00:00:00 IGIHE NETWORK KN KINYARWANDA EN ENGLISH FR FRANCAIS

Corneille, Platini P, Safi Madiba bakoze mu nganzo… Indirimbo nshya za Weekend

Yanditswe na Uwiduhaye Theos
Kuya 21 May 2022 saa 09:04
Yasuwe :

Mu mpera za buri cyumweru IGIHE yiyemeje gukora urutonde rw’indirimbo zitandukanye nshya z’abahanzi yaba abakizamuka ndetse n’abamaze kubaka izina. Ni gahunda igamije guteza imbere umuziki Nyarwanda.

Ni urutonde rukorwa nta kindi gikurikijwe ahubwo ari ukureba gusa indirimbo yasohotse. Ubu twakusanyije indirimbo ziheruka twabashije kubona.

Saba

Ni Extended Play [EP] y’umuhanzi witwa Da Promota uririmba indrimbo zihimbaza Imana, y’indirimbo esheshatu yahurijemo abandi bahanzi batandukanye. Iyi EP uyu muhanzi yayise ‘Saba’. ‘Saba’ ni indirimbo nayo iriho. Ubutumwa buri muri iyi ni ubwo gusaba Imana kudasigara mu rugendo kuko ari inzira itoroshye.

Uyu muhanzi yabwiye IGIHE ko ari indirimbo igaruka ku butumwa akunda kwibandaho. Ati “Ni indirimbo irimo ubutumwa kuri njye nkunda kugarukaho mu myandikire y’indirimbo zanjye, aho muri iyi minsi abantu bapfa kubera agahinda gakabije ugasanga turihebye kubera ubuzima n’ibihe tunyuramo umunsi ku munsi ariko nsaba Imana ngo ijye ibana nanjye uko bwije n’uko bukeye inyobore muri uru rugendo kugeza ngiye mu ijuru.”

Avuga ko ari nayo mpamvu nyamukuru yayitiriye iyi EP ye. Iyi Ep iriho indirimbo nka ‘Saba’, ‘Ndanezerewe’, ‘Intambwe’ yahuriyemo na Emmy Vox, ‘Nyobora yakoranye na Sean Brizz, ‘Baba wangu’ na ‘Ha agaciro’ yakoranye na Mandela.

Reba indirimbo zigize EP nshya ya Da Promota

Imihanda

Ni indirimbo nshya ya Riderman na Shizzo Afropappi. Iyi ndirimbo aba bahanzi batangamo ubutumwa bukangurira abantu gukura amaboko mu mufuka bagakora.

Hari aho aba bahanzi baririmba bati “Nubona ntigita nasaze mba ndimo nshaka amafaranga, iby’abaryamye ntubimbaze mba nakwamye. Ndi mu mihanda nshaka amafaranga, niba umbwira ibitari byo ubwo ni umwanda.”

Inarillah

Ni indirimbo nshya y’umuhanzi Ishimwe Claude ukoresha amazina y’ubuhanzi ya IC Mello. Ni indirimbo ye ya kane ije ikurikira izindi nka “Kora Jeste”, “Modulation” na “Akamelodie”. Yabwiye IGIHE ko yayihimbye ayikomoye ku nkuru mpamo y’umusore w’inshuti wakundanye n’umukobwa nyuma y’igihe amurenza ingohe.

Ati “Ni indirimbo nahimbye nyikomoye ku nshuti yanjye. Yari ifite umukobwa uyikunda ariko itabiha agaciro nayo nyuma bigenda biza batangira gukundana.”

IC Mello yatangiye umuziki mu 2017.

Weni

Ni indirimbo y’umuhanzikazi Shirangabo Jolie ukoresha izina rya Joshari muri muzika. Akorera umuziki mu Ntara y’Amajyaruguru. Amaze gukora ibihangano bitandukanye birimo “Judge”, “Inkovu z’ibihe”, “Iryamukuru” na “Weni” yashyize hanze ubu.

‘Weni’ uyu muhanzikazi yashyize hanze irimo ubutumwa bw’urukundo bw’umukobwa uba ubaza umuhungu bakundana amutendeka igihe azarekera imico nk’iyi. Joshari abarizwa muri The Rayan Music Ent ya Uwimfura Parfait, iyi nzu ifasha abahanzi kugeza ubu irimo Joshari n’undi mukobwa witwa Chika.

Kurura

Ni indirimbo ya Bushali na Juno Kizigenza bahuriyemo. Mu buryo bw’amajwi yakozwe na Kozze ukorera muri Country Records. Aba bahanzi baba baririmba bishyize mu mwanya w’umuntu wahisemo gukora iyo bwabaga ngo azaheshe ishema umuryango.

Bitinde

Ni indirimbo nshya ya Logan Joe na Og2Tone. Iyi ndirimbo ivuga ku nzira igoranye aba bahanzi banyuzemo mu buzima.

Logan Joe hari aho aririmba ati “Aho kugira ngo ubone mpagarara nanakwemera nkanakora ibidakorwa. Kuko amagambo avugwa yo ntiwayabara, umwana w’undi abishya inkonda bazasara gusa reka njye mbatsinde mbikore bitinde umwanya we mukwene, babyange babikunde inzira yacu ni ndende.”

Jojo

Ni indirimbo nshya ya Platini P. Iyi yo igaruka ku gutaka umukobwa uyu muhanzi aba yataziriye akazina ka Jojo. Uyu muhanzi muri iyi ndirimbo akina urukundo na Umukundwa Clemence uzwi nka Cadette.

Platini mu gitero cya mbere hari aho aririmba ati “Rukundo rwanjye turi kumwe tuba tumeze neza wowe uri chocolat njye nkaba Vanilla. Jojo uri isoko y’amazi yanjye, ndi mu rukundo n’umubiri wawe, we kana watuma Baba arira.”

Won’t lie to you

Ni indirimbo nshya ya Safi Madiba. Igaruka ku musore uba wizeza umukobwa ko amukunda bitari iby’uburyarya.

Hari aho aririmba ati “Nk’uko nta mwanzi aturutse iwawe cyangwa aturutse iwanjye. Njye nawe ni ubuziraherezo, njye nawe dufite imbaraga mu rukundo, nshaka kuba umwami ukaba umwamikazi.”

Kaze neza

Ku wa 18 Gicurasi nibwo Clarisse Karasira yashyize hanze indirimbo nshya yise ‘Kaze Neza’ yahimbiye umwana yitegura kwibaruka mu minsi mike iri imbere. Ni indirimbo yahimbye ari nk’impano ku mwana we yitegura kwibaruka w’umuhungu.

Muri iyi ndirimbo hari aho uyu muhanzi aririmba ati “Kaze neza mwana wanjye ndagukunda [...] Isi izahinduka indi mu kubaho kwawe, dutegereje kukubona ugera ku bihambaye. Amatsiko ni yose kuri ba nyogosenge na ba nyorokorome, sogokuru na nyogokuru ngo ngwino.”

Muri iyi ndirimbo imara iminota itatu n’amasegonda 49, Karasira agaragaramo igitangira ari kumwe n’umugabo we, mu bindi bice bikurikiraho akaba ari uyu muhanzi wiganzamo. Ku wa 22 Gicurasi 2022, Clarisse Karasira na Ifashabayo Sylvain Dejoie bashyize hanze amafoto agaragaza ko bitegura kwibaruka imfura yabo.

Yote ni ya Mungu

Ni indirimbo ya Mwalimu Ssozi Joram ubarizwa muri Ambassadors of Christ Choir. Ni indirimbo yo gusubizamo ibyiringiro abihebye uyu muhanzi akababwira ko ibintu byose ari iby’Imana bityo bakwiriye kuyireka ibibazo bibabayeho akaba ari yo ibikemura.

Uyu muririmbyi hari aho aririmba ati “Ibintu byose biri mu biganza by’Imana yireke iyobore. Icyo usabwa ni ukubaha no gutegereza Imana. Ntuzareke gusenga.”

One in a Million

Ni indirimbo nshya y’umuhanzi Emma uri mu bari kwinjira ku isoko rya muzika nyarwanda. Iyi ndirimbo uyu muhanzi yayihimbye ashaka kwerekana ukuntu yaguye mu nyanja y’urukundo n’umukobwa umwe mu gihe yari amaze iminsi yarabuze uwamwemeza ngo bakundane.

Hari aho aririmba ati “Burya urukundo rujya aho rushaka, nakundwaga na benshi simbone unyemeza. Si uko ntawe nabonaga w’uburanga gusa naburaga uwo nshyiraho umushinga. Narabyutse njya mu kirori bimwe byo kwishima, mpura n’umwari udafite aho amwaye kuva ubwo niwe wahindutse ikirori cyanjye.”

Imitoso

Ni indirimbo nshya y’umuhanzi Munana. Iyi ndirimbo iri mu bwoko bwa Amapiano. Irimo ubutumwa bw’umusore uba akeneye umukobwa bishimana.

Hari aho aririmba ati “Gushimisha umubiri ntabyo kwikanga, irekure nawe ntabyo kwikanga. Bikore barebe.”

Mbera urutare

Ni indirimbo y’itsinda rya Kingdom Of God Ministry. Kuyihimba byaturutse ku ijambo riri muri Zaburi 71:3 3. Ahagira hati “Umbere urutare rw’ubuturo, aho nzabasha kujya mpungira, wategetse kunkiza, kuko ari wowe gitare cyanjye n’igihome kinkingira.”

Isoko

Ni indirimbo ya Patrick Nkundabose. Iyi ndirimbo igaruka ku butumwa bwo kubwira Imana ko abantu bakeneye isoko y’amazi y’ubugingo.

Patrick Nkundabose wahimbye iyi ndirimbo yamamaye cyane nk’umuyobozi w’indirimbo mu Itsinda rya Alarm Ministries rifite izina rikomeye mu Rwanda.

Uyu mugabo amaze igihe kinini atuye i Burayi muri Suéde, kuva yagera muri iki gihugu amaze gushyira hanze indirimbo zirimo iyo yise ‘Ndi ubuhamya’, ‘Amaraso Ya Yesu’ yafatanyije na Keila, ‘Atawale’ n’iyi nshya yashyize hanze.

Encre Rose

Ni amashusho y’indirimbo nshya ya Cornelius Nyungura ukoresha amazina ya Corneille, ukorera umuziki hanze y’u Rwanda muri Canada. Iyi ndirimbo yayitiriye album iriho indirimbo 10 aheruka gushyira hanze.

Izi ndirimbo zirimo iyitwa “Petit pas”, “Pause”, “Le prix des étoiles”, “Rope a dope”, “Les hommes de ma vie”, “Rendez-vous à minuit”, “Nouveau monde”, “Bon voyage”, “Nouveau pouvoir” na “Encre rose” yanitiriwe album yakoranye na Dashny Jules yashyiriye hanze amashusho.


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .