Couple z’ibyamamare mu Rwanda zavugishije benshi mu 2020

Yanditswe na Uwiduhaye Theos
Kuya 30 Ukuboza 2020 saa 04:05
Yasuwe :
0 0

Umwaka wa 2020 uri kugera ku musozo ndetse iminsi isigaye ngo dutangira 2021 irabarirwa ku mitwe y’intoki. Mu ruhando rw’imyidagaduro hari byinshi byabaye bidakwiriye kurenzwa ingohe na gato.

Cyane benshi bavuzwe mu nkuru z’urukundo kakahava. IGIHE yakusanyije couple zavugishije benshi muri uyu mwaka mu buryo butandukanye.

Meddy & Mimi

Meddy yamaze gutera ivi asaba umukunzi we ko yazamubera umugore

Urukundo rwa Mimi Mehfira na Meddy guhera uyu mwaka utangiye kugeza na n’uyu munsi ntabwo rusiba mu itangazamakuru. Ndetse, mu ijoro ryo kuwa Gatanu tariki 19 Ukuboza 2020 Meddy yasabye uyu mukobwa ukomoka muri Ethiopia ko yazamubera umugore maze atera ivi. Hari mu birori by’isabukuru y’amavuko ya Mimi Mehfira.

Kuva muri Kanama 2017 nibwo byatangiye kumenyekana cyane ko Meddy akundana n’uyu mukobwa, ndetse ahantu hose bajyaga babaga bari kumwe agatoki ku kandi.
Muri Kanama 2018, Mimi kwiyumanganya byaranze maze asuka hanze amarangamutima ye yifuriza isabukuru uyu muhanzi.

Icyo gihe, yashyize kuri Instagram ifoto ari kumwe na Meddy, ayiherekeza amagambo y’Ikinyarwanda amubwira ati “Mutima wanjye, ndagukunda”, arangije ashyiraho utumenyetso tw’umutima.

Urukundo rwakomeje kugurumana kugeza aho Mimi yifataga rimwe na rimwe akandika amagambo agaragaza ko ariwe mukobwa ubayeho neza ku Isi kubera urukundo ahabwa na Meddy.

Meddy yigeze kubwira IGIHE ko gukundana n’uyu mukobwa ari ibintu byagiye byikora mu buryo nabo batazi.

Ati “Ni ibintu navuga ko byikoze. Twabaye inshuti, ubucuti burakura cyane tuza kwisanga twatangiye gukundana. Ha handi bwa kwira utavuganye n’umuntu ukagira amarangamutima. Ni umukobwa w’umukozi kandi witonda. Ninkubwira gutyo umenye ko yitanga, akitangira umuryango we aruhuka amasaha make.”

Mimi yishimiye bikomeye kwambikwa impeta na Meddy

Mu mpera za 2018 Meddy yagiye kwerekana mu muryango uyu mukobwa, icyo gihe babanje guca ku ivuko ry’uyu mukobwa Meddy aramutsa abo kwa sebukwe.
Ubwo yari yitabiriye igitaramo cya East African Party cyatangiye umwaka wa 2019 Meddy yeretse uyu mukobwa abakunzi be maze amagambo ashira ivuga.

Meddy yamenyanye na Mimi ubwo yari ari gukora amashusho y’indirimbo ye yitwa ‘Ntawamusimbura’, yagiye hanze muri Mutarama 2017. Uyu mukobwa agaragara mu mashusho y’iyi ndirimbo.

The Ben & Pamella

Mu minsi ishize iyi shati bambaye isa yavugishije benshi

Nyuma y’imyaka isaga 12 amaze mu muziki nyarwanda ari umwe mu bahanzi bafite izina rikomeye, Mugisha Benjamin wamamaye nka The Ben ntakunze gushyira hanze ubuzima bwe bw’urukundo.

Uyu mwaka yagamburujwe n’urukundo kwiyumanganya biranga, hatangira gututumba amarenga y’urukundo hagati ye na Uwicyeza Pamella, wahatanye muri Miss Rwanda mu 2019 akaza mu bakobwa 20 bashakishwagamo Nyampinga w’u Rwanda, ndetse muri uwo mwaka aba Igisonga cya Mbere cya Miss Zuri Africa Queen, irushanwa ryabereye muri Kenya.

Bishimangirwa n’amafoto y’aba bombi yakomeje gusakazwaga ku mbuga nkoranyambaga umunsi ku wundi, ndetse hari n’amakuru avuga bakunda gusohokana kenshi, kandi muri Kanama 2020 bigeze kujyana ku kiyaga cya Muhazi mu minsi ishize nabwo bajyanye muri Tanzania.

Pamella ukunze kugaragaza amarangamutima ye kuri The Ben, aherutse gushyira hanze ifoto bari kumwe, arangije ayiherekesha amagambo agira ati “Mine” bisobanuye ‘Uwanjye”.

The Ben na Uwicyeza barangije uyu mwaka bari mu rukundo rw igifute

Kuwa 9 Mutarama 2020 ku isabukuru y’amavuko ya The Ben, uyu mukobwa yashyize ifoto y’uyu muhanzi kuri Instagram, arangije ati "Uri umunyamutima mwiza, ugira urukundo, uri uwo kwizerwa ndetse umutima wawe ni munini kukurusha. Imana ihe umugisha undi mwaka wawe […]"

Mu kiganiro IGIHE yagiranye na Uwicyeza tariki 17 Ugushyingo, yabajijwe icyihishe inyuma y’umubano we na The Ben, aryumaho.

Kimenyi & Muyango

Kimenyi Yves na Muyango bari mu buryohe bw'urukundo rumaze umwaka urenga

Uwase Muyango Claudine, umukobwa wegukanye ikamba ry’umukobwa uzi kwifotoza akaberwa mu irushanwa rya Nyampinga w’u Rwanda mu mwaka wa 2019, nawe ari mu baryohewe mu rukundo mu 2020.

Uyu mukobwa ari mu muyenga w’urukundo na Kimenyi Yves usanzwe ari umunyezamu w’ikipe ya Kiyovu Sports akanaba umukinnyi w’ikipe y’Igihugu y’u Rwanda ‘Amavubi’.

Muri Kanama 2019 nibwo Kimenyi yahishuye ko ari mu rukundo n’umukunzi mushya yasimbuje Didy d’or batandukanye.

Yumvikanye mu itangazamakuru avuga ko mubyara we ari we watumye amenyana na Miss Muyango.

Rwabugira & Tania Muvunyi

Rwabugiri Umar umunyezamu wa APR FC akaba n’umwe mu barindira ikipe y’Igihugu Amavubi, amaze umwaka urenga mu rukundo na Tania Muvunyi bahujwe na Instagram.

Rwabugiri amaze iminsi yiyemerera ko ari mu rukundo na Tania Muvunyi, umukobwa wagerageje amahirwe yo kwitabira Miss Rwanda ahagarariye Umujyi wa Kigali mu 2018 ariko ntibimuhire.

Rwabugiri Umar n'umukunzi we Tania Muvunyi bahujwe na Instagram

Ntibasiba mu bitangazamakuru bitandukanye ndetse no ku mbuga nkoranyambaga.
Mu minsi ishize Rwabugiri yabwiye IGIHE ko yahuye n’uyu mukobwa bahujwe na Instagram.

Uyu mukinnyi wa APR FC yavuze ko ubwo umukunzi we yitabiraga Miss Rwanda atari amuzi ndetse yabimenye nyuma y’uko bakundanye. Ati "Namubonye kuri Instagram ntangira kumuvugisha gahoro gahoro, twabaye inshuti igihe kirekire nyuma turahura tubona gukundana.”

Rwabugiri avuga ko yatangiye gukundana na Muvunyi mu 2019 nyuma y’igihe bari bamaze ari inshuti zisanzwe ariko zifite uko zibanye.

Bahavu & Fleury

Ndayirukiye aherutse gusezerana imbere y'amategeko na Bahavu

Usanase Bahavu Jeannette wamenyekanye nka Diane muri Filime y’uruhererekane ya City Maid, ubu ugezweho mu yo yise “Impanga” muri uyu mwaka ari mu bafite couple itarasibye kuvugwaho cyane mu itangazamakuru.

Yabihamije tariki 17 Ukuboza 2020 asezerana imbere y’amategeko na Ndayirukiye Fleury uzwi nka ‘Legend’.

Bahavu n'umukunzi we

Mu minsi ishize aba bombi bari bashyize hanze impapuro ziteguza ubukwe bw’aba bombi, bwagombaga kuba tariki 17 na 20 Ukuboza 2020 ibi birori bikomwa mu nkokora n’ingamba zo kwirinda ikwirakwira rya Covid-19.

Usanase Bahavu Jeannette na Ndayirukiye Fleury bamenyanye mu 2015 ariko batangira gukundana mu 2016, bivuze ko imyaka irenze ine bakundana.

DJ Toxxyk & Tara Ndekezi

Dj Toxxyk n'umukunzi we baherutse kurushinga

Aba bombi urukundo rwabo ntabwo rwavuze mu itangazamakuru uyu mwaka ugitangira. Muri Nzeri hatangiye guhwihwiswa amakuru avuga ko Toxxyk yaba yarabyaranye n’umukobwa witwa Tara Ndekezi.

Mu Ugushyingo uyu musore usanzwe yitwa Arnold Ishimwe wamamaye nka DJ Toxxyk yagaraje ko aherutse kwibaruka umwana yabyaranye n’uyu mukunzi yasimbuje umunyamideli Sacha Kate babyaranye umwana w’umukobwa witwa Perla.
Ku wa 5 Ukuboza, DJ Toxxyk yasabye anakwa Tara Ndekezi, ndetse banahita batangira urugendo rushya rw’ubuzima barabana.

Vanessa & Putin

Miss Vanessa wasabwe n'ibyishimo ubwo yambikwaga impeta mu minsi ishize yari ari mu gahinda

Miss Vanessa Raïssa Uwase wabaye igisonga cya mbere cya Nyampinga w’u Rwanda mu 2015, n’umuherwe Putin Kabalu ukomoka muri Repubulika Iharanira Demokarasi ya Congo wamwambitse impeta y’urukundo mu mpera za 2019; nabo ntabwo basibye mu itangazamakuru muri uyu mwaka.

Inkuru karundura yavugishije benshi ni iyo muri Kanama 2020, aho mu rukundo rw’aba bombi havugwagamo agatotsi katurutse ku wundi mukobwa washakaga gutwara uyu mugabo.

Inkuru za Vanessa mu rukundo zikunze kuvugisha benshi

Nyuma, uyu mukobwa yafashe rutemikirere asanga umukunzi we muri Tanzania ngo banoze ibyari bimeze iminsi bitagenda neza mu rukundo rwabo.

Aba bombi bari bamaze iminsi batandikirana bagaragarizanya amarangamutima ku mbuga nkoranyambaga, bombi bifashishije Instagram bagaragaje ko bari bakumburanye.

Putin Kabalu niwe wabanje kwandika ku rukuta rwe, ashyiraho ifoto ya Vanessa ari mu ndege arangije ati “Si njye urarota ungezeho nkakubona.” Uyu mukobwa nawe arangije ati “Nanjye rukundo wanjye. Turabonana mu kanya gato.”

Urukundo rw’aba bombi rwajemo agatotsi biturutse ku wundi mukobwa, na we uzwi cyane ku mbuga nkoranyambaga wari uri gukururana n’uyu mugabo wambitse impeta Miss Vanessa.

Ibi byarakaje cyane uyu mukobwa ahitamo kuba ahagaritse umubano we n’uyu mugabo wari umaze iminsi amuhaye imodoka.

Uwase Vanessa n'umukunzi we baravuzwe cyane muri uyu mwaka

Miss Vanessa Raïssa Uwase yahise ajya ku rukuta rwe rwa Instagram ubutumwa bwose yari akunze gushyiraho yishimanye n’umukunzi we amushimagiza arabusiba, ndetse anamukura mu bantu akurikira.

N’uyu mugabo nawe yahise areka gukurikira uyu mukobwa gusa we ubutumwa yagiye ashyiraho bwa Vanessa ntiyabusiba.

Sandra Teta & Weasel

Weasel na Sandra Teta bakunze kugaragara basohokanye ahantu hatandukanye

Kuva muri Gashyantare 2018, Weasel na Sandra Teta batangiye kunugwanugwa ko baba bakundana ariko bo ntiberure ngo bagaragaze cyane urwo rukundo ku mbuga nkoranyambaga. Hari n’amakuru yavugaga ko aba bombi babana mu nzu imwe.

Kuva byatangira kwandikwa ko aba bombi bafitanye umubano udasanzwe, Teta Sandra yahise atangira kwerekana amarangamutima yihariye kuri Weasel yifashishije imbuga zitandukanye.

N’ubu mu butumwa Sandra ashyira kuri Instagram bwinshi ntabwo ahwema kuvuga imyato Weasel.

Weasel yahimbye indirimbo ayita ‘Guwoma’ cyangwa se ‘Ruraryoshye’ mu Kinyarwanda agaragaza mu mashusho yayo Teta Sandra wamutwaye umutima, uruhu n’uruhande.

Muri uyu mwaka Sandra Teta yabyariye umwana w’umukobwa Weasel, bamwita Ria Mayanja.

Mwiseneza & Tuyishimire Christian

Umwaka wa 2020 usize Mwiseneza yambitswe impeta y urukundo

Ku wa 15 Kanama 2020, mu bitarangazamakuru bitandukanye bikomeye mu Rwanda Mwiseneza Josiane witabiriye irushanwa rya Miss Rwanda 2019, akavugisha benshi ndetse akaza kwegukana ikamba rya Miss Populality; yagarutsweho nyuma y’uko yari yambitswe impeta y’urukundo n’umusore bamaze igihe bakundana.

Ni inkuru yatunguye benshi bakurikirana imyidagaduro kuko ntabwo umukunzi wa Mwiseneza Josiane yari asanzwe azwi, keretse mu nshuti ze kandi nabwo z’akadasohoka, kuko na nkeya zari zibizi zari zarasabwe kuryumaho.

Byari ibyishimo bikomeye kuri uyu mukobwa, umukunzi we ndetse no mu nshuti n’imiryango yabo yombi.

Amafoto yagiye hanze icyo gihe, agaragaza uyu mukobwa afite indabyo ndetse anambaye impeta ubona akanyamuneza ari kose. Uyu musore wambitse impeta Mwiseneza Josiane ubundi yitwa Tuyishimire Christian.

Mwiseneza yabwiye IGIHE ko bamenyanye ubwo uyu musore yamwitabazaga mu mirimo asanzwe akora, nyuma ibyari ugufashanya mu kazi bikaza kuvamo ubushuti bukomeye bwavuyemo urukundo.

Ati “Twamenyanye ashaka ko mufasha muri business ye. Umutima wanjye wamwiyumvishemo, numva ndamukunze cyane, kandi nawe mbona atangiye kunyereka ibimenyetso byinshi by’urukundo, binyereka ko tuzahuza mu buzima. Tumaranye igihe kinini ntabasha kuvuga ngo kingana gutya ariko turaziranye mu buryo bushoboka bwose.”

Yavuze ko kimwe mu byo yakundiye uyu musore ari uko akunda gusenga. Yavuze ko bataramenya neza igihe bazakorera ubukwe ariko yemeza ko atari kera.

Rwatubyaye & Hamida

Urukundo rukomeje guca ibintu hagati ya Rwatubyaye Abdul, myugariro w’Ikipe y’Igihugu Amavubi n’umukunzi we Hamida ukunze kwiyita Miss Independent ku mbuga nkoranyambaga.

Aba bombi bifashishije inkuta za Instagram, bakunda kugaragarizanya urukundo rukomeye.

Hamida ukunze kwiyita Miss Independent amaze imyaka akundana na Rwatubyaye Abdul

Mu minsi ishize Hamida yifurije Rwatubyaye urugendo rwiza rugana muri Cape Verde ubwo ikipe y’igihugu yajyaga gukinayo.

Abinyujije ku rukuta rwe rwa Instagram, yagize ati”Nahuye n’umumalayika ku Isi, Rwatubyaye Abdul warakoze kuba umuntu udasanzwe nigiraho byinshi.Ugire urugendo rwiza kandi umugore wawe aragukumbuye.”

Rwatubyaye asubiza ubu butumwa, yagize ati” Urukundo rwinshi mugore wanjye nkunda, uhora mu mutima wanjye.”

Amakuru ahari ahamya ko amaze igihe akundana n’uyu mukobwa usanzwe aba muri Indonesia.

Rwatubyaye ni umwe mu bakinnyi beza ikipe Colorado Springs Switchbacks FC igenderaho akaba umwe muri ba myugariro ngenderwaho mu ikipe y’Igihugu Amavubi.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .