINTEX

Sintex ni umuhanzi ufite imbaraga kandi uri gucurangwa ubudasiba ku maradiyo yo mu Rwanda muri iki gihe, afite ubuhanga n’umuziki uryohera benshi mu bakunda injyana ya Dancehall. Ubu aharawe mu ndirimbo yise ‘Twifunze’.

Uyu muhanzi ubusanzwe witwa Kabera Arnold ni umubyinnyi akaba n’umuririmbyi mu njyana ya Dancehall ari kugaragaza imbaraga zikomeye mu bahanzi bagitangira kwigaragaza by’umwuga mu gihugu.

Ni mukuru wa Nkusi Arthur, umwe mu banyarwenya bakomeye mu Rwanda. Aba bombi bavuka kuri Mazimpaka Kennedy umwe mu basaza bahishemo impano zihariye mu ngeri zinyuranye z’ubuhanzi.

Impano zo kwa Mazimpaka zigaragaje cyane biciye mu Itorero Mashirika ahuriyemo n’abana be gusa byabaye akarusho ahagana mu 2001 ubwo yasemuraga film azivana mu ndimi z’amahanga akazishyira mu Kinyarwanda. Icyo gihe mu rubyiruko rwarebaga film zisobanuye yari azwi nka Master J.K.

Sintex yatangiye umuziki mu 2013, yahereye ku ndirimbo yitwa ‘Akabazo’ akurikizaho izirimo ‘Nta by’ubuntu’ n’izindi zitamenyekanye cyane.

Izina rye ryatinze kumenyekana biturutse ku mpamvu zirimo ubushobozi buke no kuba yarabaye igihe kinini muri Uganda bikamugora kumenyana n’abazamura impano mu Rwanda ari nacyo cyamudindije abo mu muryango we bakamusiga inyuma.

Mu mashuri abanza yise kuri La Colombière nyuma ajya kwiga muri Uganda.

Sintex abarizwa mu ikompanyi iteza imbere impano mu Rwanda ya Arthur Nation ari nayo murumuna we Nkusi Arthur abarizwamo.

Yigeze kubwira IGIHE ko mpano kuri we ari ibintu karemano kuko akomoka ku babyeyi b’abahanzi[se akina filime naho nyina akaba umuririmbyi utarabigize umwuga], yabanje kuba umubyinnyi ariko bigeze mu mwaka wa 2012 abivamo yiyegurira umuziki ari nawo mwuga ashaka gushyiramo imbaraga zose.

-  Abakoresha imbuga nkoranyambaga na bo bavuze ku gitaramo gisoza Iwacu Muzika Festival

Iyo umamye akajisho ku mbuga nkoranyambaga usanga abazikoresha bagaragaaje ko Abanya-Kigali biteguye gutaramana n’abahanzi b’ibyamamare mu Rwanda ndetse n’umutumirwa Diamond Platnumz.

19:13: Abacuranzi bize umuziki ku Nyundo babarizwa muri Symphony Band ni bo bafasha abahanzi b’Abanyarwanda mu bijyanye no kuririmba no gucuranga.

Bageze ku rubyiniro batangira gutegura ibikoresho mbere yo gutangira kuririmba. Iri tsinda ni ryo ryajyanye n’aho igitaramo cyanyuze mu gihugu hose aho iserukiramuco ryanyuze.

Kenny Sol wahoze abarizwa mu itsinda rya Yemba Voice ‘Njye nawe’ yaririmbye indirimbo imwe ubundi ahita ava ku rubyiniro ashimira abitabiriye iki gitaramo.

18:53: Itorero ry’Igihugu Urukerereza niryo ryabimburiye abandi ku rubyiniro

Itorero ry’Igihugu Urukerereza ni ryo ryabaye irya mbere gukandagira imbere y’ibihumbi by’abafana biteraniye muri Parking ya Stade Amahoro.

Ryabanjirijwe n’abakaraza bavuza ingoma mu buryo butuma zitanga amajwi y’urwungikane aryoheye amatwi.

Nyuma y’iminota irindwi havuzwa ingoma, abasore babyina mu Itorero Urukerereza baserutse batangira guhamiriza mbere yuko bashiki babo babasanganira bagatangira kubyina mu buryo buryoheye ijisho, batega amaboko nk’inyambo.

Urukerereza rwishimiwe n’abakunda umuziki gakondo, ushimangira umuco Nyarwanda.

Itorero ry’Igihugu Urukerereza riri mu matorero ya Kinyarwanda amaze imyaka myinshi kuko ryashinzwe mu 1974. Mu 2000 nibwo ryatangiye gutumirwa mu maserukiramuco akomeye ku Isi rihera ku ryitwa the Seattle International Children’s Festival ryabereye muri Amerika y’Amajyaruguru.

Itorero Urukerereza ryaserutse mu mbyino gakondo zishimiwe na benshi
Itorero Urukerereza ryeretswe urukundo n'abatari bake
Imbyino z'abagize Itorero Urukerereza zari ziryoheye kuzireba
Uyu mukobwa yateze amaboko nk'inyambo arishimirwa cyane
Abagize Itorero Urukerereza batangiye bavuza ingoma mu buryo buhuje ugutwi.

Michael Jackson yazukiye mu Rwanda!

Lucky Fire usanzwe ari umunyadushya ufite imbyino zihariye ari mu bari gushimisha abitabiriye iki gitaramo bari mu gace kamwe na we bitewe n’uburyo abyinamo bwihariye busa nk’ubw’umuhanzi Michael Jackson bwamamaye nka Break dance.

Uyu mugabo iyo muganira ntahisha kuvuga ko ari Umwami wa Pop’, ndetse ko ubu nta ntego asigaranye kuko izo yihaye mu buzima bwe yazigezeho.

Lucky Fire w’imyaka 32 atuye mu Karere ka Gasabo mu Murenge wa Jabana, akenshi ntatangwa ahari ikirori ndetse n’iyo yaba atari mu bahanzi bagomba kuririmbira abitabiriye ntashobora gutaha atibye umugono abantu akabakorera udukoryo.

Lucky Fire yahuruje benshi kubera imbyino ze zidasanzwe
Luck Fire yiyita Michael Jackson w'u Rwanda
Ab'uruhu rwera na bo bitabiriye iki gitaramo
Abakobwa b'uburanga bari bambariye kwakira abitabiriye igitaramo
Luck Fire aganira na bamwe mu bitabiriye igitaramo gikomeye cyabereye mu Mujyi wa Kigali
Inkumi z'i Kigali zari zambariye ikirori
Nta cyaka ku bitabiriye igitaramo kuko Primus yari ihari

18:20: Mc Buryohe yinjiye ku rubyiniro ashimira abantu babashije kugera mu gitaramo bazindutse abizeza ko bagiye kuryogerwa.

Yahamagaye itsinda ryiga umuziki ku Nyundo ngo risusurutse abantu mu ndirimbo imwe. Ririmba ‘Happy’ ya Pharrel Williams. Mu majwi yuje uburyohe ryasoje rihabwa amashyi y’urufaya.

Abanyeshuri bo ku Nyundo ni bo babimburiye abandi bahanzi bakuru yiniro

17:57: Itsinda ry’abaririmbyi biga umuziki ku Nyundo niryo riri gususurutsa abitabiriye igitaramo. Mu gihe hategerejwe isaha yo gutangira igitaramo, Band ihuriyemo abanyeshuri biga umuziki ku Ishuri ryo ku Nyundo riri mu Karere ka Muhanga, niyo iri gususurutsa abari muri Parking ya Stade Amahoro.

Abarigize bari kugaragaza ubuhanga bwihariye mu muziki wabo urimo ubyinitse bya Kinyarwanda, uvanzemo n’uwo mu mahanga.

Band y'abanyeshuri biga umuziki ku Nyundo bagaragaje impano bafite
Band y'abanyeshuri biga umuziki mu Ishuri ryo ku Nyundo riherereye mu Karere ka Muhanga niryo ryatangiye risusurutsa abitabiriye igitaramo
Aba basore n'inkumi bagaragaje ubuhanga mu bijyanye no gucuranga no kuririmba

-  Itsinda ry’abanyeshuri biga ku Nyundo niryo riri gususurutsa abafana bamaze kugera aho igitaramo kibera. Abaririmbyi barigize bari kuririmba indirimbo zitandukanye zirimo n’izo baririmbye ku giti cyabo.

16:02: Amarembo ya Parking ya Stade Amahoro yuguruwe, abakunzi b’umuziki batangira kwinjira buhoro buhoro.

Mu mihanda ya Kigali, abantu bari urujya n’uruza cyane cyane mu y’i Remera berekeza mu gitaramo cya Iwacu Muzika Festival cyabaye ku mugoroba wo ku wa 17 Kanama 2019.

Ibyicaro byateguwe hakiri kare. Aha ni mu myanya y'abanyacyubahiro aho kuhicara umuntu yishyuraga 20 000 Frw
Imbere yo mu Migina ahazwi nko ku Ikaro hari abantu benshi mbere y'amasaha make igitaramo ngo gitangire
Imihanda yerekeza i Remera yarimo urujya n'uruza rw'abantu kuva mu masaha ya kare

TWIBUKIRANYE AHO IBITARAMO BYA IWACU MUZIKA BYANYUZE MU NTARA

Iserukiramuco rya Iwacu Muzika Festival ryaganuriwe mu gitaramo cyabereye mu Karere ka Musanze ku wa 22 Kamena 2019 kuri Stade Ubworoherane. Abaho basusurukijwe n’abarimo Orchestre Impala, Bruce Melodie, Jay Polly, Jules Sentore, Allioni na Yverry.

Mu ijambo rye aritangiza Minisitiri wa Siporo n’Umuco, Nyirasafari Espérance, yavuze ko “Twaje gutangiza iserukiramuco rya ‘Iwacu Muzika Festiva’. Turashimira East African Promoters yariteguye n’abafatanyabikorwa bayo. Abanya-Musanze mwakoze kuba mwatwakiriye neza.”

Iri serukiramuco ryahujwe n’isabukuru yo kwibohora k’u Rwanda. Yakomeje avuga ko “Ni ibyo kwishimira kuba dufite igihugu cyiza kirimo amahoro n’umutekano tukaba dushimira Perezida Paul Kagame n’ingabo zatubohoye.”

Ku wa 29 Kamena 2019 hari hatahiwe i Rubavu mu Burengerazuba aho abahanzi nka Makanyaga, Christopher, Social Mula, Riderman, Queen Cha na Amalon bataramiye abakunzi b’umuziki kuri Stade ya Nengo.

Ku wa 13 Nyakanga 2019 abo mu Karere ka Huye mu Majyepfo bahuriye ku Kibuga cya Kaminuza y’u Rwanda, bataramana n’abahanzi barimo Orchestre Impala, Karasira Clarisse, Urban Boyz, Bulldogg, Active, Rafiki na Victor Rukotana.

Igitaramo cya nyuma mu byo mu ntara cyabereye mu Karere ka Ngoma aho abahanzi batandukanye bataramiye ibihumbi by’abafana bahuriye ku Kibuga cya Diyoseze ya Kibungo ku wa 20 Nyakanga 2019. Abacyitabiriye basusurukijwe n’abahanzi batandukanye bakunzwe mu muziki w’u Rwanda. Barimo Intore Masamba, Safi Madiba, Senderi Hit, Ama G The Black, Uncle Austin, Nsengiyumva François [Igisupusupu] na Marina.

Amafoto: Muhizi Serge

Video: Kayiranga Victor, Kyembwa Landry, Hakizimana Lydivine na Muhumuza Simeon


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza