00:00:00 IGIHE NETWORK KN KINYARWANDA EN ENGLISH FR FRANCAIS

Corneille yongeye kugaruka, Kavo akomeza guhagararira neza u Rwanda mu Bwongereza…. Indirimbo nshya za Weekend

Yanditswe na Uwiduhaye Theos
Kuya 22 January 2022 saa 07:18
Yasuwe :

Nk’uko bisanzwe mu mpera za buri Cyumweru, IGIHE imaze kumenyereza abantu ko ikora urutonde rw’indirimbo nshya z’abahanzi yaba iz’abakizamuka n’abamaze kubaka izina. Ni gahunda igamije guteza imbere umuziki Nyarwanda.

Kuri iyi nshuro tugiye kugufasha gutangira weekend wumva indirimbo zitandukanye nshya zagiye hanze mu minsi mike ishize.

Uru rutonde rukorwa nta kindi gikurikijwe ahubwo ari ukureba gusa indirimbo zasohotse ziri mu njyana zitandukanye.

Kuri iyi nshuro umuhanzi Corneille nyuma y’amezi atatu ashyize hanze indirimbo yise ‘Nouveau monde’ ateguza album ye nshya yise ‘Encre rose’, yakoze mu bihe bya COVID-19 ikozwe mu njyana zirimo R&B na Funk, yashyize hanze indi ndirimbo nshya.

Ni indirimbo Corneille yahuriyemo n’umuhanzi mugenzi we wo muri Canada witwa ‘Les Louanges’. Cornelius Nyungura ‘Corneille’ wubatse izina rikomeye ku Isi cyane mu bakunda umuziki w’Igifaransa ni umwe mu bahanzi b’ibirangirire bafite inkomoko mu Rwanda.

  Ingoma yawe

Umuramyi Gentil Misigaro yashyize hanze indirimbo ‘‘Ingoma yawe’’ ihamya Ukwera kw’Imana. Ni indirimbo ikozwe mu buryo bw’imbona nkubone (Live) yafatiwe mu giterane aherutse guhuriramo n’abaramyi bakomeye bo muri Diaspora Nyarwanda. Cyabereye mu Mujyi wa Portland muri Leta ya Maine ibarizwa muri Amerika muri Nzeri 2021.

Yagize ati “Cyari igitaramo cyiza cyane, iyo ndirimbo twayiririmbyemo bwa mbere abantu barayikunda. Kuko twari twamaze kuyifata ’live’ duhita duhitamo kuyishyira hanze.”

Gentil Misigaro yamenyekanye mu ndirimbo zirimo ‘Biratungana’, ‘Hano ku Isi’, ‘Hari imbaraga’, ‘Yesu ndiye Dereva’, ‘Buri munsi’ na ‘Iyo mbimenya’.

  Urakoze Yezu

Ni indirimbo ya Korali Emmanuel yo muri Kiliziya Gatolika, Paruwasi ya Gikondo yitiriwe Mutagatifu Visenti Pollotti.

Korali Emmanuel imaze imyaka ikabakaba 43 kuko yavukiye mu itsinda ry’Abasengera mu Ivugururwa muri Roho Mutagatifu ryitwa Emmanuel ryari rimaze kugera muri iyo paruwasi mu mpera za 1979.

Kugeza uyu munsi iryo tsinda Charismatique na Korali Emmanuel yaryo bakomeje kwamamaza ijambo ry’Imana binyuze mu bikorwa by’urukundo bitandukanye no mu ndirimbo zisingiza Imana.

Uko imyaka yagiye itambuka ni ko Korali yagiye ikora ubutumwa butandukanye binyuze mu ndirimbo, ikaba yari imaze gukora iziri ku mashusho n’izitarayashyirwamo. Iyi korali yashyize hanze indirimbo “Urakoze Yezu” yo gushimira ku bw’umwaka ushize ndetse inayisaba ko muri uyu byaba byiza kurushaho.

  Ai Gitare cy’Imana

Ni indirimbo yasubiwemo n’umuramyi Prosper Nkomezi. Iyi ni indirimbo ya 91 mu gitabo cy’Indirimbo mu zo Gushimisha. Uyu musore yayishyize hanze nyuma yo gushyira hanze album ye ya kabiri y’indirimbo 10 uyu muhanzi yitiriye indirimbo yise ‘Nzakingura’.

Iriho indirimbo nka ‘Wanyujuje indirimbo’, ‘Ndaje’ yahuriyemo na Gentil Misigaro, ‘Hallellujah’ yakoranye na James & Daniella, ‘Urihariye’, ‘Nshoboza’, ‘Warakoze’, ‘Nzakingura’, ‘Hahiriwe’, ‘Ai Gitaye’ na ‘Tumusange’.

Nkomezi yaherukaga kumurika album ye ya mbere mu 2019 mu gitaramo cyabereye muri Kigali Serena Hotel, tariki ya 7 Nyakanga 2019. Iyi album ye ya mbere yari igizwe n’indirimbo icyenda.

  I praise Lord

Ni indirimbo yo gushima Imana y’umuhanzi w’Umunyamerika Anthony ESullivan yahuriyemo na Comfort People Ministries izwi cyane mu Rwanda. Iyi korali yanamenyekanye cyane ubwo Jay Polly yatabarukaga kubera indirimbo yo guhimbaza Imana bari bamaze igihe gito bakoranye yitwa ‘Ubutunzi’.

“I Praise Lord” ni indirimbo yo gushimira Imana. Amashusho yayo yafatiwe mu bice bitandukanye mu Rwanda by’umwihariko mu Kinigi, andi afatirwa muri Leta Zunze Ubumwe za Amerika aho Anthony ESullivan abarizwa, arangije arahuzwa.

  She Knows

Ni indirimbo yahuriyemo abahanzi Mr. Emmy n’Umuraperi Siti True Karigombe. Igaruka ku rukundo rwo kugaragaza ko abantu bakundana mu buryo budasanzwe ndetse bikaba bitari ngombwa ko buri wese abimenya kuko babiziranyeho.

Mr Emmy wafatanyije iyi ndirimbo na Karigombe yavukiye i Rwamagana mu 1997, ni imfura mu bana batandatu. Ni umwanditsi w’indirimbo ndetse akaba yandika n’uko abantu bashobora kwitwara mu mashusho y’indirimbo cyangwa muri filime. Aririmba Soft Trap, yatangiye umuziki mu 2020.

Afite indirimbo enye zirimo iyitwa ‘Tega amatwi’ yakoranye na Mr. Kagame, ‘2dayz’ yahuriyemo na Extra, ‘Super hero’ yakoranye na GSB.

  Love Yourself

Ni indirimbo y’umuhanzi Isaac Nshuti Bigogwe ukoresha amazina mu muziki ya Isaac Bigogwe. Avuga ko izina rya Bigogwe yaryiswe n’abahanzi bagenzi be biganye ku Nyundo barimo Bill Ruzima na Kevin Kade.

Uyu musore yasoje kwiga ku ishuri ry’umuziki mu 2021. Yize ibijyanye no kuririmba gucuranga no kwandika indirimbo. Acuranga umwirongi na Saxophone.

‘Love Youself’ uyu musore w’imyaka 20 ayikoze ari iya kabiri, kuko iya mbere yakoze yitwa ‘No Time’ yagiye hanze mu mwaka washize. Ivuga ku buzima bwo guharanira ko abantu bakora no kugira urukundo. Umuhanzi afatiraho urugero ni Bill Ruzima.

  Izina

Ni indirimbo Bruce Melodie uherutse kubona sosiyete nshya imufasha mu bikorwa bye by’umuziki yamaze gusohora, ni iya mbere mu zo yakoranye na yo.

‘Izina’ yakorewe mu Rwanda mu buryo bw’amajwi, mu gihe amashusho yayo yo yafatiwe muri Tanzania.Yayanditse afatanyije na Niyo Bosco umaze kubaka izina mu muziki w’u Rwanda. ‘Izina’ ni yo ndirimbo ya mbere Bruce Melodie asohoye mu zo yakoranye na sosiyete ya 1:55 AM Ltd bari gukorana.

  For You

Iyi ni indirimbo y’umuhanzi Shema Didier wahisemo kuza mu muziki yitwa Shema Gray uri mu bahanzi bakizamuka. Igaruka ku muntu uba wizeza umukunzi we kuzamuba hafi akamukorera buri kintu cyose.

Ni indirimbo iri mu zo uyu muhanzi ari gushyira hanze mu gihe kitari kinini cyane amaze yinjiye muri muzika cyane ko ije ikurikira iyo yise ‘Oya’ yaherukaga gushyira hanze mu minsi yashize.

  One

Ni indirimbo y’umunyamakuru Edson Ishimwe wamenyekanye kuri Prime TV nka Edman mu kiganiro 411 ariko ubu akaba aba muri Canada nyuma yo kurushinga n’umuhanzikazi Liza Mugisha.

Uyu munyamakuru mu ndirimbo ye yahurijemo abahanzi nka Alyn Sano, Andy Bumuntu ndetse na Social Mula. Igaruka ku rukundo hagati ya babiri aho buri umwe aba yizeza mugenzi we ko ari we wenyine yahaye urukundo rwe.

Edman yahurije hamwe aba bahanzi mu ndirimbo kuko yashakaga gukora indirimbo irimo abahanzi avuga ko bafite amajwi yihariye mu muziki Nyarwanda.

  Airforce One

Ni indirimbo y’umwana ukiri muto w’Umunyarwanda witwa Kavo ukorera umuziki mu Bwongereza yahuriyemo na mugenzi we witwa RA (Real Artillery) uri mu baraperi bagezweho mu Bwongereza.

Uyu musore akorana na sosiyete zifasha abahanzi by’umwihariko b’abaraperi zirimo Mixtape Madness na GRM Daily. Amaze gukora ibihangano bitandukanye birimo Billy X Pain Freestyle, F**k Gcse’S × Truth Freestyle, Lean, Next Up? , Airforce One yashyize hanze n’izindi zitandukanye.

Ibihangano by’uyu musore biri mu birebwa cyane by’abaraperi mu Bwongereza. Afite umwihariko wo kungikanya amagambo kandi aririmba mu Cyongereza gusa.

  Pro Gang

Iyi ni indirimbo y’itsinda rishya ry’abasore babiri ryitwa Kabbashi. Iri tsinda rigizwe na Dieu Merci Chance ukoresha amazina y’ubuhanzi ya Shizzy na Karushoza Mapendo ukoresha amazina ya MP. Aba basore batangiye umuziki mu 2018 bahuriye ku ishuri.
Bamaze gukora indirimbo mu buryo bw’amajwi n’amashusho eshanu ariko imaze kujya hanze ni iyo bise Pro Gang (Professional Gang).

  Agakoni

Ni indirimbo JOKA$$H usanzwe atunganya indirimbo yahurijemo abahanzi Logan Joe na Kenny K-Shot bose bari mu bahanzi bari kuzamuka neza muri muzika nyarwanda.

JOKA$$H wahurije aba bahanzi ubusanzwe yitwa Mugisha Joe Liam, afite imyaka 21. Yavukiye mu Karere ka Nyarugenge. Yasoje amashuri yisumbuye kuri IFAK Kimihurura aho yize Imibare, Mudasobwa n’Ubukungu (MCE).

Avuga ko yatangiye gutunganya indirimbo yiga mu mashuri yisumbuye. Ati “Natangiye gutunganya indirimbo niga mu mwaka wa kane w’amashuri yisumbuye. Nabanje kuba umuhanzi, ndi umuraperi. Nyuma gutunganya indirimbo biza kuntwara.”

Yatangiye gukora ibijyanye no gutunganya indirimbo mu 2019 . Uyu musore mu kazi ke akora injyana zirimo Hip Hop, RnB na Afrobeat.

  Am done

Ni indirimbo y’umuhanzikazi Tonny Unique yakoze nyuma y’imyaka ibiri n’amezi atari make, yarafashe akaruhuko mu bijyanye na muzika, yayikoranye na Riderman.

Ni indirimbo uyu muhanzikazi ahamya ko asubukuriyeho urugendo rwe mu muziki nyuma y’ikiruhuko cy’imyaka irenga ibiri yari yarafashe. Ku kijyanye n’impamvu yahisemo kuyikorana na Riderman, Tonny Unique yavuze ko ari uko basanzwe ari inshuti ndetse bari barabyemeranyije mbere.

Ati “Riderman ni inshuti yanjye ya kera, twari twarigeze kubiganira ariko ejobundi ubwo nashakaga kugaruka ni bwo twabivuzeho ahita abyemera.”

Iki kiruhuko Tonny Unique yagifashe mu 2019 nyuma yo gusohora indirimbo yitwa ‘So long’ yagiye hanze muri Kanama uwo mwaka.

Uyu muhanzikazi yambitswe impeta n’umusore bari bemeranyije kurushinga mu ntangiriro za 2020 banaza kwibaruka imfura yabo batararushinga.

  Millionaire

Ni indirimbo nshya y’umuhanzi Mico The Best igaruka ku buzima bukomeye abantu banyuramo bakirinda kwandavura no guhemuka ariko bakagera ku ntego zabo.

Mico The Best hari aho agira ati “Nabaga ndi muri ‘hustle’ ntemerewe kubinjirira, bya bikundi bya ba kapo binywa ndora nkiri mu kato. Aka gakino nagatangiye intiti z’ino zinseka, ndavuga nti ‘reka da ndabikomeza igishaka kibe’. Ikofi yaratobotse mu mufuka nta gicwa n’agafariso najyanye ku ishuri ni Rose wakankiniye.”

Mu kiganiro na IGIHE, Mico The Best yahishuye ko muri iyi ndirimbo yavugaga inkuru mpamo y’ukuntu yakuranye inzozi zo kuzatunga miliyoni nubwo yabonaga ko bigoranye kuzazikabya. Uyu muhanzi yavuze ko muri iyi ndirimbo yageragezaga kumvikanisha ibyishimo aterwa no kuba umuziki waratumye akabya inzozi.

  Ballerina

Ni indirimbo y’umuhanzi ukizamuka Eric Niyonkuru, ukoresha amazina ya Ric Noir. Iyi ndirimbo igaruka ku musore wishimiye kuba ari kumwe n’umukobwa akamusaba kumwemerera akamushimisha kuko n’ubwo atajya asinda ariko bagirana byatuma amera nk’uwasomye icupa.

Ric Noir yari aherutse gushyira hanze Extended Play (EP) yise “Blacknificent” iriho indirimbo esheshatu. Iyi ndirimbo iri mu ziri kuri iyi EP zirimo izindi nka “A Song for All and None”, “Nyambu” yahuriyemo na Josh, “Blacknificent” yanitiriye iyi EP , “Insight (Intro)”, “Innalude” na “Booze” yakoranye na Manzi Fleur.

  Urupfu rubi

Ni indirimbo y’umuhanzikazi Giramata Jeanne d’Arc uri mu baramyi bakizamuka bafite imyaka mike cyane kuko afite 17. Uyu mukobwa yakunze gusubiramo indirimbo z’abandi bahanzi barimo Israel Mbonyi, Aline Gahongayire n’abandi.

Iyi ndirimbo yise ‘Urupfu rubi’ ni yo ya mbere yabashije gushyira hanze nyuma y’igihe kinini abigambiriye ariko ubushobozi bukaba buke. Ubu afite izindi nyinshi ahishiye abakunzi b’umuziki wo kuramya Imana ziri muri studio.

‘Urupfu rubi’ ni indirimbo yo gushimira Imana ku bw’umurimo ukomeye yakoze igakiza abantu bayo urupfu rubi satani watekerezaga ko bibarangiriyeho.

Uyu mwana w’umukobwa yiga mu mwaka wa gatatu w’amashuri yisumbuye, akaba asengera muri Assembly of God Church i Masaka mu Mujyi wa Kigali.

  Data wa Twese

Ni indirimbo y’umuramyi Bryan Lead uri mu bakiri kuzamuka. Uyu muhanzi ubusanzwe yitwa Bryan Dadou Niyigena. ‘Data wa Twese’ yayishyize hanze nyuma y’igihe kinini yandikira abandi bahanzi baririmba indirimbo zihimbaza Imana.

Uyu musore w’imyaka 24 yakuriye mu muryango wa gikirisitu ndetse na se yari umwe mu baririmbyi bakomeye aho basengeraga, ari umwanditsi w’indirimbo ndetse n’umucuranzi wa piano. Ntiyabashije kubona umuhungu we agera ikirenge mu cye cyane ko yaje kwitaba Imana mbere y’uko atangira umuziki.

Cornelius Nyungura ‘Corneille’ wubatse izina rikomeye ku Isi cyane mu bakunda umuziki w’Igifaransa ni umwe mu bahanzi b’ibirangirire bakomoka mu Rwanda

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .