Danny Vumbi n’umufasha we bakoze impanuka y’imodoka

Yanditswe na Nsengiyumva Emmy
Kuya 15 Ukuboza 2020 saa 08:24
Yasuwe :
0 0

Mu mpera z’icyumweru gishize Imana yakinze akaboko irinda Danny Vumbi n’umugore we Muhawenimana Jeannette mu mpanuka y’imodoka bakoreye mu Karere ka Musanze.

Iyi mpanuka yabaye mu ijoro ryo ku wa Gatanu tariki 11 Ukuboza 2020 yatewe n’uko imodoka yabuze feri bityo Uhujimfura Claude wari uyitwaye ahitamo kuyihirika mu muferege.

Mu kiganiro na IGIHE, Uhujimfura Claude wari utwaye uyu muryango, yagize ati ”Twari tuvuye kureba Uncle Austin aho yari ari mu Karere ka Musanze natwe dusubiye kuri Hotel yacu, twageze ahantu rero imodoka ibura feri mbura uko mbigenza ncungana n’ahari umuferege nyahuramo.”

Nubwo imodoka yari yabuze feri akayihirika mu muferege, uyu musore usanzwe ari Umujyanama wa Danny Vumbi yavuze ko Imana yakinze akaboko ntihagira umuntu n’umwe ukomereka.

Ati ”Byari bikomeye gusa Imana yarahabaye, nta muntu n’umwe wagize icyo aba ndetse nta n’ibikomere binini twigeze tugira."

Danny Vumbi n’umufasha we bamaze imyaka igera kuri 20 bakundana, bamaze 16 bakoze ubukwe.

Uyu mugabo ni umwe mu bahanzi bakomeye mu Rwanda, by’umwihariko ari mu bafite urugo rukomeye uhereye ku bigaragarira amaso. Danny Vumbi na Muhawenimana bafitanye abana babiri b’abahungu aribo Henry Jayz Ineza na David Ihirwe.

Danny Vumbi yahoze ari umwe mu bagize itsinda The Brothers, aza kurivamo mu 2011 atangira gukora umuziki ku giti cye ndetse ari mu bahanzi bafite ubuhanga bwihariye kandi bakora ibihangano birimo ubutumwa bufasha benshi.

Uretse kuba umuhanzi, ni n’umwanditsi ukomeye w’indirimbo kuko benshi mu bahanzi bakomeye mu Rwanda bamwitabaza kugira ngo bakore indirimbo zifite icyanga.

Nyuma yo kubura feri imodoka yari irimo Danny Vumbi n'umugore we yashyizwe mu muferege
Abari bari mu modoka bose nta n'umwe wagize icyo aba
Imana yakinze akaboko Danny Vumbi n'umufasha we ntibagira icyo baba

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .