Danny Nanone yasubitse ibyo kwiga umuziki atangira amasomo muri ICK

Yanditswe na Nsengiyumva Emmy
Kuya 7 Ugushyingo 2019 saa 08:03
Yasuwe :
0 0

Mu 2018 nibwo Danny Nanone yagiye kwiga umuziki mu ishuri rya muzika rya Nyundo, ariko nyuma yo kurangiza umwaka we wa mbere uyu muraperi ntiyigeze asubirayo, ahuwo yahisemo guhita ajya kwiga muri ICK aho arangije umwaka wa mbere mu bijyanye na Public Relations.

Amakuru ava mu biganye n’uyu muraperi ahamya ko Danny Nanone yategerejwe ku ishuri bikarangira atize umwaka wa kabiri.

Umuyobozi w’iri shuri, Muligande Jacques yabwiye IGIHE ko uyu muraperi atigeze yiga umwaka wa kabiri ati “ Yarangije umwaka wa mbere gusa ntiyagarutse.”

Yongeyeho ko impamvu Danny Nanone atigeze asubira ku ishuri ari nyir’ubwite wazisubiza kuko we atabizi.

Ubusanzwe umunyeshuri wize umuziki mu ishuri rya muzika rya Nyundo biba biteganyijwe ko yiga imyaka itatu.

Amakuru agera ku IGIHE ahamya ko Danny Nanone yize umwaka umwe yawurangiza akagenda adasezeye ku buryo ntawamenye uko yagiye.

Mu Ugushyingo 2018 ubwo Danny Nanone wari urangije umwaka wa mbere mu bijyanye na muzika yakoranye indirimbo na Butera Knowless bayita “Addicted”.

Kuva iyi ndirimbo yajya hanze, uyu muhanzi nta yindi yongeye gukora ndetse no ku ishuri bavuga ko batazi uko yagiye.

Ubusanzwe hari abanyeshuri bajya kwiga ku Nyundo bakeneye ubumenyi bw’umwaka umwe bagahabwa impamyabumenyi y’igihe bize, gusa ikigo kiba kibizi.

Ibi nibyo Danny Nanone yakoze, yize umwaka wa mbere amaze kugira ubumenyi bw’ibanze yari yagiye ashaka muri iki kigo yigira inama yo guhita atangira kwiga na Kaminuza cyane ko yari amaze igihe n’ubundi aba i Muhanga.

Umwe mu nshuti z’uyu muhanzi yabwiye IGIHE ko ” Danny yize umwaka ku Nyundo, umunyeshuri uharangije ubusanzwe bamuha impamyabushobozi we rero ntiyigeze ayitegereza, yabonye atacikanwa n’amasomo ya kaminuza ahitamo guhita ajya kwiga cyane ko ubumenyi yashakaga mu muziki yari amaze kububona.”

Umunyeshuri wiga muri ICK yahamirije IGIHE ko uyu muraperi yiga muri iki kigo ndetse umwaka wa mbere awurangije, yagize ati” Yiga hano, yari mu wa mbere ubu agiye kujya mu wa kabiri. Yiga ibijyanye na Public Relations.”

Twifuje kubaza nyir’ubwite ibijyanye n’aya makuru ariko ntibyadukundira cyane ko telefone ze zose zimaze igihe zitari ku murongo.

Umva hano indirimbo "Addicted" Danny Nanone aheruka gukorana na Butera Knowless

Danny Nanone yasubitse iby'amasomo ya muzika ahita ajya kwiga muri ICK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza