00:00:00 IGIHE NETWORK KN KINYARWANDA EN ENGLISH FR FRANCAIS

Davis D yamuritse agakingirizo ke

Yanditswe na Nsengiyumva Emmy
Kuya 6 Mutarama 2023 saa 12:57
Yasuwe :

Davis D uri mu bahanzi bagezweho mu muziki w’u Rwanda, yinjiye mu bucuruzi bw’udukingirizo yise ‘D Protection’ tuzaba turiho n’ifoto ye, utu tukaba dusigaje iminsi mike ngo tugere ku isoko ry’u Rwanda.

Mu kiganiro yagiranye na IGIHE uyu muhanzi yahamije ko mu minsi mike aba ashyize ku isoko udukingirizo twe yatangiye no kwamamaza.

Ni udukingirizo twitwa ‘D Protection’ tuzaba turiho amafoto y’uyu muhanzi nk’uko bigaragara ku mafoto yatangiye gusangiza abamukurikira ku mbuga nkoranyambaga abwamamaza.

Davis D avuga ko iki ari igitekerezo amaze umwaka urenga akoraho afatanyije n’abafatanyabikorwa bari gukorana.

Ati “Ni igitekerezo nagize umwaka ushize nkiganiriza abafatanyabikorwa turi gukorana, kuri ubu utwa mbere turi gukorwa mu minsi mike turaba twageze ku isoko.”

Davis D avuga ko umufatanyabikorwa bari gukorana asanzwe akora ubucuruzi bw’udukingirizo, icyabaye kikaba ari uguhindura uburyo twamamazwamo akoresha ifoto ye ndetse bakora n’izina ryatwo.

Abajijwe ku itandukaniro ry’udukingirizo twe n’udusanzwe ku isoko, yavuze ko byanze bikunze atakwiyitirira ibintu bibi, ati “Udukingirizo twanjye icya mbere tugomba kuba ari twiza mu buryo bwose, nibaza ko tuzaba turi mu twiza turi mu Rwanda. Sinshobora kwiyitirira ikintu kizansebya.”

Uretse kwanga ko tubaye atari twiza twamusebya, Davis D avuga ko yitondeye ikorwa ryatwo kuko na mbere y’ubucuruzi icyo yifuza ari ukurinda urubyiruko bityo akaba ariyo mpamvu atashyira ku isoko udukingirizo atizeye.

Uyu muhanzi avuga ko igitekerezo cyo kwinjira mu bucuruzi bw’udukingirizo yagikomoye ku bihangano bye, bitewe n’uburyo abantu badahwema kuvuga ko biba bikangurira urubyiruko kwishora mu busambanyi.

Ati “Abantu benshi bakunze kuvuga ko ibihangano byanjye bishora abantu mu busambanyi, byatumye ntekereza icyo nakora mu rwego rwo kurinda urwo rubyiruko mpitamo gutangiza ubucuruzi bw’udukingirizo.”

Uyu musore avuga ko afite icyizere cy’uko ikorwa ry’udukingirizo twe bizafasha abatari bake guhindura imyumvire ku ikoreshwa ryatwo bityo bakabasha kwirinda ingaruka bashoboraga guhurira na zo mu gukora imibonano mpuzabitsina idakingiye.

Davis D yavuze mu gihe kitarenze ukwezi kumwe udukingirizo twe twa mbere tuba twamaze kugera ku isoko.

Davis D ahamya ko udukingirizo twe tuzaba twujuje ubuziranenge ndetse ari twiza ku badukoresha kuko atakwisanisha n'ibintu bitameze neza
Davis D yamuritse agakingirizo ke yise 'D Protection'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .